Вы тут

Ёсць што прапанаваць адзін аднаму


Ужо другі раз за некалькі апошніх тыдняў Палац Незалежнасці сустракаў новых замежных паслоў.


Прэзідэнт Беларусі Аляксандр Лукашэнка і пасол КНР Се Сяоюн. Фота БЕЛТА

Цырымонія ўручэння даверчых грамат мае асаблівы дыпламатычны і палітычны сімвалізм — гэта пацвярджэнне гатоўнасці замежных дзяржаў да плённага і эфектыўнага ўзаемадзеяння па самых розных пытаннях з кіраўніцтвам краіны знаходжання сваіх упаўнаважаных прадстаўнікоў. На гэты раз удзельнікамі ўрачыстага мерапрыемства сталі паслы Кітая, Ізраіля, Бангладэш, Камбоджы, Мальтыйскага ордэна, Намібіі і Пакістана. Па вялікім рахунку, у іх асобе Аляксандр Лукашэнка на гэты раз звярнуўся да ўсёй сусветнай супольнасці:

— Наша краіна вельмі зацікаўленая ў неканфліктным і эфектыўным супрацоўніцтве з іншымі краінамі. Пры гэтым мы, безумоўна, выключаем любы палітычны і эканамічны ціск. У дыялогу з партнёрамі Беларусь прытрымліваецца прынцыпаў адкрытасці, прыстойнасці і раўнапраўя.

Па прыбыцці ў новую краіну прызначэння любы дыпламат перш за ўсё ўнікае ў асаблівасці бягучага моманту. Яго можна ацэньваць па-рознаму, але Аляксандр Лукашэнка робіць акцэнт на галоўным:

— Беларусы, як гэта заўсёды бывала ў мінулым, даказалі сваю здольнасць адстаяць суверэнітэт краіны, традыцыйныя каштоўнасці і тэрытарыяльную цэласнасць. Неаднаразова заяўляў і яшчэ раз паўтару, што толькі наш народ мае права вырашаць, як будзе развівацца ў будучыні беларуская дзяржава.

Грамадзяне краіны маюць права самі вызначаць свой лёс і будучыню сваёй дзяржавы, лічыць Прэзідэнт.

— Нам важна, каб было пачутае меркаванне кожнага. Усе канструктыўныя прапановы будуць уключаны ў парадак Усебеларускага народнага сходу, — сказаў Аляксандр Лукашэнка.

Так, няпростая гісторыя Беларусі, яе цяперашняе геапалітычнае становішча і структура эканомікі дыктуюць неабходнасць супрацоўніцтва з усімі. Краіна сваімі ініцыятывамі на міжнароднай арэне даказала здольнасць ўносіць канструктыўны ўклад у рашэнне розных праблем. Да іх дадаліся і новыя выклікі. На фоне барацьбы з пандэміяй усё больш жорсткая канкурэнцыя ахоплівае глабальную эканоміку. Нікуды не сышлі застарэлыя канфлікты. Таму як паветра патрэбна стратэгія эфектыўнага процідзеяння выклікам і пагрозам. Значна прадуктыўней гэта рабіць разам, перакананы Аляксандр Лукашэнка.

Звяртаючыся да дыпламатаў, Прэзідэнт падкрэсліў, што Беларусь з’яўляецца надзейным партнёрам для кожнай з дзяржаў і ёй ёсць што прапанаваць для супрацоўніцтва. Са свайго боку Мінск разлічвае, што кіраўнікі дыпмісій будуць непрадузята і аб’ектыўна даводзіць свайму кіраўніцтву інфармацыю аб жыцці краіны.

— Мы гатовы дапамагаць вам у гэтым. Разлічваю, што вашы вопыт і прафесіяналізм стануць трывалай асновай для канструктыўнага ўзаемадзеяння, а яго практычныя вынікі не прымусяць сябе доўга чакаць, — рэзюмаваў Прэзідэнт Беларусі.

Цырымонія ўручэння даверчых грамат — гэта яшчэ і падстава зверыць гадзіннікі, абмеркаваць перспектывы далейшага супрацоўніцтва з краінамі, якія прадстаўляюць паслы. Для пачатку да кіраўнікоў дыпламатычных місій Прэзідэнт звярнуўся з трыбуны. У афіцыйнай частцы сказаў наступнае:


Аб Кітаі

— Характар нашых адносін — давернае ўсебаковае стратэгічнае партнёрства і ўзаемавыгаднае супрацоўніцтва. І гэтым усё сказана. Гэтай філасофіяй прасякнутыя ўсе сферы нашага ўзаемадзеяння. Беларусь актыўна ўдзельнічае ў кітайскай ініцыятыве «Пояс і шлях». Сёння гэта рэальна працуючы праект, які дае канкрэтную аддачу, і мы ўсяляк спрыяем і будзем спрыяць яго спалучэнню з інтэграцыйнымі працэсамі ў Еўразійскім эканамічным саюзе — наколькі гэта магчыма. Кітайска-беларускі індустрыяльны парк «Вялікі камень» — адзін з паказальных прыкладаў нашага супрацоўніцтва. У ім ужо працуюць каля сямідзесяці замежных кампаній. Высокатэхналагічных кампаній. Асабліва хачу адзначыць два вельмі важных для Беларусі праекты, якія стартавалі ў гэтым годзе — будаўніцтва Нацыянальнага футбольнага стадыёна і басейна міжнароднага стандарту на сродкі Кітайскай Народнай Рэспублікі. Захоўваюцца добрыя тэмпы росту беларускага экспарту ў Кітай. Паводле нашых ацэнак, у гэтым годзе аб’ём паставак сельгаспрадукцыі ў Кітай ўпершыню дасягне 200 мільёнаў долараў. І я ўпэўнены, што гэта толькі пачатак.


Аб Ізраілі

— Беларусь і Ізраіль звязвае шматвякавое сяброўства, а таксама агульная трагедыя самай кровапралітнай у гісторыі чалавецтва вайны. Нашы дзяржавы паслядоўна адстойваюць абсалютную недапушчальнасць перагляду вынікаў гэтай вайны і гераізацыі нацызму. Дарэчы, у найбліжэйшы час наш Парламент разгледзіць законапраект аб недапушчальнасці гераізацыі нацызму ў Беларусі. Так званай гераізацыяй сёння грашаць вельмі многія краіны, асабліва размешчаныя побач з намі. А дарма! Перакананы, што ніякія заслугі перад Айчынай не могуць апраўдаць злачынствы супраць чалавецтва! Мы разлічваем на развіццё супрацоўніцтва ў галіне інфармацыйных тэхналогій, біятэхналогій, робататэхнікі, а таксама штучнага інтэлекту. Ёсць што вам прапанаваць. Ваш ўзровень развіцця мы ведаем.


Аб Мальтыйскім Ордэне

— Значны вопыт двухбаковага супрацоўніцтва ў нашай краіны з Мальтыйскім ордэнам, якому ўдзячныя за вялікую гуманітарную дапамогу, пастаўкі медыцынскага абсталявання, павышэнне кваліфікацыі беларускіх урачоў. Ордэн актыўна ўзаемадзейнічае з Беларуссю ў рамках міжнародных намаганняў па барацьбе з гандлем людзьмі.


Аб Пакістане

— Асаблівае значэнне мы надаём супрацоўніцтву з Пакістанам. Пасля адкрыцця сваіх дыпмісій Мінск і Ісламабад здзейснілі сапраўдны прарыў ва ўсіх сферах узаемадзеяння. Сёння нам неабходна пісьменна выкарыстоўваць наяўныя напрацоўкі, надаўшы асаблівую ўвагу прамысловасці, сельскай гаспадарцы, адукацыі, фармацэўтыцы і ахове здароўя. Галоўнае — не спыняцца. Трэба ісці наперад, нягледзячы на рознага кшталту катаклізмы. Таму мы чакаем з нецярпеннем прэм’ер-міністра Пакістана Імрана Хана з афіцыйным візітам. Пра гэта мы з ім дамаўляліся зусім нядаўна.


Аб Бангладэш

— Рэспубліка Беларусь разглядае Народную Рэспубліку Бангладэш як важнага і перспектыўнага партнёра. За апошнія гады актывізавалася наша ўзаемадзеянне ў гандлёва-эканамічнай сферы, і магчымасці тут вялікія. Мы бачым добрыя перспектывы для працы ў сферах прамысловасці, сельскай гаспадаркі, фармацэўтыкі, адукацыі. Пазіцыі нашых краін блізкія і па асноўных пытаннях міжнароднага парадку дня.


Аб Камбоджы

— З Каралеўствам Камбоджа сёлета мы адзначылі 25‑годдзе ўстанаўлення дыпламатычных адносін. За гэты час сфарміравана дагаворна-прававая база, рабочыя органы для ўзаемадзеяння. Пара актыўна пераходзіць да канкрэтных праектаў. Мы да гэтага гатовыя. Тэхналагічныя магчымасці Беларусі, аб якіх вы ведаеце, могуць у значнай ступені задаволіць патрэбы эканомікі Камбоджы, якая дынамічна развіваецца. Акрамя паставак тэхнікі і абсталявання, нашы прадпрыемствы гатовыя актывізаваць прамысловую кааперацыю, удзельнічаць у развіцці транспартнай, энергетычнай інфраструктуры Камбоджы, здабычы карысных выкапняў. Мы гатовыя ствараць у вас патрэбныя для вас прадпрыемствы і рыхтаваць для іх працоўныя кадры.


Аб Намібіі

— У Афрыцы ў нас далёка не цалкам рэалізаваны патэнцыял супрацоўніцтва з Намібіяй. Сёння мы знаходзімся толькі ў пачатку шляху па фарміраванні нашых адносін. Я абсалютна перакананы, што нам трэба арыентавацца на дасягненне практычнага выніку на доўгатэрміновую перспектыву супрацоўніцтва. Неабходна сканцэнтравацца на павелічэнні аб’ёмаў узаемнага гандлю і рэалізацыі сумесных праектаў у сферах энергетыкі і сельскай гаспадаркі.

…Зносіны з кіраўнікамі дыпламатычных місій афіцыйнай часткай не абмежавалася і працягнуліся ўжо ў больш нефармальнай абстаноўцы. Дарэчы, Аляксандр Лукашэнка мае намер асабіста сустрэцца (прычым у бліжэйшы час) з Сі Цзіньпінам, найлепшыя пажаданні ад якога новы пасол Кітая ў Беларусі Прэзідэнту перадаў перш за ўсё.

— Надышоў час пагаварыць па істотных, вельмі важных пытаннях, якія тычацца не толькі Беларусі, але больш за ўсё Кітая, — пачуў у адказ дыпламат.

СКАЗАНА

Се Сяоюн, Надзвычайны і Паўнамоцны Пасол Кітайскай Народнай Рэспублікі ў Беларусі:

— Палітычны ўзаемадавер паміж нашымі дзяржавамі паглыбляецца. Краіны падтрымліваюць адзін аднаго па ключавых пытаннях. Супрацоўніцтва ў эканоміцы, навуцы і тэхніцы, культуры і адукацыі таксама прынесла вельмі плённыя вынікі. Пасля ўспышкі пандэміі COVІD‑19 мы з беларускім бокам аказваем адзін аднаму дапамогу і падтрымку, абменьваемся вопытам, прапануем экстранныя супрацьэпідэмічныя сродкі. Гэта ў поўнай меры адлюстроўвае брацкія, сяброўскія адносіны паміж нашымі народамі.

Алекс Гольдман-Шайман, Надзвычайны і Паўнамоцны  Пасол Дзяржавы Ізраіль у Беларусі:

— Я як амбасадар маю намер умацоўваць інфраструктуру, на якой мы будзем працягваць будаваць адносіны паміж Ізраілем і Беларуссю па ўсіх спектрах. Гэта і прасоўванне культурных адносін, наша агульная спадчына, памяць Халакоста, якую мы хочам умацаваць. І, вядома, супрацоўніцтва ў галіне эканомікі — павелічэнне тавараабароту і турызму. Ва ўмовах бязвізавага рэжыму краіны зацікаўлены ў павелічэнні колькасці турыстаў у абодвух напрамках. У ізраільцян ёсць вялікі інтарэс да наведвання месцаў, дзе нарадзіўся і жыў Шымон Перас, наш прэм’ер-міністр і прэзідэнт, ці Эліэзер Бен-Йехуда, які аднавіў габрэйскую мову.

Саджад Хайдэр Хан, Надзвычайны і Паўнамоцны Пасол Ісламскай Рэспублікі Пакістан у Беларусі:

— Беларусь — выдатная краіна. Наша супрацоўніцтва ўмацоўвалася апошнія пяць гадоў — з візіту Аляксандра Лукашэнкі ў Пакістан у красавіку 2015 года. А асабліва інтэнсіўна нашы адносіны развіваліся апошні год. Закранаюць яны ўсе сферы. У нас дзейнічаюць каля васьмідзесяці пагадненняў — у галінах індустрыі, высокіх тэхналогій, вытворчасці, сельскай гаспадаркі. Прэм’ер-міністр Пакістана прыняў запрашэнне Аляксандра Лукашэнкі наведаць Беларусь. Візіт адбудзецца, як толькі дазволіць сітуацыя.

Алег БАГАМАЗАЎ

Выбар рэдакцыі

Грамадства

Калі маці як дзіця, або Як пасябраваць з самымі роднымі людзьмі, якія на старасці гадоў сталі асаблівымі

Калі маці як дзіця, або Як пасябраваць з самымі роднымі людзьмі, якія на старасці гадоў сталі асаблівымі

Што рабіць, калі нечакана маці або бацька сталі вельмі настойліва заяўляць пра сябе?

Культура

Слухаць сняжынкі, сачыць за ростам травы. Янка Сіпакоў не любіў тусовак  і лічыў адзіным багаццем кнігі

Слухаць сняжынкі, сачыць за ростам травы. Янка Сіпакоў не любіў тусовак і лічыў адзіным багаццем кнігі

Вось ужо дзесяць гадоў, як пісьменнік Янка Сіпакоў застаўся ў сваіх кнігах — і тых, што падарыў, а найперш, у тых, што напісаў... А споўнілася б яму сёння 85 гадоў.

Грамадства

Як прайсці тэхагляд ва ўмовах ажыятажу?

Як прайсці тэхагляд ва ўмовах ажыятажу?

«Ахвотных настолькі многа, што скончыліся бланкі».