Вы тут

Больш за 600 зваротаў разгледзелі летась члены Пастаяннай камісіі Савета Рэспублікі па адукацыі, навуцы, культуры і сацразвіцці


Днямі былі падведзены вынікі работы профільнай камісіі за 2020 год. Акрамя работы са зваротамі грамадзян і юрыдычных асоб, сярод асноўных «індыкатараў» таксама выступалі сустрэчы з працоўнымі калектывамі, асвятленне дзейнасці камісіі ў сродках масавай інфармацыі і сацыяльных сетках, удзел у значных для краіны падзеях.


Як паведамілі ў профільнай камісіі, найбольшую колькасць зваротаў разгледзеў яе старшыня Віктар ЛІСКОВІЧ. Звароты большай часткай датычыліся аховы здароўя, сацыяльнага і пенсійнага забеспячэння, занятасці насельніцтва, аховы працы, адукацыі, навукі і культуры, словам, тых кірункаў, што ўваходзяць у кампетэнцыю Пастаяннай камісіі.

Напрыклад, У Савет Рэспублікі да старшыні профільнай камісіі звярнулася Аляўціна Іванаўна, жыхарка горада Ліда, што на Гродзеншчыне, з просьбай аб садзейнічанні ў высвятленні дыягназу і медыцынскай дапамозе яе ўнуку. Па выніках разгляду Міністэрствам аховы здароўя яе звароту маладога мужчыну гаспіталізавалі ў неўралагічнае аддзяленне № 3 РНПЦ неўралогіі і нейрахірургіі, дзе правялі ўсе неабходныя дыягнастычныя даследаванні, кансультацыі ўрача-псіхолага, урача-псіхіятра, лагапеда, на аснове якіх з'явіцца канчатковы дыягназ і будуць дадзены рэкамендацыі па далейшым лячэнні і назіранні.

А вось аднаго прадпрымальнага мінчаніна хвалявала пытанне арэнды памяшканняў для арганізацыі спартыўных заняткаў, з просьбай аб садзейнічанні ў якім ён і звярнуўся ў Савет Рэспублікі. Як расказалі ў профільнай камісіі, у вырашэнні гэтага пытання быў задзейнічаны Мінгарвыканкам — заяўніку было прапанавана чатыры памяшканні на выбар.

А вось Ірына Васілеўна са Стаўбцоўскага раёна, што на Міншчыне, звярнулася ў Савет Рэспублікі з набалелай і дастаткова складанай праблемай. Па заканчэнні Салігорскага дзяржаўнага каледжа яе прыёмная дачка была накіравана на работу ва ўпраўленне адукацыі Салігорскага райвыканкама, але не змагла распачаць сваю працоўную дзейнасць, бо паступіла ў Беларускі дзяржаўны ўніверсітэт фізічнай культуры на платную форму навучання. У адпаведнасці з законам дзяўчыне неабходна кампенсаваць сродкі, якія былі выдаткаваны на яе навучанне ў каледжы.

Гэтую праблему старшыня Пастаяннай камісіі абмеркаваў з міністрам адукацыі Ігарам Карпенкам. З улікам усіх абставін было прынята рашэнне аб пераразмеркаванні дзяўчыны ў Мінскі раён. 17 снежня яна пачала працаваць у Бараўлянскай сярэдняй школе № 2 і была вызвалена ад кампенсацыі сродкаў за сваё папярэдняе навучанне.

Што датычыцца іншых кірункаў дзейнасці сенатараў, то і тут актыўнасць апынулася на высокім узроўні. Напрыклад, летась было праведзена без нечага 650 сустрэч з працоўнымі калектывамі. У лідарах — Дзмітрый Варанюк, Алег Дзячэнка, Каліна Капуцкая і Віктар Лісковіч.

Падчас такіх сустрэч агучваліся праблемы стану дарог, арганізацыі вольнага часу вяскоўцаў, якасці пітной вады, замацавання маладых спецыялістаў на вёсцы, перспектыў развіцця творчых здольнасцяў падрастаючага пакалення. Праблемы, якія часта абмяркоўваліся, — наяўнасць жылля для маладых спецыялістаў і новая форма аплаты працы работнікаў бюджэтных арганізацый. Па іх вялася актыўная растлумачальная работа сумесна з органамі мясцовай выканаўчай улады.

Так, старшыня камісіі праводзіў сустрэчы ў Гродзенскім дзяржаўным прафесійна-тэхнічным каледжы бытавога абслугоўвання насельніцтва, дзяржаўным каледжы тэхнікі, тэхналогіі і дызайну, аграрным каледжы, «купалаўскім» універсітэце, удзельнічаў у рабоце пяці рэгіянальных дыялогавых пляцовак «Гродзенскі дыялог — 2020». Браў удзел у абмеркаванні пытанняў канстытуцыйнага рэфармавання і партыйнага будаўніцтва, а таксама шырокага кола пытанняў, што закранаюць галіны аховы здароўя, адукацыі, культуры, спорту і маладзёжнай палітыкі.

Дарэчы, усе ініцыятывы, якія былі агучаны на дыялогавых пляцоўках, прапрацаваны і падрыхтаваны да разгляду на Усебеларускім народным сходзе.

На рахунку значных спраў камісіі на працягу года былі арганізацыйная работа па стварэнні і каардынацыі дзейнасці Маладзёжнага савета (парламента), падрыхтоўка і правядзенне мерапрыемстваў VІІ Форуму рэгіёнаў Беларусі і Расіі, адкрыццё музейнай экспазіцыі ў Савеце Рэспублікі і гэтак далей. Важнай з'яўляецца ініцыятыва і пачатак добрай традыцыі — аказанне падтрымкі медыцынскім установам, пацыентамі якіх з'яўляюцца дзеці. У прыватнасці, па ініцыятыве Савета Рэспублікі ў РНПЦ дзіцячай анкалогіі, гематалогіі і імуналогіі створаны апякунскі савет, які ўзначаліў Алег Суконка. На працягу года цэнтру перадалі камп'ютарную тэхніку, сродкі індывідуальнай аховы, аказана дапамога ў добраўпарадкаванні тэрыторыі.

Вольга АНУФРЫЕВА

Прэв’ю: depositphotos.com

Выбар рэдакцыі

Грамадства

Час клопату садаводаў: на якія сарты пладовых і ягадных культур варта звярнуць увагу?

Час клопату садаводаў: на якія сарты пладовых і ягадных культур варта звярнуць увагу?

Выбар саджанца для садавода — той момант, значнасць якога складана пераацаніць.

Культура

Чым сёлета будзе здзіўляць наведвальнікаў «Славянскі базар у Віцебску»?

Чым сёлета будзе здзіўляць наведвальнікаў «Славянскі базар у Віцебску»?

Канцэрт для дзяцей і моладзі, пластычны спектакль Ягора Дружыніна і «Рок-панарама».