Вы тут

Прыхільнікаў творчасці Жуля Верна і прыгодніцкага кіно чакае падарунак


Прыхільнікаў творчасці Жуля Верна і прыгодніцкага кіно чакае падарунак. У эфіры тэлеканала «Культура» пакажуць фільм «Маяк на краі свету» (1971). А на канале АНТ гледачы змогуць паглядзець дакументальны фільм пра «Джэнтльменаў удачы», якіх таксама паказалі паўстагоддзя таму.


«Маяк на краі свету» стаў экранізацыяй аднайменнага рамана французскага пісьменніка Жуля Верна. У самім творы, які з'явіўся ў рамках цыкла «Незвычайныя вандроўкі», апісваюцца прыгоды на Востраве Штатаў на архіпелагу Вогненная Зямля. Асновай рамана стаў арыгінальны рукапіс пісьменніка, які перад выхадам у свет быў зменены сынам творцы. Справа ў тым, што пісьменнік адправіў тэкст на публікацыю, але не дажыў да яе выхаду. Кніга выйшла ў лістападзе 1905-га...

Па сюжэце фільма, рэжысёрам якога стаў Кэвін Білінгтан, дзеянне адбываецца ў 1865 годзе. Уіл Дэнтан, які даглядае маяк, збег на невялікі востраў у раёне мыса Горн, бо імкнуўся схавацца ад свайго складанага мінулага, дзе яго абвінавацілі ў забойстве. І аднойчы да маяка прыплывае аргенцінскі ваенны карабель пад камандаваннем капітана Морыца. У гэты ж час адбываецца нападзенне на маяк каманды піратаў, якія збіраюцца накіраваць свае караблі на скалы, а потым завалодаць імі. Узначальвае захопнікаў капітан Джонатан Кангрэ. Падчас нападзення захопленымі аказваюцца аргенцінскі карабель і маяк, а таксама гіне частка каманды. Аднак Уілу ўдаецца ўцячы. І пасля ён аб'ядноўваецца з італьянцам Мантэф'ёрэ, які выратаваўся пасля крушэння аднаго з судоў, і разам яны чыняць адпор піратам. Але ж у ходзе змагання капітан піратаў бярэ ў палон англічанку Арабэлу, пагражаючы яе забіць. У сваю чаргу Дэнтан, захапіўшы пушку піратаў, топіць і іх карабель. З часам у жывых застаюцца толькі Уіл і Джонатан і ўступаюць у барацьбу...

Фільм і раман маюць пэўныя адрозненні. Так, напрыклад, не ўсе імёны персанажаў на экране супадаюць з іх кніжнымі прататыпамі. У кінастужцы з'яўляецца новая гераіня — тая самая дзяўчына, што ўратоўваецца пасля крушэння карабля. Змянілі і канцоўку фільма, і некаторыя павароты сюжэта, як той жа эпізод з загінулай малпачкай Марыа... Таму глядзіце і супастаўляйце падчас паказу ў пятніцу 22 студзеня на канале «Культура».

А вось 23 студзеня ў эфіры тэлеканала АНТ пакажуць дакументальны фільм «Джэнтльмены ўдачы. Усе адценні Серага», прысвечаны кінастужцы «Джэнтльмены ўдачы», якую таксама знялі пяцьдзясят гадоў таму. Дадзены кінатвор уваходзіць у спіс самых папулярных савецкіх камедый, але не ўсе адразу згадваюць імя яе рэжысёра Аляксандра Серага, памылкова лічачы, што зняў знакамітую карціну Георгій Данэлія, які насамрэч выступіў тут як адзін з аўтараў сцэнарыя і ў ролі мастацкага кіраўніка. Аўтары дадзенай дакументальнай работы раскажуць пра тое, як узнікла ідэя стварэння «Джэнтльменаў удачы», як падбіраліся акцёры на галоўныя ролі, а таксама дзе і ў якіх умовах праходзілі здымкі, ствараліся знакамітыя сцэны і мноства іншых цікавых фактаў пра любімую камедыю. Напрыклад, эпізоды ў турме здымалі ў сапраўднай узбекскай калоніі і ў здымачнай групы быў кансультант — дзеючы супрацоўнік МУС. Але палкоўніка запрасілі, так бы мовіць, дзеля птушачкі, таму што сам рэжысёр добра ведаў турэмны ўклад і жаргон, паколькі за трынаццаць гадоў да гэтага быў асуджаны за спробу забойства сябра... У жыцці Аляксандра Серага было так многа нечаканых паваротаў і выпрабаванняў, што пра яго можна было напісаць асобны сцэнарый. Пасля «Джэнтльменаў» рэжысёр зняў яшчэ камедыі «Ты — мне, я — табе» і «Беражыце мужчын». І хоць гэтыя работы не паўтарылі поспеху першай карціны, але і яны знайшлі свайго гледача.

Цяжкая хвароба і заўчасная смерць Аляксандра Серага не дазволілі яму ў поўнай меры рэалізаваць свой талент. Але, як сказаў Леанід Кураўлёў, «помнікам яму застаўся вясёлы фільм пра рамантыкаў з вялікай дарогі».

Алена ДРАПКО

Загаловак у газеце: Героі і рамантыкі з вялікай дарогі

Выбар рэдакцыі

Грамадства

Ці варта засцерагацца ад вяртання анамальнай спякоты? Дзмітрый Рабаў расказаў пра надвор’е на астатнюю частку лета

Ці варта засцерагацца ад вяртання анамальнай спякоты? Дзмітрый Рабаў расказаў пра надвор’е на астатнюю частку лета

«Верхавіна лета» прайшла, і ўжо мала хто памятае, што першая дэкада чэрвеня была халаднаватай і з замаразкамі.

Грамадства

Усё што трэба ведаць пра пляжны сезон

Усё што трэба ведаць пра пляжны сезон

У апошнія тыдні на краіну абрынулася небывалая спякота... 

Калейдаскоп

Чым апырскаць памідоры ад фітафторы, калі на іх ужо завязі і кветкі

Чым апырскаць памідоры ад фітафторы, калі на іх ужо завязі і кветкі

Як і любую іншую хваробу, фітафтароз лягчэй папярэдзіць, чым лячыць.

Культура

Беразіно: цэнтр на шляху «з вараг у грэкі»

Беразіно: цэнтр на шляху «з вараг у грэкі»

Радзімазнаўства. Адрасы пісьменства. Сумесны праект Мінаблвыканкама і «Звязды».