ВІНШУЕМ! Мастаку Аляксандру БУЛАЮ — 50!

З карыкатурай Аляксандр БУЛАЙ пазнаёміўся яшчэ ў дзяцінстве. Бацькам на наваселле падарылі кнігу «Секреты молодой хозяйки», якая была багата праілюстравана арыгінальнымі і дасціпнымі малюнкамі. Яны так спадабаліся малому Сашу, што калі ён неўзабаве пайшоў у школу, то пачаў маляваць шаржы на аднакласнікаў і выпускаць разам з сябрамі рукапісную газету з паэтычнай назвай «Веселые кабаны». Далей – болей. Апошнія старонкі канспектаў Аляксандра, студэнта фізіка-матэматычнага факультэта Магілёўскага дзяржаўнага педагагічнага інстытута, былі шчодра аздоблены карыкатурамі ды шаржамі на аднакурснікаў. Гэтыя сшыткі хадзілі па руках і выклікалі шчыры смех гледачоў.
Першая карыкатура А. Булая была надрукавана ў 1993 годзе ў газеце «Знамя юности». А ўжо праз тры гады малады інжынер інстытута прыкладной оптыкі становіцца супрацоўнікам абласной газеты «Могилевская правда». З таго часу Аляксандр Пятровіч плённа шчыруе ў гэтым выданні і ўвогуле на ніве журналістыкі і карыкатуры. Яго вясёлыя, трапныя, лаканічныя малюнкі друкаваліся на старонках газет «Труд», «Пикник», «15 суток», «Автосалон», «Паляўнічы і рыбалоў» і, вядома, часопіса «Вожык».
Сардэчна віншуем юбіляра з 50-годдзем і зычым творчага і жыццёвага даўгалецця, поспехаў, усмешак!