Вы тут

Прэзідэнт пра даходы лясной гаспадаркі: Гэта тое, аб чым мы марылі гадоў 15–20 таму назад


Прэзідэнт Беларусі Аляксандр Лукашэнка прыняў з дакладам віцэ-прэм’ера Аляксандра Субоціна і міністра лясной гаспадаркі Віталя Дрожжу. Кіраўніку краіны расказалі пра вынікі работы галіны ў мінулым годзе і вызначылі кірункі яе развіцця на будучыню.


«Я запрасіў вас, каб абмеркаваць стан спраў у асноўнай нашай галіне, фундаментальнай. Гэта адна з базавых галін нашай эканомікі. Пры падрыхтоўцы да гэтага мерапрыемства я выявіў цікавыя факты. Насельніцтва наша наўрад ці ведае, што амаль 40 працэнтаў тэрыторыі Беларусі пакрыта найкаштоўнейшым аднаўляльным рэсурсам. І за гады нашай незалежнасці мы павялічылі плошчу зялёнага багацця амаль на мільён гектараў. Я пра гэта не ведаў. Гэта кажа пра тое, што мы не драпежнікі і да прыроды, і да рэсурсу, які дараваў нам Гасподзь, адносімся па-чалавечы», — сказаў Прэзідэнт.

Па яго звестках, карэнны запас драўніны дасягнуў велізарных памераў — амаль 2 мільярдаў кубічных метраў, доля спелых лясоў і перастойных дрэвастояў больш 20 % ад агульнага запасу. Але галоўнае, што адзначыў кіраўнік краіны, — аднавілі тое, што страцілі падчас Савецкага саюза, калі дзелавую драўніну гналі за межы краіны, а адтуль прывозілі мэблю. «Тады доля спелых лясоў складала 3 працэнты, сёння — 20. Вось гэта параўнанне для мяне таксама было навінкай», — дадаў Прэзідэнт.

Ён паведаміў, што галіна працуе стабільна, нягледзячы на эпідыміялагічную сітуацыю. Сельская гаспадарка і дрэваапрацоўка далі значны прырост.

«Дрэваапрацоўка дасць прыросту дзесьці 5–6 працэнтаў. У дрэваапрацоўцы вялікая ваша заслуга, бо крыніца, сыравіна — гэта нашы лясныя рэсурсы. Вы таксама нядрэнна спрацавалі ў рашэнні тых праблем і задач, што былі мною пастаўлены па перапрацоўцы адходаў», — звярнуўся Прэзідэнт да прысутных на сустрэчы.

Аляксандр Лукашэнка нагадаў, што ў апошнія гады шмат лясных масіваў былі вырублены з мэтай прафілактыкі караедаў. Вялікія аб’ёмы драўніны, якія маглі за некалькі год згніць, складзіравалі. Каб папярэдзіць гэта, былі пабудаваны пелетныя заводы, якія выпрацоўвалі каштоўнае паліва.

«Як вы дакладваецце, усё (пелетнае паліва — «Зв.») закантрактавана, і нашы пелетныя прадпрыемствы выйшлі на прыбытак», — сказаў Прэзідэнт і звярнуў увагу, што засталося пабудаваць 6 заводаў, 7 ужо ў працэсе стварэння.

«Усяго пабудуем да 15 заводаў, а далей будзем глядзець. Запыт на гэту прадукцыю будзе заўсёды. Гэта выгадная для нас прадукцыя. Навошта, каб у лесе згніла нізкаякасная драўніна? Мы яе перапрацуем у дровы і з высокай рэнтабельнасцю прададзім», — канстатаваў кіраўнік краіны.

Паводле яго слоў патрэбу ў такой прадукцыі маюць не толькі еўрапейскія пакупнікі, але і самім неабходна закрыць патрэбу.

«Трэба дакладна вызначыцца, колькі нам неабходна трэсак, пелетаў, каб замясціць для ацяплення прыродны газ. Што ж мы палім імпартны рэсурс, а ў сябе пад нагамі велізарны рэсурс гэты?» — задаў рытарычнае пытанне Прэзідэнт.

Ён адзначыў, што абсалютна падтрымлівае прапанову вызначыць на перспектыву, колькі будуць нарыхтоўваць драўніны для ўнутраных патрэбаў.

«Мы павінны ацяпляць дамы людзей, гарады, аграгарадкі, вёскі дровамі. У нас хапае гэтага аднаўляльнага рэсурсу. Такім чынам мы зможам скараціць спажыванне прыроднага газу, за які мы плацім вялікія грошы», — дадаў Аляксандр Лукашэнка.

Ён падзяліўся: мяркуе, што справы ў лясной прамысловасці на бягучую пяцігодку варта абмеркаваць у шырокім коле.

«Дзесьці мы павінны арганізаваць прыстойную нараду (мы ўвагай Прэзідэнта асабліва не песцім леснікоў, і гэта дрэнна) і пагаварыць пра задачы на пяцігодку і хаця б у агульных рысах намеціць планы развіцця нашай лясной гаспадаркі», — паведаміў Прэзідэнт.

Кіраўнік краіны адзначыў — добры паказчык, што галіна прыносіць у два разы больш даходаў, чым атрымоўвае з бюджэта грошай на развіццё.

«Гэта тое, аб чым мы марылі гадоў 15–20 таму назад», — рэзюмаваў кіраўнік краіны.

Даведка. Па інфармацыі прэс-службы Мінлясгаса, агульная плошча зямель ляснога фонду за апошнія пяць гадоў павялічылася на 1,4 % і склала 86 %. Агульная плошча пакрытых лесам зямель пашырылася на 74 тысячы гектараў і складае 8 мільёнаў 300 тысяч гектараў. Лясістасць рэспублікі блізкая да аптымальнай (больш за 40 %). У мінулым годзе паступленні ад вядзення лясной і паляўнічых гаспадарак склала 460 мільёнаў рублёў. Стратныя арганізацыі ў галіне адсутнічаюць.

Адзін з найважнейшых кірункаў лесагаспадарчых устаноў — забеспячэнне перапрацоўшчыкаў драўнінай. У 2020 годзе арганізацыямі міністэрства нарыхтавана больш за 21 мільён кубаметраў драўніны. Летась згодна даручэнню Прэзідэнта ўведзены ў экслуатацыю сем вытворчасцяў па выпуску паліўных гранул у Барысаўскім, Навагрудскім, Пружанскім, Клічаўскім, Жыткавіцкім, Капыльскім і Мазырскім раёнах. Працягваецца праца па стварэнні новых пелетных заводаў у Ганцавіцкім, Смаргонскім, Асіповіцкім і Старадарожскім раёнах.

Каментарый у тэму

Па словах міністра лясной гаспадаркі Віталя Дрожжы, галіна спрацавала па выніках года ў гістарычным максімуме па экспарце прадукцыі. У галіне адсутнічаюць стратныя арганізацыі, і эканамічны складнік станоўчы. Дасягнуць значных вынікаў, як канстатаваў кіраўнік ведамства, удалося дзякуючы павелічэнню перапрацоўкі драўніны, стварэнню адпаведных вытворчасцяў, рэалізацыі інвестыцыйных праектаў.

«Прэзідэнтам пастаўлена задача працягнуць працу па прыцягненні ў абарот драўніннага рэсурсу, які маецца ў нашай краіне, працягнуць працу па стварэнні нашых вытворчасцяў па выпуску паліўных пелет. Плюс да гэтага Прэзідэнт паставіў задачу перагледзіць яшчэ раз выкарыстанне мясцовых відаў паліва», — паведаміў журналістам пасля сустрэчы Віталь Дрожжа.

Ён адзначыў, што ў бліжэйшы час будуць перагледжаны падыходы да выкарыстання газа як паліва — то бок ацяпляцца будзем не газам, а мясцовымі аднаўляльнымі відамі паліва.

«У бліжэйшы час мы палічым мэтазгоднасць пераходу з газу па трэскі, пелеты, брыкеты і адпаведнае рашэнне будзе», — сказаў міністр.

Віталь Дрожжа паведаміў, што ўдалося вырашыць і праблему з жуком-караедам — за тры гады плошчы хворых лясоў паменшыліся ўтрая.

Марыя ДАДАЛКА

Выбар рэдакцыі

Грамадства

Водар лаванды вабіць на Веткаўшчыну

Водар лаванды вабіць на Веткаўшчыну

Як выглядае «беларускі Праванс», дакладна ведаюць жыхары глыбінкі Гомельскай вобласці.

Эканоміка

«Прадам утульную кватэру, а куплю яшчэ лепшую». А пра падаткі вы не забыліся?

«Прадам утульную кватэру, а куплю яшчэ лепшую». А пра падаткі вы не забыліся?

Адна мая добрая знаёмая вырашыла палепшыць свае жыллёвыя ўмовы — прадаць сваю двухпакаёвую кватэру і купіць трохпакаёвую.

Калейдаскоп

Усходні гараскоп на наступны тыдзень

Усходні гараскоп на наступны тыдзень

БЛІЗНЯТЫ. Калі ёсць цікавыя ідэі, то менавіта цяпер яны будуць запатрабаваныя і нарэшце ажыццёвяцца. Тыдзень прынясе знаёмствы з новымі людзьмі, спатканні, вандроўкі і шмат яркіх уражанняў. Асабістае жыццё рэзка зменіцца, прычым менавіта так, як вы марылі. Вы больш не будзеце самотныя, сітуацыя вырашыцца на вашу карысць.

Грамадства

Ці варта засцерагацца ад вяртання анамальнай спякоты? Дзмітрый Рабаў расказаў пра надвор’е на астатнюю частку лета

Ці варта засцерагацца ад вяртання анамальнай спякоты? Дзмітрый Рабаў расказаў пра надвор’е на астатнюю частку лета

«Верхавіна лета» прайшла, і ўжо мала хто памятае, што першая дэкада чэрвеня была халаднаватай і з замаразкамі.