Вы тут

Куды ляціць «Страла»? Расказваем пра славутае спецпадраздзяленне


Дзейнасць гэтага спецыяльнага падраздзялення недасведчаны чалавек заўважае рэдка. Часцей за ўсё экіпажы ДАІ мы бачым, калі яны разбіраюць дарожна-транспартнае здарэнне або патрулююць вуліцы. З гэтай задачай выязджаюць і экіпажы спецпадраздзялення дарожна-патрульнай службы «Страла» Міністэрства ўнутраных спраў. Але робяць гэта толькі ў той час, калі яны не занятыя сваімі асноўнымі абавязкамі.


Галоўная задача «Стралы» — суправаджэнне і эскартаванне найвышэйшых службовых асоб нашай краіны і кіраўнікоў дэлегацый замежных дзяржаў, калі гэта рэгламентавана дыпламатычным пратаколам. Якраз падчас праезду картэжаў мы і бачым яе ў дзейнасці. Задача работы спецпадраздзялення некалі была вынесена і ў яго назву. Назва ж «Страла» з'явілася толькі ў нулявых гадах, адначасова з сімволікай — сіне-белым ромбам са стралой унутры. Атрымаўся цікавы сімбіёз — як вядома, стрэлы ляцяць вельмі хутка, а колеравая гама мае адсылку да Дзяржаўтаінспекцыі.

— Перадгісторыя «Стралы» мае свае карані яшчэ за савецкім часам, — згадвае начальнік спецпадраздзялення падпалкоўнік міліцыі Сяргей Дземчанка. — Мінск тады таксама наведвалі высокія госці з іншых краін — як капіталістычнага, так і сацыялістычнага лагера. Прыязджалі сюды і прадстаўнікі высокіх дзяржаўных пасад з Масквы. Адпаведна, была пастаўлена задача належным чынам забяспечыць урачыстую сустрэчу гасцей з рангам і праводзіць іх назад. Дзеля гэтага ў рэспубліканскай Дзяржаўтаінспекцыі быў створаны спецыяльны ўзвод матацыклістаў. У сваю чаргу, ДАІ горада мела ў сваім складзе групу суправаджэння, якая перамяшчалася на аўтамабілях, як бы цяпер сказалі, элітнага класа. Вось так з двух кампанентаў і збіраўся парадны картэж. Гісторыя ж «Стралы» ў яе сучасным выглядзе адлічваецца ад 27 лютага 1993 года. Менавіта ў гэты дзень тагачасны міністр унутраных спраў Уладзімір Ягораў падпісаў загад аб стварэнні адмысловага падраздзялення.

— Акрамя асноўнай функцыі, у чым яшчэ адметнасць «Стралы»?

— Мы працуем не па прынцыпе тэрытарыяльнасці, а па ўсёй краіне. Камандзіровак у нашых экіпажаў вельмі шмат. Аказваем практычную дапамогу абласным ДАІ, дзе сітуацыя на дарогах можа быць складаная. Таксама «Страла» можа суправаджаць каштоўныя грузы.

— Ці ёсць нейкія асаблівыя патрабаванні да супрацоўніка «Стралы»?

— Перш за ўсё ён павінен мець вышэйшую юрыдычную адукацыю. У сістэме Дзяржаўтаінспекцыі працоўны стаж мусіць складаць не менш за пяць гадоў, каб дасканала ведаць усе асаблівасці службы. Справа ў тым, што на «Стралу» ўскладзена таксама функцыя каардынацыі работы падраздзяленняў ДАІ. І, канешне ж, адпавядаць нашым спецыяльным патрабаванням. Адбор патэнцыйных кандыдатаў вядзецца не толькі па стане здароўя, але і па псіхалагічных якасцях. Менавіта гэты этап і з'яўляецца вырашальным падчас адбору супрацоўнікаў ДАІ, якія пажадалі служыць у нашым падраздзяленні. Напрыклад, на матацыкле можа ездзіць кожны. Але далёка не кожны здольны ехаць увесь час на аднолькава зададзенай хуткасці на адлегласці адзін ад аднаго. А так да дасведчаных супрацоўнікаў ДАІ мы прыглядаемся ўвесь час, асабліва да тых, хто добра зарэкамендаваў сябе ў прафесійных конкурсах. Калі ў «Страле» з'яўляецца вакантнае месца, то кола магчымых прэтэндэнтаў ужо збольшага акрэслена. Канешне, калі да нас прыйдзе афіцэр і скажа, што хоча служыць у «Страле», то пры паспяховым праходжанні адбору ніякіх перашкод для гэтага не будзе.

— Але эфектыўнасць работы залежыць не толькі ад асабовага складу, але яшчэ і ад тэхнікі.

— Наш аўтапарк абнаўляецца ў планавым рэжыме. Напрыклад, для эскартавання выкарыстоўваюцца матацыклы Yamaha, зробленыя па адмысловым заказе. Іх «фірменнае» адрозненне — белы колер. Таксама ёсць у нас матацыклы BMW. А вось што да аўтатэхнікі службы суправаджэння, то мы выкарыстоўваем як BMW, так і «седаны» Geely SE. Шэсць аўтамабіляў беларускай вытворчасці мы атрымалі мінулай вясной. І дарэчы, зарэкамендавалі яны сябе добра. «Мерседэсы» E-класа мы звычайна выкарыстоўваем для патрульнага рэжыму. А вось аўтамабілі маркі Chrysler ужо пакрысе выходзяць з эксплуатацыі. Хоць і дагэтуль у страі застаюцца машыны, выпушчаныя дзесяць і нават 14 гадоў таму. Справа ў тым, што яны яшчэ не вырабілі ўстаноўлены ліміт прабегу. Ён у нас рэгламентаваны вельмі жорстка. Як толькі гэты рубеж перасякаецца, машыну перадаюць у іншую службу.

Увесь наш спецыялізаваны транспарт знаходзіцца, абслугоўваецца і рамантуецца ў аўтамабільнай гаспадарцы Міністэрства ўнутраных спраў. Яна знаходзіцца побач з тым будынкам, дзе размяшчаецца «Страла».

— А ці зберагаецца тэхніка, напрыклад, у спецыяльным музеі?

— Пасля рэканструкцыі будынка, у якім мы знаходзімся, з'явіцца спецыяльны музей ДАІ. Будуць у ім і экспанаты, якія маюць дачыненне да «Стралы». Таксама пад шкло вітрыны трапяць загады, асабістыя рэчы супрацоўнікаў. Можна будзе пабачыць і сёе-тое з тэхнікі. Напрыклад, міліцыянеры захоўваюць матацыкл «Урал». Ён выкарыстоўваўся для эскартавання ў 80-я гады. Увогуле, «Уралы» да нас прыходзілі і ў 90-я. Пасля, калі змяніліся задачы, іх замясціла нямецкая тэхніка.

— Раскажыце, калі ласка, колькі слоў пра трэніроўкі асабовага складу.

— Яны праводзяцца пастаянна, каб быць увесь час у баявой форме. А вось сутнасць практыкаванняў залежыць ад канкрэтнай службы. Іх у «Страле» ўсяго пяць — аператыўна-дзяжурная, эскартавання, суправаджэння, спецыяльных мерапрыемстваў і інфармацыйна-аналітычнай работы ды матэрыяльна-тэхнічнага забеспячэння. Напрыклад, служба суправаджэння адточвае свае навыкі на звычайных дарогах. Яны мусяць дзейнічаць правільна ў розных сітуацыях, у тым ліку і надзвычайных. Матацыклісты службы эскартавання выконваюць прыёмы ваджэння як у камандзе, так і паасобку. Напрыклад, на трасе выстаўляюцца спецыяльныя фішкі. Іх кожны матацыкліст мусіць аб'ехаць і не закрануць ніводную, прычым зрабіць гэта на хуткасці. А гэта практыкаванне вельмі няпростае. Спачатку матацыклісты ездзяць па адным, пасля парамі, тройкамі і ў складзе групы. І толькі калі на праезнай частцы ўсе неабходныя навыкі замацаваны, адбудзецца сумесны выезд і трэніроўка матацыклістаў разам з машынамі суправаджэння. Вось так за знешне прыгожай карцінкай, якую шмат хто хоць раз бачыў ужывую, стаяць сотні гадзін напружанай, сканцэнтраванай работы.

Каманда спецыяльнага падраздзялення «Страла» неаднаразова ўдзельнічала ў рэспубліканскіх аглядах-конкурсах прафесійнага майстэрства, якія праводзіліся сярод супрацоўнікаў дарожна-патрульнай службы. Увесь час яна займала і займае прызавыя месцы. А гэта лепш за ўсё сведчыць пра ўзровень падрыхтоўкі спецыялістаў.

Валяр'ян ШКЛЕННІК

Фота аўтара і спецпадраздзялення «Страла»

Выбар рэдакцыі

Грамадства

Дыета ад хандры. Што жаваць, каб не перажываць

Дыета ад хандры. Што жаваць, каб не перажываць

«Сумныя» прадукты — прэч з халадзільніка!

Грамадства

«Сталінскі праспект мы называлі брадвеем». Як і чым жылі беларускія стылягі

«Сталінскі праспект мы называлі брадвеем». Як і чым жылі беларускія стылягі

Пасля смерці Сталіна «жалезная заслона», якая аддзяляла Савецкі Саюз ад навакольнага свету, прыадчынілася.

Калейдаскоп

Усходні гараскоп на наступны тыдзень

Усходні гараскоп на наступны тыдзень

АВЕН. Неабходна будзе сканцэнтраваць намаганні на рабоце.

Грамадства

Прынцып Інэсы Караткевіч: цаніць кожную хвіліну

Прынцып Інэсы Караткевіч: цаніць кожную хвіліну

«Ні разу не пашкадавала, што прыйшла працаваць у такую ўнікальную структуру, як спажыўкааперацыя»