Вы тут

«Кніга для дзіцяці павінна быць напісана так, каб і дарослы знаходзіў у ёй цікавосткі»


Як вяртаць моду на чытанне, пра што пісаць кнігі для сучасных дзяцей і якія мерапрыемствы дазваляюць не страчваць прамой сувязі з чытачамі — пра гэта і многае іншае размаўлялі прадстаўнікі Выдавецкага дома «Звязда», аўтары, якія тут выдаюцца, і бібліятэкары напярэдадні ХХVІІІ Мінскай кніжнай выстаўкі-кірмашу.


Фота: bomdia.uk

— Мы на працягу многіх гадоў супрацоўнічаем з кнігагандлёвымі аб'ектамі і з бібліятэкамі. Таму ведаем, што нават сёння, у эпоху імклівага жыцця, кліпавага мыслення і хуткага чытання ў сеціве кніга застаецца найлепшым сябрам чалавека, — адзначыла намеснік дырэктара Выдавецкага дома «Звязда» Юлія Дашкевіч. — Даследчыкі высветлілі, што паглыбіцца ў іншую, апісаную аўтарам рэальнасць магчыма толькі пры чытанні друкаваных тэкстаў — калі мы будзем гартаць папяровую кніжку, а не яе электронную версію. Менавіта такое паглыбленне, паводле апытання, ва ўмовах нашага шалёнага часу асацыюецца ў многіх са словам «шчасце». Значыць, добрая кніга здольная зрабіць чалавека шчаслівым. І таму сяброў і прыхільнікаў мае нямала.

Пераканацца ў гэтым дазваляюць акцыі, сустрэчы з пісьменнікамі і, вядома ж, кнігі, якія трапляюць да чытачоў у выніку супрацоўніцтва выдавецтва і аўтараў. Так, напрыклад, з 1 кастрычніка мінулага года пачала дзейнічаць акцыя «Звязда» сустракаецца з сябрамі». Яна мае на мэце паспрыяць развіццю беларускай мастацкай літаратуры, адраджэнню традыцый чытання, а таксама знаёміць з дзіцячай класічнай і сучаснай літаратурай. Цеснае супрацоўніцтва вядзецца і з бібліятэкамі краіны. У сувязі з зімовымі святамі Выдавецкі дом «Звязда» сумесна з «Белкнігай» і з «Акадэмкнігай» пачалі рэалізоўваць праект «У новы год са «Звяздой», які распачаўся 1 снежня 2020 года і працягнецца да 1 сакавіка 2021 года. У межах акцыі «Культурны маршрут: сучасныя пісьменнікі дзецям» у школах, гімназіях, бібліятэках і дзіцячых садках Выдавецкі дом «Звязда» будзе праводзіць сустрэчы з пісьменнікамі, прэзентацыі. Пазнаёміцца з выданнямі як для дзяцей, так і для дарослых можна на сайце ўстановы альбо ў сацыяльных сетках.

— Вельмі прыемна, што наш творчы год пачынаецца з тэмы дзіцячай літаратуры і што напярэдадні кніжнай выстаўкі мы гаворым пра яе. Саюз пісьменнікаў зараз актыўна рыхтуецца да ўдзелу ў нашым знакамітым кніжным форуме. Дзіцячая літаратура будзе прадстаўлена там выразна, шырока. Таму што мы разумеем: будучыню кнігі ў першую чаргу вызначае юны чытач, — сказала першы намеснік Саюза пісьменнікаў Беларусі, пісьменніца Алена Стэльмах. — Тэма чытання сёння гучыць ва ўсім свеце. І вельмі многія краіны думаюць пра тое, якім стане грамадства. Наколькі яно будзе адукаванае, пісьменнае, а гэта пачынаецца закладвацца з самага ранняга ўзросту. Залежыць у тым ліку ад таго, якія кнігі чытаюцца дзецям.

Пісьменніца падзялілася з прысутнымі і падзеямі ў сваім творчым жыцці. Так, у Выдавецкім доме «Звязда» рыхтуецца да выхаду яе новая кніга «Супоўніца Міла», дзе чытачы змогуць даведацца пра ганчарную справу і пра асаблівую традыцыю ладзіць абед у сямейным коле. Дарэчы, якраз пра тое, што чытанне аб'ядноўвае і ў бібліятэкі сёння прыходзяць дзеці разам з бацькамі, гаварылі таксама. А вось папулярная дзіцячая пісьменніца Кацярына Хадасевіч-Лісавая выказала наступныя думкі наконт таго, як сёння быць бліжэй да чытача:

— Мне здаецца, аптымальны варыянт — калі кніга напісана не толькі для дзіцяці. Калі пры чытанні яе сваім дзецям дарослыя і для сябе стануць знаходзіць нейкія цікавосткі. І канешне, у казках для дзяцей павінна быць шмат дабрыні. Дзеткі павінны выхоўвацца на вечных каштоўнасцях, дзе і міласэрнасць, і сяброўства, і павага, паразуменне. Таму што дзіця — гэта як чысты аркуш паперы. Тое, што будзе закладзена з маленства, тое і застанецца ў яго назаўсёды, вызначыць яго далейшы лёс. Дзіцячая кніга павінна вучыць самаму добраму, а пісьменнікі — ствараць казачны і ўтульны свет для сваіх юных чытачоў. Трэба будаваць творы на асноўных пастулатах — гэта маральныя каштоўнасці і духоўныя арыенціры. А ў астатнім можна напаўняць творы любымі дэталямі, каб рабіць іх сучаснымі і цікавымі.

Зараз чакае свайго часу новая кніга Кацярыны Хадасевіч-Лісавой, якая будзе называцца «Загадка прынцэссы Агнесы». Плануецца, што яе прэзентацыя адбудзецца якраз на Мінскай кніжнай выстаўцы-кірмашы. А тыя кнігі, якія ўжо выйшлі ў Выдавецкім доме «Звязда», можна набыць і працягваць вандраваць разам з любімымі героямі.

Алена ДРАПКО

Выбар рэдакцыі

Грамадства

Водар лаванды вабіць на Веткаўшчыну

Водар лаванды вабіць на Веткаўшчыну

Як выглядае «беларускі Праванс», дакладна ведаюць жыхары глыбінкі Гомельскай вобласці.

Эканоміка

«Прадам утульную кватэру, а куплю яшчэ лепшую». А пра падаткі вы не забыліся?

«Прадам утульную кватэру, а куплю яшчэ лепшую». А пра падаткі вы не забыліся?

Адна мая добрая знаёмая вырашыла палепшыць свае жыллёвыя ўмовы — прадаць сваю двухпакаёвую кватэру і купіць трохпакаёвую.

Калейдаскоп

Усходні гараскоп на наступны тыдзень

Усходні гараскоп на наступны тыдзень

БЛІЗНЯТЫ. Калі ёсць цікавыя ідэі, то менавіта цяпер яны будуць запатрабаваныя і нарэшце ажыццёвяцца. Тыдзень прынясе знаёмствы з новымі людзьмі, спатканні, вандроўкі і шмат яркіх уражанняў. Асабістае жыццё рэзка зменіцца, прычым менавіта так, як вы марылі. Вы больш не будзеце самотныя, сітуацыя вырашыцца на вашу карысць.