Вы тут

Аляксандр Лукашэнка: Беларусы былі і будуць адным народам


Прэзідэнцкі прыём прайшоў у Нацыянальным выставачным цэнтры «БелЭкспа»

Традыцыйна ён адбываецца напярэдадні або пасля старога Новага году. На мерапрыемстве з рук Прэзідэнта Беларусі Аляксандра Лукашэнкі атрымліваюць свае ўзнагароды дзеячы, якія дасягнулі значных вынікаў. У бягучым годзе свята праведзена ў стылі гогалеўскага твора «Вечары на хутары ля Дзіканькі».


«Гэты год прымусіў нас паглядзець на свет і сваё месца ў ім шырока расплюшчанымі вачыма. З аднаго боку, 2020-ы надзеў на нас маскі, з другога — зняў іх», — сказаў кіраўнік краіны.

Ён адзначыў, што людзі лепш пазналі адзін аднаго — у кімсьці расчараваліся, а ў кімсьці знайшлі апору, убачылі беларусаў, якія ў востры гістарычны момант засталіся верныя гонару і сумленню, што ў гэты прагматычны век асабліва каштоўна.

«Калі памятаеце, пару гадоў таму ў гэтай зале я сказаў, што нас будуць спрабаваць на зуб: вартыя мы ці не сваёй незалежнасці. Час праверыў нас і даў адказ: увогуле вартыя, — заявіў Аляксандр Лукашэнка. — У 2020-м нам фактычна аб’явілі вайну. І развязана яна была не супраць Прэзідэнта, дзяржслужачых і сілавых структур, а супраць моцнай дзяржавы ў цэлым. Дзяржавы, якая, нягледзячы на сціплае месца на карце свету, можа дазволіць сабе праводзіць незалежную знешнюю і ўнутраную палітыку».

Менавіта ў гэтым прычына, на думку Прэзідэнта, у выкліку нашай краіне. «Са слабой (краінай — „Зв.“) разабраліся б і без вайны. Калі б мы былі вельмі моцнымі, нам бы не прад’яўлялі такія прэтэнзіі», — падкрэсліў Аляксандр Лукашэнка.

Паводле яго слоў, суверэнітэт краіны немагчымы без моцнай улады (асабліва гэта важна ў час, калі сабраліся перагледзіць Канстытуцыю), якую ўвасабляе сабой не адзін чалавек, а нацыя, гатовая згуртавацца, калі дзяржава пад ударам.

«Мы выстаялі, таму што былі адзіныя ў імкненні захаваць мір і гістарычную праўду, свой уклад жыцця і менталітэт. Раскачаліся, праўда, не адразу, — канстатаваў Аляксандр Лукашэнка. — Таму абвешчаны Год народнага адзінства— гэта не столькі задача на будучыню, як неабвержны факт і наш адказ нядобразычліўцам: беларусы былі і будуць адным народам».

Звяртаючыся да тых, як адзначыў Прэзідэнт, хто з-за прафесійнай дзейнасці заўсёды на ўвазе, і тых, каму давялося стаць публічным чалавекам, каб смела і адкрыта выказаць сваю грамадзянскую пазіцыю, ён сказаў: «Вы, можа быць, нават не да канца ўсвядомілі, што перагарнулі не проста чарговую старонку нашай гісторыі, а перагарнулі ў кароткі перыяд часу свядомасць людзей, прынамсі, большасці нашага грамадства. Вы паказалі, што значыць любіць Радзіму не на словах, а на справе. Паказалі, што значыць быць сапраўдным патрыётам».

Прэзідэнт заявіў, што мы прайшлі праз выпрабаванні, якія зламалі не адзін народ, але ўзялі лёс у свае рукі. 

«Мы прачнуліся. І гэта лепшае, што магло з намі, беларусамі, адбыцца. Узялі свой лёс у рукі. Пагадзіцеся, наша родная Беларусь заслугоўвае, каб мы бераглі яе і шанавалі свой нацыянальны статус. Статус грамадзяніна моцнай і незалежнай краіны», — сказаў кіраўнік краіны.

«А каб захаваць такі статус, сёння мала абараняцца, — працягнуў Аляксандр Лукашэнка, — трэба стаць актыўным гульцом у глабальным свеце, перад усім у інфармацыйным, таму што асноўныя баявыя дзеянні адбываюцца на гэтым полі».

«Не час для далікацтва, хоць гэта і супярэчыць нашаму нацыянальнаму характару. Каб выжыць, трэба зрываць маскі і называць рэчы сваімі імёнамі. Прыгожае слова фэйк — гэта звычайная хлусня, а пастпраўда — самая прымітыўная маніпуляцыя свядомасцю чалавека. Але гэтым і іншым тэхналогіям мы, як і раней, супрацьпаставім класічную аб’ектыўную і сумленную журналістыку», — канстатаваў Прэзідэнт.

Ён дадаў, што тэлеграм-каналы і Інтэрнет — вельмі моцная зброя, але яна не назаўсёды. «Вы ўбачыце згасанне гэтага феерверка. Не адмаўляйцеся ад гэтай класікі (традыцыйных СМІ — „Зв.“)», — звярнуў увагу кіраўнік краіны.

Вельмі важна, як сказаў Прэзідэнт, навучыцца адрозніваць дабро і зло, бо ўвесь мінулы год пад выглядам прыгожых лозунгаў і прадуманых вобразаў нам таксама спрабавалі прасунуць далёкія ад чаканняў і патрэб грамадства ідэі.

«Не мне вам распавядаць, хто якія палітычныя мэты і асабістыя выгады меў на ўвазе. Але дзякуй, што годна адказалі на гэты выклік. Можа, і не варта было ў гэтак святочнай атмасферы казаць пра сур’ёзныя рэчы, — падкрэсліў кіраўнік краіны. — Але я, падыходзячы да гэтай залы, падумаў, што гэта не першае такое маё мерапрыемства. Іх было каля двух дзясяткаў на маім прэзідэнцкім стагоддзі. Я інтуітыўна адчуў, што як ніколі раней, сёння прыйду да сваіх людзей».

Прэзідэнт заявіў, што кожны з прысутных на прыёме апынуўся ў эпіцэнтры палітычнага жыцця краіны. 

«Я схіляю галаву перад подзвігам такіх людзей. Вы яшчэ не разумееце, што гэта подзвіг і вы яго здзейснілі, але хутка зразумееце. Вялікае бачыцца на адлегласці. Гэты час вызначыў сваіх герояў — тых, хто ў няпросты для дзяржавы перыяд абраў шлях барацьбы. Барацьбы на мяжы сваіх магчымасцяў, насуперак пагрозам жыцця і здароўю», — канстатаваў кіраўнік краіны.

Асабліва ён адзначыў прафесіяналізм і смеласць журналістаў і аператараў, якія сталі ў адзін шэраг з сілавікамі, не меншую мужнасць праявілі нашы спартсмены, артысты, урачы, педагогі і дзяржслужачыя.

«Расслабляцца нельга ніколі. Ніколі не сумнявайцеся ў маёй рашучасці. Я ніколі не адступлю», — рэзюмаваў Прэзідэнт. Ён адзначыў, што галоўнае — з усіх падзей вынесці ўрокі, што абавязкова зробяць і на Усебеларускім народным сходзе. 

Падчас святочнага вечара Аляксандр Лукашэнка ўручыў ордэны, медалі і Падзякі Прэзідэнта дзяржаўным дзеячам, артыстам, супрацоўнікам сродкаў масавай інфармацыі.

Ордэнам Айчыны II ступені ўзнагароджаны старшыня Калегіі Еўразійскай эканамічнай камісіі Міхаіл Мясніковіч. Ордэн Айчыны III ступені з рук кіраўніка дзяржавы атрымалі старшыня Савета Рэспублікі Наталля Качанава і губернатар Гродзенскай вобласці Уладзімір Каранік. Старшыня Нацыянальнага статыстычнага камітэта Іна Мядзведзева і міністр аховы здароўя Дзмітрый Піневіч ўдастоены ордэна Пашаны.

Медалём «За адвагу» узнагароджаны спецыяльны карэспандэнт тэлеканала СТБ Рыгор Азаронак, медалём «За працоўныя заслугі» — аглядальнік аддзела выдавецкага дома «Беларусь сёння» Андрэй Мукавозчык і галоўны саветнік прэс-службы Прэзідэнта Валерый Шульга, медалём Францыска Скарыны — рэдактар ​​аддзела выдавецкага дома «Беларусь сёння» Дзмітрый Крат і спецыяльны карэспандэнт тэлеканала АНТ Ігар Тур.

Выбар рэдакцыі

Грамадства

Даведаліся, колькі каштуе букет на 8 Сакавіка

Даведаліся, колькі каштуе букет на 8 Сакавіка

Ці прынята ў нас дарыць «мільён алых руж» каханай?

Грамадства

Чым прыцягвае чытачоў часопіс «Алеся»?

Чым прыцягвае чытачоў часопіс «Алеся»?

Размова з галоўным рэдактарам Ларысай Ракоўскай.

Грамадства

Анатомія мезальянсу. Чаму няроўныя шлюбы былі, ёсць, будуць?

Анатомія мезальянсу. Чаму няроўныя шлюбы былі, ёсць, будуць?

Любоўных гісторый, якія прыцягваюць павышаную ўвагу грамадства, нямала.

У свеце

Каменданцкія часы. Чым падаграецца глабальная пратэсная хваля?

Каменданцкія часы. Чым падаграецца глабальная пратэсная хваля?

Людзі стаміліся ад лакдаўну і беспрацоўя і выходзяць на пратэсты, а надзея перамагчы пандэмію ўсеагульнай вакцынацыяй, падобна, растае на вачах: прэпараты па-ранейшаму недаступныя ўсім ахвотным і ў найбліжэйшы час сітуацыя наўрад ці зменіцца.