Яна будзе не ніжэй 30 % ад прагнознага значэння сярэдняга заробку па краіне, які вызначае Прагноз сацыяльна-эканамічнага развіцця Беларусі на чарговы год. Ключавая роля пры назначэнні мінімальнай заработнай платы (МЗП) адводзіцца Нацыянальнаму савету па працоўных і сацыяльных пытаннях. Памер МЗП будзе штогод устанаўлівацца ўрадам па прапановах гэтага органа. Такія навацыі ў праект змянення законаў па пытаннях сацыяльных нарматываў і МЗП прынялі ў першым чытанні дэпутаты Палаты прадстаўнікоў на пасяджэнні сесіі.
«Падыходы да ўстанаўлення мінімальнай заработнай платы, якія прапаноўваюцца, накіраваны на павышэнне сацыяльнай абароны работнікаў і недапушчэнне зніжэння дасягнутага мінімальнага дзяржаўнага сацыяльнага стандарту ў галіне аплаты працы», — сказала міністр працы і сацыяльнай абароны Ірына Касцевіч, прадстаўляючы закон.
Алег Семянчук, намеснік старшыні Пастаяннай камісіі па працы і сацыяльных пытаннях адзначыў, што зараз МЗП разлічваецца з улікам мінімальнага спажывецкага бюджэту, прапаноў прафсаюзаў, інфляцыі і іншых паказчыкаў. «Цяпер яе памер будзе дакладна ўстаноўлены не ніжэй за 30 працэнтаў. Калі эканамічны стан нашых прадпрыемстваў дазваляе больш, то будзе больш», — падкрэсліў парламентарый.
Праектам змянення законаў прадугледжваецца адмена мінімальнага спажывецкага бюджэту. Гэта дазволіць пазбегнуць блытаніны паміж паняццямі бюджэт пражытачнага мінімума (БПМ) і мінімальны спажывецкі бюджэт (МСБ).
«На практыцы для вырашэння пастаўленых задач сацыяльнай палітыкі прымяняецца ў асноўным бюджэт пражытачнага мінімума. Мінімальны спажывецкі бюджэт выступае як крытэрый устанаўлення мінімальнай заработнай платы, прадастаўлення ільготных крэдытаў для будаўніцтва жылля і ў рамках устанаўлення заработнай платы работнікаў апарата кіравання юрыдычных асоб, якія не забяспечваюць своечасовае вяртанне крэдытаў», — расказала Ірына Касцевіч і дадала, што адмена МСБ не выклікае сур’ёзных змен у заканадаўстве.
Выплаты і іншыя дапамогі будуць устанаўліваць прапарцыянальна памеру бюджэту пражытачнага мінімума.
«Такі падыход апраўданы і па той прычыне, што бюджэт пражытачнага мінімума вызначаны як крытэрый аднясення грамадзян да малазабяспечаных. Прымаючы да ўвагі, што ён разлічваецца па розных сацыяльна-дэмаграфічных групах, гэта дазволіць пры рэалізацыі дзяржаўнай падтрымкі максімальна ўлічваць прынцып адраснасці», — паведаміла міністр.
Па словах Ірыны Касцевіч, законам плануецца таксама змяніць тэрмін перагляду бюджэту пражытачнага мінімума з 5 гадоў да 3.
Дарэчы, з пераліку сацыяльна-дэмаграфічных груп для разліку БПМ выключаць студэнтаў. Умоўны студэнцкі ўзрост уваходзіць у працаздольны і іх даходы не абмяжоўваюцца выключна стыпендыямі.
Яшчэ адзін закон у сацыяльнай сферы, які разгледзелі дэпутаты на чарговым пасяджэнні, тычыўся ўзносаў у бюджэт дзяржаўнага пазабюджэтнага фонду сацыяльнай абароны насельніцтва. Па словах Валерыя Стральчонка, члена Пастаяннай камісіі па працы і сацыяльных пытаннях галіну рэгулююць шмат нарматыўна-прававых актаў і неабходна была іх сістэматызацыя.
«Сярод новаўвядзенняў — выкарыстанне аўтаматызаванай інфармацыйнай сістэмы выканання грашовых абавязкаў як плацельшчыкамі ўзносаў, так і органамі фонду для спагнання ўзносаў», — сказаў дэпутат.
Уводзяцца новыя катэгорыі плацельшчыкаў — арганізацыі, што забяспечваюць салдат тэрміновай службы, самазанятыя грамадзяне.
Да тых, хто працуе, таксама будуць адносіцца асобы, якія знаходзяцца ў лячэбна-працоўных прафілакторыях, месцах пазбаўлення свабоды, калі яны выконваюць аплачваемую працу.
У другім чытанні Палата прадстаўнікоў прыняла змены ў закон па пытаннях гаспадарчых таварыстваў. Член Пастаяннай камісіі Палаты прадстаўнікоў па эканамічнай палітыцы Анатоль НАСЕНЯ канстатаваў, што праект дакумента — кшталту Канстытуцыі для бізнесу краіны. Праект накіраваны на спрашчэнне прыцягнення інвестыцый у прыватнае таварыства і ў эканоміку краіны ў цэлым. Законапраектам павышаецца празрыстасць дзейнасці ААТ — яны павінны абавязкова раскрыць звесткі са стратэгіі развіцця і іншых планавых дакументах у СМІ і інтэрнэце. Мяркуецца, што гэта станоўча паўплывае на цікаўнасць інвестараў да такіх прадпрыемстваў.
Змены, якія прапануюцца законам, закрануць фінансавае аздараўленне гаспадарчых таварыстваў: у статут таварыства магчыма будзе ўнесці маёмасць, якая не павялічыць устаўны фонд, даецца магчымасць разлічвацца з пазыкамі шляхам выпуску акцый ці паяў.
«Дадзеныя новаўвядзенні будуць запатрабаваны гаспадарчымі таварыствамі, якія маюць фінансавыя цяжкасці на бягучым этапе, але пры гэтым маюць перспектывы развіцця і, самае галоўнае, у выжыванні якіх зацікаўлены заснавальнікі і крэдыторы», — заявіў парламентарый.
Абноўлены закон дасць магчымасць праводзіць пасяджэнні акцыянераў і наглядальных саветаў таварыстваў дыстанцыйна.
(Будзе дапоўнена)
Марыя ДАДАЛКА
Фота БелТА
А разам з імі навучанне, сацпакет і нават жыллё.
Беларусь — адзін з сусветных лідараў у галіне здабычы і глыбокай перапрацоўкі торфу.
«Мы зацікаўлены, каб да нас прыязджалі».