Вы тут

Вільготная маска ад COVІD-19 не абароніць


У Магілёўскай вобласці прымаюцца ўсе магчымыя меры, каб стрымаць рост каранавіруснай інфекцыі, але па-ранейшаму фіксуецца дастаткова шмат выпадкаў захворвання на вострыя рэспіраторныя вірусныя інфекцыі, у тым ліку «ковід». Гэтае захворванне лічыцца асабліва небяспечным і тут лепш даверыцца прафесіяналам, размяжоўваць, як той казаў, парады ад знаёмых і з інтэрнэту. Вось некалькі карысных рэкамендацый ад намесніка галоўнага ўрача па медыцынскай частцы магілёўскай Цэнтральнай паліклінікі Алы Ляховіч, якія могуць спатрэбіцца кожнаму з нас.


— Ала Валянцінаўна, наколькі напружаная сітуацыя на сённяшні дзень і што трэба для таго, каб абараніцца па максімуме?

— У параўнанні з аналагічным перыядам мінулага года рост зваротаў з нагоды вірусных інфекцый у нашу паліклініку павысіўся на 15—20 %. Улічваючы, што зараз пандэмія, на першы план выходзяць не ВРВІ і ВРЗ, а каранавірусная інфекцыя. Яна небяспечная ўскладненнямі, больш цяжкім цячэннем. Менавіта таму неабходны масачны рэжым. Галоўнае — папярэдзіць распаўсюджванне. Чалавек можа быць ужо хворы, але першыя некалькі дзён непрыемных адчуванняў у яго няма, ён лічыць сябе здаровым і міжволі распаўсюджвае інфекцыю. Трэба гэта прадухіліць.

— Зараз у месенджарах пашырана інфармацыя, што пры пастаянным нашэнні маскі арганізму не стае кіслароду і кроў згушчаецца. Маўляў, гэтым чалавек наносіць сабе яшчэ большую шкоду.

— Асноўнае патрабаванне да нашэння маскі — гэта своечасовая яе замена. У кожнай маскі ёсць інструкцыя, дзе агаворваецца, на які тэрмін эксплуатацыі яна разлічана. Ён можа быць ад дзвюх да васьмі гадзін, рэспіратар наогул разлічаны на 12 гадзін нашэння. Насіць маску мэтазгодна ў месцах знаходжання вялікай колькасці людзей і абавязкова пры доглядзе хворага. А калі чалавек на вуліцы, на адкрытай прасторы, неабходнасці ў такой абароне няма. Праблемы ўзнікаюць, калі людзі парушаюць правілы нашэння маскі — не мяняюць яе своечасова, не звяртаюць увагі на тое, што яна становіцца вільготнай. Пры ўсім гэтым яна страчвае свае ўласцівасці. Нават пад дажджом, як толькі маска намокла, яе трэба зняць.

— А што рабіць, калі чалавек знаходзіцца на «бальнічным», яму трэба ісці на прыём, а ў яго трымаецца тэмпература?

— Калі ў чалавека назіраюцца сімптомы, звязаныя са стратай нюху і смаку, ёсць кашаль, тэмпература 38,5 і вышэй, аддышка, болі ў сэрцы, трэба заставацца дома і выклікаць урача з паліклінікі або, калі ўжо зусім дрэнна, хуткую дапамогу. Ні ў якім разе нельга займацца самалячэннем. Бывае, што людзі некалькі дзён чакаюць, што ўсё само пройдзе, і гэтым толькі пагаршаюць свой стан. Такіх пацыентаў лячыць складаней. Максімальна эфектыўнае лячэнне ў першыя трое сутак.

— А ў якім выпадку трэба прымаць антыбіётыкі?

— Тут усё індывідуальна. Ад каранавіруса лячэння няма. З агульнага можна парэкамендаваць частае цёплае піццё і аскарбінавую кіслату — 1000 міліграм у дзень. Калі тэмпература вышэй чым 38 градусаў, трэба прымаць парацэтамол ці ібупрафен, але толькі пры адсутнасці супрацьпаказанняў.

Нэлі ЗІГУЛЯ

Выбар рэдакцыі

Грамадства

Гатовы да разгортвання «чырвоных зон»

Гатовы да разгортвання «чырвоных зон»

Мінскі навукова-практычны цэнтр хірургіі, транспланталогіі і гематалогіі аказваў дапамогу пацыентам з COVІD-19.

Грамадства

Сталічная геаграфія: як выглядае Мінск на старадаўніх картах і планах

Сталічная геаграфія: як выглядае Мінск на старадаўніх картах і планах

Прадпрыемства «Белкартаграфія» выпусціла ўнікальнае крыніцазнаўчае выданне «Мінск на старадаўніх картах і планах».