У Беларусі выдадзена рэгістрацыйнае пасведчанне на расійскую вакцыну «Спадарожнік V», а вакцынацыя беларусаў пачнецца ўжо ў студзені будучага года. Пра гэта расказаў міністр аховы здароўя Дзмітрый Піневіч.
Міністэрства аховы здароўя Беларусі выдала рэгістрацыйнае пасведчанне на вакцыну «Спадарожнік V». Вакцына распрацавана і выраблена Нацыянальным даследчым цэнтрам эпідэміялогіі і мікрабіялогіі імя М. Ф. Гамалеі Расіі.
Як адзначыў Дзмітрый Піневіч, па дамоўленасці двух прэзідэнтаў Беларусь стала першай краінай, якая прыняла ўдзел у клінічных выпрабаваннях вакцыны «Спадарожнік V».
— Мы можам афіцыйна заявіць, што па наяўных на сёння даных, вакцына бяспечная і эфектыўная, сур'ёзных або непрадбачаных пабочных эфектаў выяўлена не было, — сказаў ён.
Па выніках працэдуры дзяржаўнай рэгістрацыі Міністэрства аховы здароўя выдала рэгістрацыйнае пасведчанне, пасля чаго вакцына «Спадарожнік V» можа быць дапушчана да рэалізацыі і медыцынскага ўжывання на тэрыторыі Беларусі.
Рэгістрацыйнае дасье вакцыны «Спадарожнік V» («Гам-Кавід-Вак») было пададзена ў Цэнтр экспертыз і выпрабаванняў у ахове здароўя на працэдуру ўмоўнай дзяржаўнай рэгістрацыі ў лістападзе 2020 года. Для ўсебаковай ацэнкі матэрыялаў рэгістрацыйнага дасье была створана экспертная група, у якую разам з экспертамі Цэнтра экспертыз уключаны вядучыя інфекцыяністы краіны і супрацоўнікі рэспубліканскіх навукова-практычных цэнтраў. Былі прааналізаваны матэрыялы, якія датычацца даклінічнага вывучэння вакцыны. Устаноўлена, што вакцына «Спадарожнік V» прайшла ў поўным аб'ёме ўсе этапы даклінічных выпрабаванняў па эфектыўнасці і бяспецы.
— Вакцына зарэгістраваная ў краіне, дадзены дазвол на клінічнае прымяненне, — адзначыў Дзмітрый Піневіч. — Вакцына можа прымяняцца на тэрыторыі нашай краіны ўжо ў рамках не клінічных выпрабаванняў, а звычайнай работы. Цяпер на парадку дня пытанні далейшай пастаўкі.
Як адзначылі ў прэс-службе Міністэрства аховы здароўя, у клінічнае выпрабаванне вакцыны на тэрыторыі Беларусі былі ўключаны 100 удзельнікаў. Іх выпадковым чынам падзялілі на групы: першая атрымала вакцыну, а другая — плацэба. Вакцынацыя ўключала ўвядзенне двух кампанентаў вакцыны з інтэрвалам у 21 дзень. У добраахвотнікаў ацэньваецца фарміраванне гумаральнага (выпрацоўка антыцел) і клеткавага імуннага адказу на вакцынацыю.
У Беларусі па стане на 9 снежня ўсе 100 удзельнікаў даследавання трэцяй фазы атрымалі першы кампанент вакцыны, а другі кампанент — толькі 98, бо ў двух пацыентаў перад увядзеннем другой дозы падчас абавязковага тэсціравання была выяўлена каранавірусная інфекцыя.
— Другую прышчэпку атрымалі 98 чалавек, двое паміж першым і другім увядзеннем кантактавалі з заражаным чалавекам і перахварэлі, таму другая фаза прышчэпкі ім не была праведзена», — растлумачыў Дзмітрый Піневіч.
Назіранне за ўдзельнікамі даследавання будзе весціся на працягу 180 дзён (6 месяцаў), пасля чаго будзе падрыхтавана фінальная справаздача.
Разам з тым, як адзначылі ў прэс-службе, у вакцынаваных людзей выпрацоўваецца ўстойлівы і гумаральны, і клеткавы імунны адказ. Прынята рашэнне, што вакцынацыя беларусаў ад каранавіруса расійскай вакцынай «Спадарожнік V» пачнецца ў студзені.
На першым этапе вакцынаваць будуць медыкаў, настаўнікаў, работнікаў гандлю і іншых сфер, якія вымушаны кантактаваць з вялікай колькасцю людзей. Вакцыну яны атрымаюць бясплатна. Па словах міністра, на першым этапе плануецца вакцынаваць 200 тысяч чалавек з далейшым ахопам у два мільёны.
Алена КРАВЕЦ
Прэв’ю: perm.aif.ru
Інтэрв'ю з алімпійскім чэмпіёнам па фехтаванні.
Прафесійна, аператыўна, па-добраму.
