Вы тут

Што можна ўбачыць на фотавыстаўцы Аляксандра Ласмінскага


Чарговая экспазіцыя ў гарадской выставачнай зале прымеркаваная да 70-гадовага юбілею вядомага на Гродзеншчыне тэлежурналіста і фатографа.


У аўтара выстаўкі шмат рэгалій. Ён заслужаны журналіст Беларускага саюза журналістаў, акадэмік Еўразійскай Акадэміі тэлебачання і радыё, кіраўнік заслужанага аматарскага калектыву Рэспублікі Беларусь народнага фотаклуба «Гродна». Яго творчасць высока ацэнена дзяржавай. Сярод узнагарод — медаль Францыска Скарыны, знак «За асабісты ўнёсак у развіццё культуры Беларусі». Імя Аляксандра Ласмінскага ўнесена ў Кнігу Гонару горада Гродна. Многія гродзенцы ведаюць юбіляра як дэпутата гарадскога Савета, на гэту пасаду ён выбіраўся ажно тры разы і змог рэалізаваць не адну грамадскую ініцыятыву.  

Як прызнаецца сам Аляксандр Ласмінскі, усё, што робіць, ён прысвячае свайму роднаму гораду, усяму Прынёманскаму краю. У экспазіцыю ўвайшлі фотаздымкі самага шырокага дыяпазону — ад рэпартажных і пейзажных фота да партрэтаў. Самыя першыя кадры зроблены яшчэ ў 1967 годзе. Нямала і эксклюзіўных кадраў, якімі аўтар асабліва ганарыцца. Напрыклад, яму ўдалося зрабіць партрэты вядомых гродзенцаў — пісьменніка Васіля Быкава і гімнасткі Вольгі Корбут.

Многія ведаюць Аляксандра Ласмінскага па фатаздымках з вышыні птушынага палёту, якія ўваходзяць у цыкл «Сэрца зямлі маёй». Выстаўка пабывала ў Маскве, Парыжы, Варшаве, Славакіі, Літве. Адзін з кадраў стаў брэндавым — гэта здымак ляснога масіву ў форме сэрца.

— Гэты цыкл я задумаў, калі пачаў рыхтаваць першую кнігу «Гродзеншчына». Хацелася пабачыць нашу вобласць менавіта з вышыні птушынага палёту. Мне пайшлі насустрач, і ў выніку мы абляцелі ўсе 17 раёнаў. Такім чынам восем год таму з’явіўся гэты альбом. А ўсяго зроблена каля васьмі тысяч кадраў з вышыні. Вядома, гэты палёт не адзіны. Толькі над Гродна ўдалося праляцець больш за 20 разоў. Прыемна было бачыць, якой прыгожай і дагледжанай выглядае наша зямля. І вось, у чарговым палёце, сярод поля паміж аэрадромам і ГЭС я зрабіў здымак лесу ў форме сэрца. Гэты кадр аб’явілі брэндам нашай краіны, — дзеліцца аўтар.

Многія здымкі ўвайшлі ў склад фотаальбомаў. А іх за шматгадовую працу журналіста і фотааматара выдадзены дзясяткі. Усе яны адлюстроўваюць адметнасць Прынёманскага краю, удала ўбачаную фотамастаком. У ліку значных альбомаў — «Аўгустоўскі канал», «Возера Свіцязь», «Гродзенская зямля з вышыні птушынага палёту», «Летапіс Рэспубліканскага фестывалю нацыянальных культур», «Каложская царква». А вось здымкі любімага горада выйшлі ў выдавецтве «Беларусь» ажно ў пяці варыяцыях і маюць статус прэзентацыйных альбомаў. Фотаработы аб’яднаны ў зборнік з ёмістай назвай — «Гродна».

Маргарыта УШКЕВІЧ

фота Яна ХВЕДЧЫНА

Выбар рэдакцыі

Грамадства

Калі дапамога патрэбна экстранна, яе заўсёды змогуць аказаць валанцёры Чырвонага Крыжа

Калі дапамога патрэбна экстранна, яе заўсёды змогуць аказаць валанцёры Чырвонага Крыжа

Гучны гул сірэны знянацку застаў пенсіянерку Веру Васільеўну дома.

Грамадства

Хормайстр Ніна Ламановіч: Можна выходзіць замуж, калі жыццё жанчыны пасля гэтага палепшыцца

Хормайстр Ніна Ламановіч: Можна выходзіць замуж, калі жыццё жанчыны пасля гэтага палепшыцца

Галоўнаму хормайстру Вялікага тэатра 27 жніўня споўнілася 70 гадоў. 

У свеце

У «чорнай» зоне. Чаму Літву захліснула пандэмія?

У «чорнай» зоне. Чаму Літву захліснула пандэмія?

Уся Літва трапіла ў «чорную» зону заражэння каранавірусам. 

Грамадства

Страшнае слова «генацыд»

Страшнае слова «генацыд»

Для тых, хто прысвойвае сабе права быць «выключнымі», гэта рана ці позна становіцца катастрофай у маштабах народа.