Вы тут

Якія падыходы неабходна выкарыстоўваць для выхавання патрыётаў?


Аб гэтым вялася гутарка на выязным пашыраным пасяджэнні Прэзідыума Савета Рэспублікі, якое адбылося на базе Мінскага дзяржаўнага лінгвістычнага ўніверсітэта. Першае сёлета пасяджэнне Прэзідыума было прысвечана абмеркаванню актуальнага пытання – фарміравання грамадзянскасці і патрыятызму студэнцкай моладзі нашай краіны.


Трэба сказаць, што выбар тэмы абумоўлены роляй моладзі ў лёсе краіны, вызначэнні яе будучыні.

- Сёння на разгляд Прэзідыума Савета Рэспублікі вынесена вельмі актуальная тэма: патрыятычнае выхаванне моладзі і работа па патрыятычным выхаванні ў студэнцкіх аўдыторыях, - акцэнтавала ўвагу ў гутарцы з журналістамі спікер верхняй палаты парламента Наталля КАЧАНАВА. – Мы лічым, што яна павінна абмяркоўвацца на ўсіх узроўнях, таму што яна не можа не хваляваць.

На яе думку, ваенная гісторыя - гэта той фундамент, на якім павінна будавацца патрыятычнае выхаванне моладзі. Кожны ВНУ мае свае праекты, па якіх яны працуюць дастаткова даўно. Неабходна, каб гэтая работа была эфектыўнай і выніковай, і галоўнае, каб у ёй не было фармалізма.

Акрамя таго, важным аспектам з’яўляецца і чалавечы патэнцыял, падкрэсліла спікер верхняй палаты парламента. Таму падрыхтоўка, перападрыхтоўка педагагічных кадраў, з яе пункту гледжання, таксама важны кірунак, на які трэба звярнуць асаблівую ўвагу. Установам вышэйшай адукацыі важна не толькі перадаваць сучасныя веды, фарміраваць прафесійныя навыкі, але і звяртаць увагу на асобу маладога чалавека, дапамагаць яму ў самаразвіцці лепшых грамадскіх і маральных якасцей, стварэння асяроддзя для паспяховай сацыялізацыі.

Гісторыя супраць фальсіфікацыі 

Напачатку мерапрыемства яго ўдзельнікі пазнаёміліся з інтэрактыўнай тэматычнай выстаўкай, якая тычылася грамадзянска-патрыятычнага выхавання моладзі. Напрыклад, Ганна Кароза, загадчык кафедры архітэктуры Брэсцкага дзяржаўнага тэхнічнага ўніверсітэта распавяла пра сумесныя з мемарыяльным комплексам “Брэсцкая крэпасць-герой” праекты для студэнцкай моладзі: ад даследніцкай і навуковай дзейнасці да добраўпарадкавання тэрыторыі мемарыяльнага комплекса. Уладзімір Можар, студэнт Беларускай сельскагаспадарчай акадэміі ў Горках пазнаёміў з дзейнасцю музея, які дзейнічае на базе навучальнай установы, яго ўнікальных экспанатах, а таксама новых формах работы: квэстах, 3D-экскурсіях, турысцка-краязнаўчых мерапрыемствах.

Міністр адукацыі Ігар КАРПЕНКА расказаў на пасяджэнні, як вядзецца сістэмная работа з моладдзю па фарміраванню ў яе грамадзянскасці і патрыятызму.

Па яго словах, работа па патрыятычным выхаванні пранізвае ўсе ўзроўні адукацыі: ад дзіцячага садка да вышэйшай школы. Кожны вучэбны прадмет, кожная дысцыпліна аказвае ўплыў на фарміраванне дзяцей і моладзі, але найбольш істотна, безумоўна, ўплываюць сацыяльна-гуманітарныя дысцыпліны, таму сістэмна надаецца ўвага зместу адукацыйных дысцыплін, якія выкладаюцца на ўсіх ступенях сістэмы адукацыі. Так, на вывучэнне Другой Сусветнай і Вялікай Айчыннай вайны ва ўстановах адукацыі краіны звяртаецца асаблівая ўвага.

- Сёння мы сутыкаемся са спробамі перапісаць гісторыю ў кан’юнктурных палітычных мэтах, абясцэніць унёсак беларускага народа ў сусветную перамогу над фашызмам, - адзначыў міністр. - Менавіта гістарычная навука выступае асновай супрацьстаяння фальсіфікацыі.

Таму для ўстаноў вышэйшай адукацыі распрацавалі праект новай мадэлі цыкла сацыяльна-гуманітарных дысцыплін, якая ўключае ў сябе дысцыпліну “Гісторыя беларускай дзяржаўнасці”.

Між іншым, на выставе быў таксама прадстаўлены праект “Гонар за Беларусь”, які атрымаў прэмію за Духоўнае адраджэнне, аднаіменныя вучэбныя дапаможнікі і матэрыялы ўжо выкарыстоўваюцца ва ўстановах агульнай сярэдняй, але і вышэйшай тэхнічнай і сярэдне-спецыяльнай адукацыі.

- Гэты праект будзе працягнуты, - запэўніў Ігар Карпенка. - Мы амаль завяршылі стварэнне другой кнігі, якая выйдзе ў бліжэйшы час. Ёсць дамова з лінгвістычным універсітэтам аб яе перакладзе на замежныя мовы для выкарыстання ў рабоце беларускіх пасольстваў на тэрыторыі іншых краін. Каб грамадзяне маглі бачыць дасягненні нашай краіны, а не толькі арыентавацца на дэструктыўныя тэлеграм-каналы.

Трэба памятаць

На пасяджэнні адзначалася, што асновай фарміравання патрыятызму беларускай моладзі з’яўляецца захаванне памяці аб подзвігу абаронцаў Радзімы падчас Вялікай Айчыннай вайны. Міністр адукацыі пацвердзіў, што ў апошнія гады вялікую практычную значнасць атрымлівае навукова-даследніцкая дзейнасць навучэнцаў і студэнтаў па тэматыцы патрыятычна кірунку, у тым ліку тэматыка Вялікай Айчыннай вайны.

Дзякуючы сумеснай рабоце БРСМ з дзяржаўнымі органамі і прадпрыемствамі студатрадаўскі рух у нашай краіне выйшаў на якасна новы ўзровень. Занятасць моладзі ў вольны ад вучобы час, іх удзел у будаўніцтве знакавых аб’ектаў фарміруе дачыненне да рэалізацыі важных спраў для ўсіх беларусаў праектаў, дазваляе атрымаць першыя працоўныя навыкі, зрабіць асэнсаваны выбар будучай прафесіі.

Падчас пасяджэння ўдзельнікі пераканаліся ў тым, што студэнцкае самакіраванне, якое сёння існуе, з’яўляецца ўніверсальным механізмам развіцця ў студэнтаў самастойнасці, атрымання імі першасных арганізацыйных і кіраўнічых навыкаў, а таксама выступае эфектыўным сродкам фарміравання грамадзянска-патрытычных якасцей.

Сустрэчы і асветніцкія праекты

Па выніках абмеркавання праблем грамадзянскага і патрыятычнага выхавання студэнцкай моладзі Прэзідыумам Савета Рэспублікі выпрацаваны комплекс практычных рэкамендацый і парад.

- Я, наогул, лічу – нічога не заменіць жывых стасункаў, - пераканана Наталля Качанава. - Гэта вельмі важна: колькі б мы ні глядзелі тэлебачанне, чыталі газет, глядзелі электронныя мэсэнджэры рознага кшталту, чаты, тэлеграм-каналы, але калі ты маеш стасункі з людзьмі ўжывую – гэта вельмі важна.

З гэтай мэтай члены Савета Рэспублікі наведваюць працоўныя калектывы, удзельнічаюць у рабоце дыялогавых пляцовак і кожны тыдзень вынікі гэтай работы аналізуюцца, у тым ліку і пытанні, якія зараз хвалююць людзей. Цяпер неабходна больш актыўна сустракацца з моладдзю, каб пераканаўча (у лічбах і фактах) тлумачыць тое, што адбываецца.

Міністэрству адукацыі таксама даручана фарміраваць у маладзёжным асяродку прававую і гістарычную культуру, навыкі ацэнкі грамадска-палітычных падзей у нашай краіне і замежных дзяржавах. Для грамадзянска-патрыятычнага выхавання выкарастоўваць сучасныя інфармацыйна-камунікацыйныя тэхналогіі.

У рашэнні падкрэслена, што навукоўцам і даследчыкам неабходна актуалізаваць метадычныя рэкамендацыі па сістэме фарміравання і развіцці грамадзяніна з культурна-гістарычным, духоўнага, ідэалагічнага і іншых кампанентаў.

Таксама прапанавана рэалізоўваць у студэнцкім асяроддзі асветніцкія праекты аб дасягненнях Беларусі, яе выбітных асобах і значных падзеях. Міністэрству культуры неабходна перагледзець падыходы музеяў да работы з маладзёжнай аўдыторыяй.

На пасяджэнні падкрэслена, што рашэнні Прэзідыума Савета Рэспублікі накіруюць у зацікаўленыя арганізацыі. Савет Рэспублікі будзе кантраляваць іх рэалізацыю.

Вольга АНУФРЫЕВА

Фота БЕЛТА

Выбар рэдакцыі

Палітыка

Аляксандр Лукашэнка: Мы родную зямлю, незалежнасць і суверэнітэт нікому не аддадзім. Мы ў любым выпадку выстаім!

Аляксандр Лукашэнка: Мы родную зямлю, незалежнасць і суверэнітэт нікому не аддадзім. Мы ў любым выпадку выстаім!

 У Брэсцкай крэпасці прайшла цырымонія, прысвечаная 80-годдзю з дня пачатку Вялікай Айчыннай вайны.

Грамадства

Сёння — 80 гадоў з дня пачатку Вялікай Айчыннай вайны

Сёння — 80 гадоў з дня пачатку Вялікай Айчыннай вайны

У Беларусі Дзень усенароднай памяці ахвяр Вялікай Айчыннай вайны — памятная дата.