Вы тут

Даеш мільён! Менавіта столькі сёлета будзе высаджана дрэў і кустоў


Адной з візітовак Беларусі лічыцца чысціня на сталічных праспектах і вуліцах райцэнтраў. Вядома, справа тут і ў менталітэце беларусаў, для якіх утульнасць, чысціня — элемент унутранай культуры. Пытанням навядзення парадку на зямлі надаюць вялікае значэнне і органы ўлады: ад мясцовай да цэнтральнай. З мэтай сістэматызацыі гэтай работы быў зацверджаны рэспубліканскі план мерапрыемстваў па навядзенні парадку на зямлі ў 2020 годзе. Як ён выконваецца, расказаў намеснік начальніка галоўнага ўпраўлення рэгулявання абыходжання з адходамі, біялагічнай і ландшафтнай разнастайнасці Максім ТАРАС.


— У Мінпрыроды сцякаецца ўся інфармацыя аб рабоце па навядзенні парадку на зямлі. Ці ёсць папярэднія вынікі бягучага года?

— Пакуль вядома, што за 11 месяцаў заданні рэспубліканскага плана выкананы практычна ў поўным аб'ёме за выключэннем адставання па некаторых работах, якія датычацца меліярацыйных сістэм у Віцебскай, Гомельскай, Мінскай абласцях.

— Рэспубліканскі план закранае літаральна ўсе сферы жыцця. Давайце спынімся на рэалізацыі тых мерапрыемстваў, якія бліжэй за ўсё па профілі да Мінпрыроды.

— Тады пачнём з такой актуальнай праблемы, як азеляненне тэрыторый агульнага карыстання. Гэта адна з вострых тэм, з якой гараджане звяртаюцца да нас у тым ліку па «гарачай лініі», на выязных прыёмах. На прыдамавых і іншых тэрыторыях населеных пунктаў за тыя ж 11 месяцаў высаджана дрэў і кустоў у 3-4 разы больш, чым прадугледжана планам. Гэтая работа заўсёды вядзецца ў комплексе. Папярэдне прыводзяцца ў парадак дзіцячыя пляцоўкі на прыдамавых тэрыторыях, устанаўліваюцца альбо рамантуюцца кантэйнерныя пляцоўкі. Напрыклад, устаноўлена і адрамантавана 32 626 кантэйнераў для збору адходаў пры плане 13 444, у тым ліку 17 003 — для паасобнага збору адходаў пры плане 8520. У гарадах вялікая праблема — газоны. З аднаго боку, людзі выступаюць за азеляненне, з іншага — вытоптваюць іх. За названы перыяд уладкавана, рэканструявана і адрамантавана 386,48 га газонаў, а запланавана было ўсяго толькі 176,45 га. Да пытанняў азелянення гарадскіх тэрыторый трэба падыходзіць прафесійна, таму ў нас зацверджаны схемы азелянення тэрыторый агульнага карыстання ўсіх раёнаў сталіцы, ідзе распрацоўка такіх схем для Гомеля, Магілёва і Бабруйска.

— У сельскай мясцовасці вядзецца барацьба з інвазійнымі раслінамі, у прыватнасці з баршчэўнікам Сасноўскага. Што можна сказаць па выніках гэтага сезона?

— Сёлета карыстальнікам зямельных участкаў накіравана больш за тысячу інфармацыйных лістоў, дзе нагадвалася аб захаванні тэхналогій і тэрмінах правядзення работ па ліквідацыі баршчэўніка. Да 1 лістапада яны праведзены на плошчы 9185,1 га (пры плане 7947,8 га). Патэнцыйна знішчана 709 месцаў росту баршчэўніка. Між тым працягвалася інвентарызацыя месцаў росту інвазійных раслін. З мая да верасня выяўлена 939 новых месцаў росту баршчэўніка. Трэба сказаць, што і не ўсе землекарыстальнікі своечасова прыступілі да ліквідацыі баршчэўніка — на іх складзена 290 пратаколаў, накладзена штрафных санкцый на суму 45,2 тысячы рублёў. Таксама важна, каб землі, вызваленыя з-пад інвазійных відаў раслін, адразу ж уключаліся ў гаспадарчы абарот, інакш праз год-два на тых жа ўчастках зноў давядзецца змагацца з баршчэўнікам.

— Чым больш цывілізаваныя зоны адпачынку на водных аб'ектах, тым чысцейшыя рэкі і азёры. Што робіцца ў гэтым кірунку?

— У поўнай меры выкананы і нават перавыкананы рэспубліканскі план па такіх аб'ектах. Прывяду прыклад па двух паказчыках: усталяваны 421 кантэйнер для збору адходаў пры плане 383 штукі, абсталявана 222 грамадскія прыбіральні пры плане 213.

— Максім Аляксандравіч, асабліва ахоўныя прыродныя тэрыторыі заўсёды ў поле зроку Мінпрыроды. Якія работы па іх добраўпарадкаванні вяліся сёлета?

— Перш за ўсё, устаноўлена 410 інфармацыйных знакаў, каб людзі выразна разумелі статус тэрыторыі. Уладкаваны існуючыя зоны і месцы адпачынку, турыстычныя стаянкі ў нацыянальных парках і заказніках: устаноўлены 132 малыя архітэктурныя формы, абсталявана 88 пляцовак для вогнішчаў, устаноўлена 38 кантэйнераў для збору адходаў, у тым ліку для паасобнага, арганізавана 26 аўтамабільных парковак. Усе гэтыя мерапрыемствы дазволяць выконваць наша залатое правіла, каб гаспадарчая дзейнасць не шкодзіла прыродзе.

— Да 2022 года запланавана вывесці з эксплуатацыі ўсе міні-палігоны. Наколькі менш іх стала сёлета?

— За адзінаццаць месяцаў рэкультывавана 239 выведзеных з эксплуатацыі міні-палігонаў (пры плане 213).

— У добраўпарадкаванні гарадоў і вёсак актыўна прымаюць удзел мясцовыя жыхары. А як ідуць справы ў садаводчых таварыствах, дзе людзі бываюць наездамі?

— У цэлым дастаткова добра. На лецішчах, у гаражных і іншых спажывецкіх кааператывах добраўпарадкавана 60 кантэйнерных пляцовак для збору адходаў пры плане 59, устаноўлена 95 кантэйнераў для збору адходаў пры плане 84. Асобна падкрэслю, што пры плане 27 у гаражных кааператывах устаноўлена 29 ёмістасцяў для збору і захоўвання адпрацаванага масла. Яны актыўна запаўняюцца, гэта значыць, што шкодныя рэчывы не трапляюць у глебу.

— Работнікі цэнтральнага апарату і тэрытарыяльных падраздзяленняў Мінпрыроды не толькі кантралявалі выкананне рэспубліканскага плана па профільных кірунках, але і шмат зрабілі для добраўпарадкавання краіны. Раскажыце пра гэта.

— Вось ужо тры гады Мінпрыроды вядзе глабальную экалагічную кампанію «Добраўпарадкуем малую радзіму», у рамках якой праходзяць і месячнікі па вясновай і восеньскай пасадцы дрэў і кустоў у населеных пунктах. Вынікі за адзінаццаць месяцаў даволі важкія: высаджана 361,5 тысячы дрэў і 405,075 тысячы кустоў.

На тэрыторыях сельскагаспадарчых аб'ектаў высаджана 20,303 тысячы дрэў, 1,898 тысячы кустоў і ўздоўж аўтамабільных дарог 52,512 тысячы дрэў і 4,953 тысячы кустоў. Сёлета, мяркую, пасля канчатковага падвядзення вынікаў, мы выйдзем на мільён штук насаджэнняў.

Асабліва падкрэслю, што менавіта прадстаўнікі Мінпрыроды гэтай вясной далі старт пасадак дрэў па ўсёй краіне. У Мінску работы пачаліся са сквера «Палянка». Там пасадзілі больш за 30 драбналістых ліп. Супрацоўнікі цэнтральнага апарату Мінпрыроды і Мінскага абласнога камітэта прыродных рэсурсаў і аховы навакольнага асяроддзя высадзілі 420 дрэў на ўчастку перасячэння аўтадарогі Р58 Мінск — Калачы — Мядзел і М-14. У Магілёве супрацоўнікі аблкамітэта высаджвалі дрэвы ў Пячэрскім лесапарку, які плануецца аб'явіць помнікам прыроды мясцовага значэння. Ні адна арганізацыя сістэмы Мінпрыроды не засталася ўбаку ад акцый па азеляненні.

Аксана ЯНОЎСКАЯ

Фота прэс-службы Мінпрыроды

Выбар рэдакцыі

Грамадства

Што трэба ведаць тым, хто адпачывае каля вадаёмаў

Што трэба ведаць тым, хто адпачывае каля вадаёмаў

Нават пры наяўнасці на пляжы ратавальнай станцыі не варта грэбаваць элементарнымі правіламі бяспекі. 

Экалогія

У Беларусі пабудуюць 30 рэгіянальных смеццеперапрацоўчых заводаў

У Беларусі пабудуюць 30 рэгіянальных смеццеперапрацоўчых заводаў

Агульная плошча звалак у Беларусі займае каля 4 тысяч гектараў.