Новы год — свята, якое надыходзіць, нягледзячы ні на што, і цудаў ад яго чакаюць і дарослыя, і дзеці. Стварыць святочны настрой для жыхароў Ашмянскага раёна не перашкодзіла ні пандэмія, ні надвор’е — работнікі культуры стараліся, як маглі.
Работнікі аддзела культуры і вольнага часу аграгарадка Кракоўка зладзілі забавы для дзетак і іх бацькоў на плошчы ля святочнай ёлкі. Весяліць малечу ім дапамагалі Дзед Мароз са Снягуркай, мышкі Анфіска з Ларыскай і героі з мульціка «Шчанячы патруль». Праз карагоды, гульні, песні і танцы яны стварылі атмасферу казкі і падарылі гасцям не толькі добры настрой, але і прыемныя сюрпрызы, якія будуць доўга нагадваць пра свята.
У аграгарадку Кальчуны супрацоўнікі мясцовага аддзела культуры і вольнага часу разам з работнікамі сельскай бібліятэкі запрасілі ўсіх ад малога да вялікага на сямейныя вячоркі «Сямейнае свята — Раство». Бабулі і дзядулі, мамы і таты, дзяўчынкі і хлопчыкі паслухалі гісторыю нараджэння Ісуса Хрыста і пабывалі на выставе літаратуры «У чаканні Каляднага цуда». Ксёндз Ян касцёла імя Святога архангела Міхаіла павіншаваў усіх прысутных са святамі і падрабязна расказаў, як трэба сустракаць Раство ў кожнай сям’і. А яшчэ ўдзельнікі мерапрыемства паглядзелі фільм «Дзецям пра Раство».
Калядны гурт сельскага клуба аграгарадка Станцыя Ашмяны на каталіцкае Раство выправіўся на калядаванне, як гэта рабілі даўней, з казой, каляднай зоркай ды песнямі. Улічваючы няпростую эпідэміялагічную сітуацыю, калядоўшчыкі заходзілі толькі на падворкі. З песняй «Каляда ідзе, Каляду вядзе. Гэй, Каляда, Калядзіца» яны віталі аднасяльчан. А прасілі ні многа, ні мала: «кусочак сала, каб Каза скакала, ды кілішак маку, да таго прысмак». Гаспадарам жадалі «шчасця ды згоды», «каб вяліся цыпляткі, уцяткі ды парасяткі», «колькі ў лесе пянькоў — гэтулькі і светлых дзянькоў». А потым дзякавалі за прысмакі і ішлі далей, праслаўляючы Каляду…
На свята ў раённы цэнтр культуры ў Ашмянах завітаў сам Нептун, каб дзеці даведаліся, як сустракаюць навагоднія святы падводныя жыхара. Аднак, на жаль, марскі ўладар згубіў святочны настрой, таму дзеці разам з Медузай і Зоркай выправіліся на яго пошукі і… вядома знайшлі. А колькі пры гэтым падводных прыгод здарылася — на ўвесь год хопіць!
Ірына СІДАРОК
А разам з імі навучанне, сацпакет і нават жыллё.
Беларусь — адзін з сусветных лідараў у галіне здабычы і глыбокай перапрацоўкі торфу.
«Мы зацікаўлены, каб да нас прыязджалі».
