Вы тут

У навагоднім дабрачынным марафоне «Нашы дзеці» прынялі ўдзел больш за 800 тысяч хлопчыкаў і дзяўчынак


Яшчэ з восені пачалася маштабная падрыхтоўка да самай, мабыць, працяглай зімовай акцыі «Нашы дзеці». У ёй, згодна з пастановай Савета Міністраў, прынялі ўдзел прадстаўнікі рэспубліканскіх органаў дзяржкіравання і мясцовай выканаўчай улады.


І вось, пачынаючы з сярэдзіны снежня доўжыліся віншаванні са святамі дзяцей, што жывуць у інтэрнатах, апякунскіх ды прыёмных сем’ях; віншавалі тых, хто вымушаны быў сустракаць Новы год і Нараджэнне Хрыстова ў бальніцы. Прыходзілі да іх у госці не з пустымі рукамі — уручалі падарункі і нават дапамагалі вырашаць надзённыя праблемы.

Да акцыі далучыліся і многія грамадскія аб’яднанні. Так, «Беларускі фонд міру» ў Гомельскай вобласці арганізаваў навагоднія сустрэчы «Ёлкі міру і сяброўства» для малазабяспечаных дзяцей і дзяцей з асаблівасцямі развіцця. Эстафету перанялі вайскоўцы 103‑й Віцебскай асобнай гвардзейскай паветрана-дэсантнай брыгады. З навагоднімі падарункамі яны адправіліся ў мясцовы дзіцячы дом. А напярэдадні Новага года парадавалі яшчэ і хлопчыкаў з дзяўчынкамі, якія ляжалі на той момант у дзіцячай абласной клінічнай бальніцы. З вокнаў сваіх палат яны маглі назіраць відовішчнае шоу з агнямі і музычным суправаджэннем.

Удзельнікамі дабрачыннай акцыі «Ёлка жаданняў» у Брэсце сталі дзеці, якія змагаюцца з цяжкімі хваробамі. «Добрыя чарадзеі» з абласнога саюза моладзі прыйшлі да іх выконваць запаветныя жаданні, напісанныя ў лісце Дзеду Марозу. Так, адзінаццацігадовая Ульяна Ахметава атрымала роставы домік для лялькі, пра які даўно марыла. Але ж большасць «запытаў» у хлопцаў і дзяўчат была звязана з высокатэхналагічнымі прыладамі: дзеці хацелі атрымаць мультыборды, ноўтбукі ды іншыя гаджэты.

Ужо сёлета Нацыянальная школа прыгажосці арганізавала паказ мод Chrіstmas fashіon show з удзелам юных мадэляў ад 3 да 16 гадоў. Яны прадстаўлялі калекцыі з Chou Chou, Mugako, Fashіon Bіrds, Marі St, а таксама расійскіх і беларускіх дызайнераў. Удзел у шоу быў платны як для бацькоў юных мадэляў, так і для іх саміх: сабраныя сродкі пайшлі на куплю неабходных рэчаў і падарункаў для юных пацыентаў РНПЦ дзіцячай анкалогіі, гематалогіі, імуналогіі.

Цягам некалькіх тыдняў дзеці з самых аддаленых куткоў Беларусі атрымлівалі з рук Дзеда Мароза і Снягуркі свае доўгачаканыя падарункі і віншаванні. А сімвалічным завяршэннем дабрачыннага марафону можна назваць навагодні спектакль «Чароўны свет» у Палацы Рэспублікі і маладзёжны баль у Палацы Незалежнасці ў Мінску.

На «галоўную ёлку краіны» прыехалі каля 4 тысяч дзяцей з усіх беларускіх рэгіёнаў. У гэтым свяце ўдзельнічалі пераможцы алімпіяд, творчых конкурсаў і спартыўных спаборніцтваў, лідары дзіцячых грамадскіх аб’яднанняў і арганізацый, а таксама тыя, хто застаўся без бацькоў, дзеці-інваліды, са шматдзетных і малазабяспечаных сем’яў, з сем’яў бежанцаў. Для многіх гэта была мара — трапіць на «прэзідэнцкую» ёлку, бо туды кожны год прыязджае Кіраўнік дзяржавы. У Палацы Рэспублікі паказалі інтэрактыўны спектакль з выкарыстаннем інфармацыйных тэхналогій і затым уручылі памятныя падарункі.

А напярэдадні праваслаўнага Раства Хрыстова ў Палацы Незалежнасці арганізатары правялі Беларускі навагодні баль. Яму папярэднічалі рэпетыцыі і, вядома, жорсткі адбор: выбіралі самых паспяховых і годных маладых грамадзян нашай краіны. Баль таксама ўвянчаўся ўручэннем падарункаў усім удзельнікам, сярод якіх была і флэшка. На ёй — не толькі захаваныя кадры з удзельнікамі балю, якія ўжо ўвайшлі ў гісторыю, але і ў цэлым — усё дзейства, што адбывалася ў Палацы Незалежнасці.

Нягледзячы на тое, што дзецям лягчэй верыць у цуды, многія прызнаваліся: не чакалі такой увагі з боку грамадства і вялікай колькасці падарункаў. Дарэчы, меры бяспекі падчас правядзення месячнай акцыі ў поўнай меры ўлічваліся.

Дабрачынныя мерапрыемствы пад назвай «Нашы дзеці» праводзяцца ў краіне ўжо на працягу 25 гадоў. І, трэба адзначыць, падчас іх часта ўзнікаюць і нават рэалізуюцца новыя цікавыя праекты, якія ініцыююцца, дарэчы, не заўсёды дарослымі. Да таго ж, многія арганізацыі абяцаюць дапамагаць не толькі ў перыяд святаў, але і на працягу ўсяго года. А сума матэрыяльнай дапамогі ў выглядзе неабходнага спецабсталявання, сувеніраў і салодкіх падарункаў, хоць яшчэ і не падлічвалася, хаця ўжо вядома, што перавысіла 2 мільёны беларускіх рублёў. Але, па вялікім рахунку, хіба можна вызначыць кошт усмешцы на шчаслівым твары дзіцяці?..

Аліса Гюнгер

Выбар рэдакцыі

Грамадства

Які хлеб любяць у Беларусі?

Які хлеб любяць у Беларусі?

У савецкія часы гандаль прапаноўваў пакупніку абмежаваны асартымент хлебабулачных вырабаў. У 1980-я нават у буйных крамах было ўсяго 3-4 найменні хлеба.

Грамадства

Дыхаць на поўныя грудзі. Міфы і праўда аб мамапластыцы

Дыхаць на поўныя грудзі. Міфы і праўда аб мамапластыцы

Прадстаўніцам прыгожага полу заўсёды хочацца нешта змяніць у сваёй знешнасці. І часам жанчыны рашаюцца на кардынальныя крокі.

Культура

Арганізатар імпрэз Дзіяна Краснашапка: Сёння людзі знаходзяцца ў сваіх коканах, але ж для таго і існуюць танцы ды спевы, каб здымаць стрэс, негатыў

Арганізатар імпрэз Дзіяна Краснашапка: Сёння людзі знаходзяцца ў сваіх коканах, але ж для таго і існуюць танцы ды спевы, каб здымаць стрэс, негатыў

Яна ўпэўнена сябе адчувае і ў нацыянальным строі, калі робіць цеста для вясельнага каравая, і ў блакітным футры Снягуркі, калі праводзіць ранішнік для дзетак, і ў шыкоўнай сукенцы пэўнай эпохі, калі выконвае аўтэнтычныя беларускія спевы пад гукі старажытных музычных інструментаў.

Грамадства

Паразуменне падчас капрамонту: праз штрафы ці дамаўленне?

Паразуменне падчас капрамонту: праз штрафы ці дамаўленне?

Культура выканання работ падчас капрамонту ў Беларусі кульгае, а тэхналогія — парушаецца, сведчаць спецыялісты Дзяржбуднагляда.