Вы тут

Разгадваем тайны твораў класіка


Сёлета спаўняецца 90 гадоў з дня нараджэння беларускага класіка Уладзіміра Караткевіча. Якраз у дзень юбілею 26 лістапада на сацыякультурным канале «Беларусь 3» гледачоў чакае паказ кінафільмаў, якія былі зняты па творах пісьменніка.


«Дзікае паляванне караля Стаха» — адна з першых аповесцяў Уладзіміра Караткевіча, якую апублікавалі ў 1964 годзе, а экранізаваная яна была толькі ў 1979-м. Містычная драма ад рэжысёра Валерыя Рубінчыка пераносіць нас у ХІХ стагоддзе. Малады вучоны-этнограф Андрэй Беларэцкі прыязджае на беларускае Палессе, каб вывучаць народныя паданні. Ён пасяляецца ў маёнтку Балотныя Яліны, дзе жыве юная паненка Надзея — апошняя прадстаўніца старажытнага шляхецкага роду Яноўскіх. Дарэчы, здымкі старадаўняга палаца праводзіліся ў Падгорацкім замку, што знаходзіцца ў Львоўскай вобласці (Украіна). Дзяўчына распавядае Беларэцкаму пра прывідаў іхняга дома: Маленькага Чалавека, Блакітную жанчыну і Дзікае паляванне, што наводзяць жах па ўсёй акрузе...

Прэм'ерны паказ фільма адбыўся ў Мінску ў сценах касцёла Святых Сымона і Алены, дзе тады размяшчаўся Дом кіно. Пасля кінастужка атрымала розныя ўзнагароды па ўсім свеце. Так, напрыклад, на І Міжнародным кінафестывалі дэтэктыўных і таямнічых фільмаў «Містфэст» у Італіі «Дзікаму паляванню караля Стаха» аддалі Гран-пры, а потым праз некалькі гадоў такі ж поспех напаткаў карціну і ў Бельгіі на Міжнародным кінафестывалі містычных і навукова-папулярных фільмаў.

Экранізацыя рамана «Хрыстос прызямліўся ў Гародні» апярэдзіла выхад самой кнігі. Спачатку твор з'явіўся ў пісьменніка ў выглядзе кінасцэнарыя, па якім знялі фільм. Сюжэт яго заснаваны на рэальных падзеях. Штуршком для напісання рамана паслужыў запіс з «Хронікі...» Мацея Стрыйкоўскага пра тое, што ў ХVІ ст., у пачатку княжання Жыгімонта І, з'явіўся чалавек, які называў сябе Хрыстом. Кінастужка знятая Уладзімірам Бычковым — гэта філасофская прытча і роздум пра пакліканне чалавека... У часы голаду і татарскіх набегаў акцёр Юрась Братчык з'яўляецца перад народам у абліччы Хрыста, і народ верыць у цуд. Гэтым вырашае скарыстацца хітры манах Басяцкі. Юрася і яго сяброў — «апосталаў» арыштоўваюць па загадзе кардынала, грыміруюць, апранаюць у адпаведнае адзенне і выводзяць да народа. Галодны люд пачынае маліць пра хлеб, і Юрась вядзе натоўп да засекаў багацеяў. Збегшы ад кардынала, Юрась з сябрамі хаваецца ў жаночым кляштары. А потым з дапамогай людзей яны разбіваюць татар і войска кардынала. Фільм быў зняты на «Беларусьфільме» ў 1967-м і адноўлены ў 1989 годзе, калі яго паказалі публічна. У карціне гледачы заўважаць шмат горкай іроніі, драматызму, але разам з тым гумару і аптымізму. Сам пісьменнік неяк адзначыў, што гэта «не камедыя і не трагедыя, а трагікамедыя, смех скрозь слёзы, народная драма».

А вось тым, хто любіць гістарычныя дэтэктывы, варта будзе паглядзець фільм «Чорны замак Альшанскі» ад рэжысёра Міхаіла Пташука. Экранізацыю па матывах гэтага рамана зрабілі ў 1983 годзе. Па сюжэце дзея адбываецца ў 1611 годзе. Магутны і найбагацейшы ў Беларусі род князёў Альшанскіх раптам занепадае. Скарбы роду аказваюцца замураваныя ў адной з веж радавога замка. Апошні з князёў Альшанскіх хавае завяшчанне пра месцазнаходжанне скарбу ў вокладку кнігі, якая захавалася і ўжо ў наш час стала цэнтрам ланцуга дзіўных, загадкавых і нават крывавых падзей... Сюжэт вядомы многім, але чаму б не паглядзець яго ў кінаўвасабленні?

Алена ДРАПКО

Выбар рэдакцыі

Грамадства

Водар лаванды вабіць на Веткаўшчыну

Водар лаванды вабіць на Веткаўшчыну

Як выглядае «беларускі Праванс», дакладна ведаюць жыхары глыбінкі Гомельскай вобласці.

Эканоміка

«Прадам утульную кватэру, а куплю яшчэ лепшую». А пра падаткі вы не забыліся?

«Прадам утульную кватэру, а куплю яшчэ лепшую». А пра падаткі вы не забыліся?

Адна мая добрая знаёмая вырашыла палепшыць свае жыллёвыя ўмовы — прадаць сваю двухпакаёвую кватэру і купіць трохпакаёвую.

Калейдаскоп

Усходні гараскоп на наступны тыдзень

Усходні гараскоп на наступны тыдзень

БЛІЗНЯТЫ. Калі ёсць цікавыя ідэі, то менавіта цяпер яны будуць запатрабаваныя і нарэшце ажыццёвяцца. Тыдзень прынясе знаёмствы з новымі людзьмі, спатканні, вандроўкі і шмат яркіх уражанняў. Асабістае жыццё рэзка зменіцца, прычым менавіта так, як вы марылі. Вы больш не будзеце самотныя, сітуацыя вырашыцца на вашу карысць.

Грамадства

Ці варта засцерагацца ад вяртання анамальнай спякоты? Дзмітрый Рабаў расказаў пра надвор’е на астатнюю частку лета

Ці варта засцерагацца ад вяртання анамальнай спякоты? Дзмітрый Рабаў расказаў пра надвор’е на астатнюю частку лета

«Верхавіна лета» прайшла, і ўжо мала хто памятае, што першая дэкада чэрвеня была халаднаватай і з замаразкамі.