Вы тут

Мадэль агенцтва «Тамара» Аляксандра Святоха: Цела — наш другі твар


Свет моды — рознабаковы і таямнічы. З вокладак часопісаў, подыумаў і рэкламных ролікаў на нас глядзяць прыгожыя дзяўчаты і юнакі з яркай або нестандартнай знешнасцю. Іх задача — прыцягнуць увагу мэтавай аўдыторыі або сфарміраваць прыемныя асацыяцыі з брэндам. А што ж на самай справе крыецца за гэтымі натхняльнымі кадрамі? Жаданне мадэлі працаваць над сабой, вучыцца і ўдасканальвацца. Арыгінальнае бачанне і ўменне фатографа карыстацца камерай. Майстэрскае валоданне сваёй справай візажыстаў, цырульнікаў і стылістаў. А на чале — мадэльнае агенцтва, якое каардынуе дзеянні паміж усімі неад'емнымі складнікамі гэтага займальнага, але такога працаёмкага працэсу.

Бліжэй пазнаёміцца з адной з крыніц прыгажосці і прафесіяналізму, акунуцца ў спецыфіку мадэльнай дзейнасці нам дапаможа Аляксандра Святоха — дзяўчына, якая ўжо больш за два гады адданая любімай справе.


— Вельмі ганаруся тым, што я — мадэль аднаго з найбуйнейшых і паспяховых у мадэльным бізнесе Беларусі агенцтваў. Захапляюся нашым дырэктарам — Тамарай Ганчаровай, якая з'яўляецца для мяне прыкладам для пераймання, узорам таленту і працавітасці. Нельга без захаплення назіраць за тым, як на рэпетыцыях перад паказамі яна заўсёды з бляскам у вачах асабіста дэманструе паходку, рухі і позы, якія мы павінны запомніць. Гэта матывуе і дапамагае настроіцца на пазітыўны лад, — не без усмешкі дзеліцца ўражаннямі Аляксандра.

Мадэлі агенцтва «Тамара» рэгулярна становяцца тварамі беларускіх марак, упрыгожваюць вокладкі часопісаў, удзельнічаюць у мерапрыемствах і паказах.

— Я заўсёды прымаю прапановы аб рабоце, якія паступаюць ад агенцтва. Гэта могуць быць фотасесіі, здымкі, паказы рознага ўзроўню, з дапамогай якіх многія айчынныя дызайнеры імкнуцца расказаць аб сваіх калекцыях, — тлумачыць Саша. — Самы важны паказ года — гэта BFW (Беларускі тыдзень моды). Я рада, што мне выдалася магчымасць стаць часткай мерапрыемства такога ўзроўню.

Каб трапіць на Тыдзень моды, мадэль павінна прайсці строгі кастынг: выклікаць прыемнае ўражанне ў дызайнера, які адбірае аблічча для сваёй калекцыі. І ў гэтым выпадку адной паходкі будзе недастаткова. На праглядзе трэба прадэманстраваць абаянне і харызму, раскрыць, у прамым сэнсе, свае найлепшыя бакі — папазіраваць. Без правільна падабраных поз нельга абысціся і на здымках. Усмешка вачыма, вобразы і ўспышкі камер — неад'емныя часткі працоўных будняў мадэлі.

— Нядаўна я прымала ўдзел у здымках праграмы «Дзень у вялікім горадзе» для тэлебачання, якая праходзіла ў дызайнерскай краме, — успамінае дзяўчына. — Над вобразамі працавала Таццяна Кейзерава — стыліст, заснавальніца і галоўны рэдактар анлайн-часопіса. Працаваць з ёй было адно задавальненне.

Дызайнерскія ўборы і брэндавы абутак — мара любога, хто імкнецца сачыць за модай і не ўпускаць навінак сезона. Але ці з'яўляецца модай толькі тое, што мы бачым на паказах або ў глянцавых часопісах? І што на сённяшні дзень больш выйгрышна: быць стыльным або модным? Гэтымі пытаннямі хоць бы раз у сваім жыцці задаваўся кожны з нас. Прытрымлівацца моды — гэта пераймаць тое, што мы бачым у фільмах, кліпах, часопісах. А апранацца стыльна — значыць, выкарыстоўваючы трэнд, выходзіць за яго рамкі, пазначаючы і робячы галоўнымі свае індывідуальнасць і імідж. Адным словам, сёння модна быць стыльным.

— Безумоўна, усё, што мы бачым у часопісах, па тэлевізары і на паказах, — актуальна і часткова стыльна. Але большасць маладых людзей глядзяць на мадэляў, якія прадстаўляюць моднае, дызайнерскае адзенне, і думаюць, што, падабраўшы падобны вобраз для сябе, будуць выглядаць таксама стыльна. Але, на жаль, так выходзіць не заўсёды. Не варта апранаць рэчы без разбору, у надзеі ўлавіць модныя веянні. Трэба ўмець адчуваць меру і мець густ. Бо кожны з нас індывідуальны, і што выдатна сядзіць на вас, можа выглядаць зусім недарэчна на іншым чалавеку. Хоць мне і самой часам хочацца надзець на сябе што-небудзь з серыі «прама з подыума» і прайсціся па горадзе. Але потым успамінаю, што я не на паказе! — са смехам кажа Саша.

Аляк­санд­ра з Та­ма­рай Ган­ча­ро­вай.

Некаторым здаецца, што работа мадэлі заключаецца толькі ў пазіраванні перад камерай і шпацырах у прыгожых строях на подыумах. Насамрэч не ўсё так проста. Самае цяжкае ў такім занятку — гэта змена вобразаў паміж мерапрыемствамі. Перад дэфіле або здымкамі мадэлям даводзіцца па некалькі гадзін сядзець на адным месцы, пакуль над імі працуюць стылісты і візажысты. Кастынгі могуць праводзіцца ў адзін дзень у розных пунктах горада, размешчаных на вялікай адлегласці адзін ад аднаго, і ўсюды трэба паспець. А часам даводзіцца здымацца ў экстрэмальных умовах, напрыклад у футры ў 30-градусную спёку або ў купальніку на снезе. Так што праца мадэлі — не заўсёды адна суцэльная весялосць.

Мадэлям, у тым ліку і plus-sіze, трэба заўсёды трымаць сябе ў добрай форме. Калі агенцтва наймае іх, у кантракце, як правіла, прапісваецца, што дзяўчаты і юнакі павінны прытрымлівацца сваіх цяперашніх параметраў. А для гэтага прыходзіцца трэніравацца і правільна харчавацца на рэгулярнай аснове, падтрымліваць здароўе скуры і прыгажосць валасоў. Таму маладыя людзі імкнуцца есці здаровую ежу і не забываць аб фізічных нагрузках. Гэта важна не толькі таму, што правільнае харчаванне дапамагае захаваць добрую фігуру, але і таму, што збалансаваны рацыён — залог добрага самаадчування. Без гэтага пры такім актыўным рытме жыцця проста ніяк. Хоць, вядома, часам парадаваць сябе прысмакамі можна.

— На мой погляд, самае складанае для многіх маладых людзей у гэтай рабоце — трымаць сябе ў тонусе і не даваць слабіны. Цела — наш другі твар. Часам даводзіцца дэманстраваць рэчы, якія падкрэсліваюць постаць. І калі мадэль любіць сваё цела і клапоціцца аб ім, то вобраз будзе выглядаць элегантна і вытанчана, — расказвае Аляксандра. — Я вось, напрыклад, да сваёй скуры стаўлюся вельмі адказна і педантычна. Старанна сачыць за ёй і падбіраць спецыяльны догляд — для мяне гэта як асобны від мастацтва. У ім няма крэмаў, а толькі гігіена. Усе мае сябры і знаёмыя ведаюць, што я не дазваляю дакранацца да твару рукамі. Мне вельмі не падабаецца, што некаторыя ўспрымаюць гэта як жарт і імкнуцца хоць бы пальцам правесці па ім. Я адразу ж бягу яго мыць! Мяне работа мадэлі не прыгнечвае, нягледзячы на дыеты, догляд за скурай і валасамі. Бо гэта адно задавальненне!

Яшчэ адным важным аспектам з'яўляецца псіхалагічная ўстойлівасць. Гэты бізнес — досыць спецыфічнае асяроддзе з канкурэнцыяй, стрэсамі і перажываннямі.

— Але міф пра варожасць і нядобразычлівасць у мадэльнай сферы даўно перастаў быць актуальны. Насамрэч мадэлі часта сябруюць, дзеляцца вопытам, інфармацыяй аб агенцтвах, дапамагаюць пачаткоўцам хутчэй асвоіцца ў прафесійным плане. На жаль, шалёны рытм жыцця звязаны з пастаянным стрэсам, і ён таксама з'яўляецца часткай паўсядзённай рэчаіснасці мадэлі. Але не варта забываць, што добры настрой, свежы выгляд дакладна перашкодзяць стрэсу захапіць вас у свой палон. Касметыка, СПА-салоны, фітнес — гэта добра, але здаровы сон, прагулкі на свежым паветры ніхто не адмяняў! Залог псіхалагічнага дабрабыту і спадарожнага яму поспеху, як банальна бы гэта ні гучала, — любіць тое, што робіце, і рабіць тое, што любіце. Я заўсёды іду на паказы з добрым настроем. Мне часам здаецца, што няма нічога і нікога, хто змог бы сапсаваць мне яго напярэдадні мерапрыемства! Тыя моманты перад выхадам на подыум хочацца перажываць зноў і зноў, — расказвае мадэль.

Высокага росту і адпаведных параметраў у гэтай сферы бывае недастаткова. Для работы мадэлям часта патрабуюцца выдатныя камунікатыўныя навыкі, абаянне, уменне пераконваць і здольнасць выразна адказваць на пастаўленыя пытанні. Плюсам таксама становіцца веданне замежных моў.

— Дзяўчаты, якія хочуць паспрабаваць сябе ў мадэльным бізнесе, калі ласка, вучыце іх. І нічога не бойцеся! Калі хочаце стаць мадэллю, дык імкніцеся да пастаўленай мэты і не адступайцеся ад сваёй мары пасля першай жа адмовы. А калі вы ўжо працуеце ў мадэльным бізнесе, то не хвалюйцеся і тым больш не ўспрымайце блізка да сэрца, калі работадавец адхіліў вашу кандыдатуру. Бо, каб падабраць падыходзячую мадэль, звяртаецца ўвага на спецыфічныя асаблівасці прадукцыі і густавыя перавагі мэтавай аўдыторыі — спажыўцоў гэтага тавару. Напрыклад, адбіраючы людзей для прэзентацыі актыватара для росту валасоў, не запросяць мадэль з кароткай стрыжкай, а для рэкламы аўтазагару — дзяўчат ці юнакоў са светлай скурай. Заставайцеся цярплівымі і ўпэўненымі ў сабе. У вас усё абавязкова атрымаецца!

Надзея Бобрык, студэнтка ІІІ курса факультэта міжкультурных камунікацый МДЛУ

Фота з архіва гераіні

Загаловак у газеце: Мода быць стыльным, ці любіць тое, што робіш, і рабіць тое, што любіш

Выбар рэдакцыі

Грамадства

Калі дапамога патрэбна экстранна, яе заўсёды змогуць аказаць валанцёры Чырвонага Крыжа

Калі дапамога патрэбна экстранна, яе заўсёды змогуць аказаць валанцёры Чырвонага Крыжа

Гучны гул сірэны знянацку застаў пенсіянерку Веру Васільеўну дома.

Грамадства

Хормайстр Ніна Ламановіч: Можна выходзіць замуж, калі жыццё жанчыны пасля гэтага палепшыцца

Хормайстр Ніна Ламановіч: Можна выходзіць замуж, калі жыццё жанчыны пасля гэтага палепшыцца

Галоўнаму хормайстру Вялікага тэатра 27 жніўня споўнілася 70 гадоў. 

У свеце

У «чорнай» зоне. Чаму Літву захліснула пандэмія?

У «чорнай» зоне. Чаму Літву захліснула пандэмія?

Уся Літва трапіла ў «чорную» зону заражэння каранавірусам. 

Грамадства

Страшнае слова «генацыд»

Страшнае слова «генацыд»

Для тых, хто прысвойвае сабе права быць «выключнымі», гэта рана ці позна становіцца катастрофай у маштабах народа.