Вы тут

Гродзенская вобласць стала другім у краіне рэгіёнам, куды прыйшоў «Мабільны паштальён»


Сацыяльны праект «Белпошта» распачала год таму. Яго сутнасць у тым, каб забяспечыць паштальёнаў спецыяльна распрацаванымі мабільнымі прыладамі. Першымі ў рэгіёне іх пачалі асвойваць лідчане. У раёне ўсе паштальёны забяспечаны апаратам, які з дапамогай дадатка дазваляе ў рэжыме анлайн ажыццяўляць прыём усіх плацяжоў і паслуг, што прапаноўваюцца на аб'екце паштовай сувязі.


Першымі апрабавалі новаўвядзенне кіроўцы-паштальёны. Водгукі аб рабоце станоўчыя — працаваць зручней і прасцей, чым з бланкамі і папяровай справаздачнай дакументацыяй. Такі вердыкт вынеслі ў Лідскім рэгіянальным вузле паштовай сувязі. Па словах начальніка РВПС Яўгена Серпука, «мабільнага паштальёна» асабліва ацанілі там, дзе няма паштовых аддзяленняў і банкаў. Гэта аддаленыя вёскі, дзе, бывае, пражывае і да некалькіх дзясяткаў жыхароў.

— У паштальёна на руках прылада, якая дазваляе аказаць поўны пералік тых паслуг, што кліент можа атрымаць на аб'екце паштовай сувязі. У тым ліку прыём падпіскі, выдачу пенсіі, прыём і выплату пераводаў, прыём і выдачу паштовых адпраўленняў, рэалізацыю тавараў штодзённага попыту на даставачным участку паштальёна, — зазначыў Яўген Сярпук.

На базе аперацыйнай сістэмы Androіd устаноўлены спецыяльны дадатак, які дазваляе праводзіць усе неабходныя маніпуляцыі. Праграму нельга прыстасаваць для звычайнага смартфона, а толькі пад пэўны апарат для службовага карыстання.

У Гродзенскім філіяле РУП «Белпошта» паведамілі, што на эксперымент у Лідскі раён накіравана 88 апаратаў, якімі забяспечаны ўсе паштальёны вузла. Дыяпазон абслугоўвання даволі значны. Сюды ўваходзіць Лідскі, Воранаўскі, Іўеўскі і Дзятлаўскі раёны.

Па словах дырэктара Гродзенскага філіяла Андрэя Анісімава, «мабільны паштальён» добра зарэкамендаваў сябе ва ўсх відах паслуг. Ёсць магчымасць разлічвацца як наяўнымі сродкамі, так і праз банкаўскія пластыкавыя карткі. Пры аказанні паслугі апарат выдае чэк, які кліент атрымлівае пры любых разліках. Да таго ж усе аперацыі праходзяць у рэжыме анлайн.

Пасля таго, як першымі ў гэты працэс уключыліся кіроўцы-паштальёны, гэтая мабільная прылада распаўсюджана сярод усіх паштальёнаў.

Зараз на Лідскім раённым вузле завяршаецца навучанне супрацоўнікаў і ўкараненне апошніх адзінак «мабільнага паштальёна». У асноўным усе апараты на руках, і паштальёны імі з задавальненнем карыстаюцца. Засвоіць яго нескладана, а вось плюсоў у рабоце ён дадае нямала, паведамілі ў Лідзе. Раней квітанцыі на такія паслугі даводзілася выпісваць ад рукі. На кожную аперацыю — асобная квітанцыя. Паштальёну ў канцы працоўнага дня такую справаздачу трэба было аформіць у аддзяленні сувязі. Зараз усе паслугі праводзяцца праз мабільную прыладу з касавым апаратам і тэрміналам для аплаты банкаўскай карткай. Некалькі «клікаў» — і кліент атрымлівае звычайны чэк. Усе аперацыі праводзяцца ў рэжыме анлайн і адразу паступаюць у базу даных «Белпошты», а грошы, якія прыняты ад кліента, — на разлік. Зручна, бо абслугоўванне хуткае.

Лідскі раён невыпадкова стаў першым у новаўвядзенні. Гэта адбылося таму, што Ліда ўвайшла ў спіс гарадоў з паскораным развіццём. Як бачым, у гэты працэс актыўна ўключыўся і паштовы сэрвіс.

— Гродзенская вобласць — другі рэгіён эксперыментальнага праекта. Год таму пілотны праект быў запушчаны ў Аршанскім раёне. Па словах нашых калег, паслуга хутка прыжылася. Практыка паказала, што эксперымент сябе поўнасцю апраўдаў, хоць укараняўся паступова і меў абмежаваны комплекс паслуг, — патлумачыў Андрэй Анісімаў.

Не ўсе паслугі паштовай сувязі напачатку былі даступны для кліента. На першым этапе з дапамогай «мабільнага паштальёна» афармлялася падпіска, можна было здзейсніць камунальныя плацяжы ў сістэме АРІП (Адзінай разліковай інфармацыйнай прасторы). Праз некаторы час дабавілася магчымасць пакупкі тавараў і адпраўкі паштовых адпраўленняў. Трэці этап дазволіў афармляць унутраныя і міжнародныя паштовыя пераводы, прыём і выплату паштовых грашовых пераводаў, выплату пенсій. Гродзенцы ўключыліся ў праект адразу з усімі гэтымі функцыямі.

Зараз у структуры «Белпошты» больш за тры тысячы аддзяленняў сувязі, асноўная колькасць знаходзіцца ў сельскай мясцовасці. Паштальёна ў вёсках чакаюць. Калі раней функцыі яго былі абмежаваны — прынесці паштовыя адпраўленні, выпісаць газету ці часопіс, прынесці пенсію, — то цяпер колькасць паслуг значна пашырылася. Вяскоўцы з задавальненнем карыстаюцца новай паслугай. Сярод папулярных — папаўненне балансу мабільнай сувязі, аплата камунальных паслуг. Зараз вядзецца падпіска перыядычных выданняў. У сувязі з гэтым паштальёны робяць падамавы і пакватэрны абход. Такім чынам, жыхарам не трэба нават выходзіць на вуліцу, каб выпісаць газету або часопіс.

Маргарыта УШКЕВІЧ

Фота дадзена Гродзенскім філіялам РУП «Белпошта»

Загаловак у газеце: Службовы гаджэт напагатове

Выбар рэдакцыі

Грамадства

Калі дапамога патрэбна экстранна, яе заўсёды змогуць аказаць валанцёры Чырвонага Крыжа

Калі дапамога патрэбна экстранна, яе заўсёды змогуць аказаць валанцёры Чырвонага Крыжа

Гучны гул сірэны знянацку застаў пенсіянерку Веру Васільеўну дома.

Грамадства

Хормайстр Ніна Ламановіч: Можна выходзіць замуж, калі жыццё жанчыны пасля гэтага палепшыцца

Хормайстр Ніна Ламановіч: Можна выходзіць замуж, калі жыццё жанчыны пасля гэтага палепшыцца

Галоўнаму хормайстру Вялікага тэатра 27 жніўня споўнілася 70 гадоў. 

У свеце

У «чорнай» зоне. Чаму Літву захліснула пандэмія?

У «чорнай» зоне. Чаму Літву захліснула пандэмія?

Уся Літва трапіла ў «чорную» зону заражэння каранавірусам. 

Грамадства

Страшнае слова «генацыд»

Страшнае слова «генацыд»

Для тых, хто прысвойвае сабе права быць «выключнымі», гэта рана ці позна становіцца катастрофай у маштабах народа.