Вы тут

Агляд папулярных жаночых праграм для аперацыйнай сістэмы «Андроід»


У кожнага ўладальніка смартфона ўсталявана шмат праграм, якімі мы карыстаемся штодня і ў якія не заходзім тыднямі, захоўваючы на ўсялякі выпадак, пакуль у мабільніку хапае аперацыйнай памяці. Каб «прапампаваць» жаночыя тэлефоны, карэспандэнт «СГ» падрыхтавала сваю версію рэйтынгу найбольш цікавых і карысных праграм з Play Mаркет для прыгожага полу.


Здароўе і спорт

Пачну свой топ з адной з самых вядомых у свеце жаночых праграм «Flo». Па даных распрацоўшчыкаў, гэтым трэкерам жаночага цыкла і календаром авуляцыі карыстаецца больш за 165 мільёнаў жанчын па ўсім свеце. «Flo» — жаночы каляндар № 1 у ЗША па колькасці актыўнай аўдыторыі. Дарэчы, праграму стварала беларуская каманда.

Перад выкарыстаннем «Flo» можна выбраць сваю мэту — сачыць за цыклам, зацяжарыць ці адсочваць цяжарнасць. У першым варыянце выкарыстання каляндар разлічвае, які сёння дзень вашых месячных, падказвае, калі пачнецца авуляцыя і колькі дзён да пачатку новага цыкла. Штодня праграма інфармуе пра верагоднасць зацяжарыць, таму яна асабліва неабходна тым, хто жадае (ці наадварот, не хоча) стаць маці. У раздзеле «Парады» можна знайсці карысныя невялікія артыкулы пра жаночае здароўе, метады кантрацэпцыі, спартыўныя трэніроўкі, рэжым харчавання. Больш за тое: інфармацыя не проста разнастайная, але і персаналізаваная — тэмы нататак мяняюцца ў залежнасці ад дня цыклу.

Ёсць у праграме і курсы: «Месячныя без боляў», «Каранавірус: фертыльнасць і цяжарнасць», «Фітнес для маладых мам» і іншыя. На жаль, большасць з іх даступная для прэміум-акаўнтаў. Але да некаторых курсаў беларускі як жанчыны з радзімы праграмы нядаўна атрымалі бясплатны доступ. Функцыянаванне «Flo» забяспечвае, акрамя праграмістаў, больш за 80 урачоў з Еўропы і Паўночнай Амерыкі, якія ствараюць кантэнт пра здароўе. За навуковую інфармацыю адказваюць партнёры праекта, сярод якіх UNFPA, Еўрапейскі савет Калегія акушэрства і гінекалогіі і іншыя.

Адвечная тэма для большасці жанчын — жаданне скінуць некалькі кіло. Шмат праграм у Play Mаркет раяць, як дасягнуць такога выніку. Раскажу пра свой уласны вопыт на прыкладзе праграмы «Пахудзець для жанчын». Пры ўстаноўцы яна «спытала», якая мэта яе выкарыстання — скінуць вагу і трымацца ў тонусе, падцягнуць ягадзіцы, прыбраць тлушч з жывата, умацаваць і ўзмацніць мышцы? У залежнасці ад выбару праграма рэкамендавала комплекс трэніровак, разлічаны на 30 дзён, за якія павінен быць дасягнуты неабходны вынік. Займацца прыйшлося кожны дзень прыкладна па 10—15 хвілін. Хто хутчэй спраўляецца з заданнямі, можа, і раней выканаць дзённую норму. Адна трэніроўка змяшчае ад 15 да 20 практыкаванняў. Па кожным з іх ці ёсць таймер, ці напісана неабходная колькасць паўтораў. Для навічкоў у спорце, як я, асабліва карыснае будзе апісанне практыкаванняў і відэаролікі правільнага іх выканання прафесіяналамі. Курс я яшчэ не скончыла, але за два тыдні жаданага «мінуса» на вагах не ўбачыла. Усё ж такі, якімі б прадуманымі праграмы ні былі, але нельга цалкам ігнараваць «жывыя» кансультацыі з трэнерам і забываць пра абмежаванні ў ежы.

Сакрэты догляду

Тут для жаночай аўдыторыі — і ўрокі макіяжу, і пакрокавае навучанне прычоскам (пра гэта ніжэй), і парады па «Доглядзе за сабой». Менавіта на праграме з такой назвай я і спынюся. Праграма дзеліцца на пяць блокаў — «Аблічча», «Валасы», «Цела», «Фітнес», «Навінкі». Ёсць укладка «Выбранае», куды для зручнасці рэкамендуецца дадаць найбольш важныя артыкулы.

Крыху пра тое, якія рэкамендацыі знаходзяцца ў раздзелах. Напрыклад, першая катэгорыя («Аблічча») змяшчае парады па павелічэнні вуснаў у хатніх умовах, выдаленні налёту на зубах, доглядзе за кантактнымі лінзамі, практыкаванні фэйсбілдынгу і гімнастыку для вачэй, рэцэпты крэмаў, масак, скрабаў. У катэгорыі «Валасы» акцэнт зроблены на стварэнні дамашніх апалосківальнікаў для валасоў і масак для іх прыгажосці і росту. Ва ўкладцы «Цела» знойдзеце парады па доглядзе за рукамі, нагамі, рэкамендацыі па эпіляцыі ды іншае.

Праграма робіць акцэнт на «водным кантролі» — то-бок разлічвае, колькі вам неабходна выпіваць вады ў залежнасці ад вагі і фізічнай актыўнасці. Таксама прапануе настроіць напамін «выпіць кубачак».

Падобная да апісанай і наступная праграма — «ІLady». Яна нагадвае анлайн-часопіс для жанчын, які змяшчае шмат карысных (і не вельмі) артыкулаў на розныя тэмы. Рубрыкі тут — «Прыгажосць», «Здароўе», «Каханне», «Кулінарыя», «Дзеці» і «Псіхалогія». Гартаючы раздзелы, можна знайсці разнастайныя парады: ад таго, што рабіць, калі разбілі ртутны градуснік, да тэм для размовы на першым спатканні. Такая праграма — вартая ўвагі альтэрнатыва жаночым часопісам. Але, як я заўважыла, артыкулаў не вельмі шмат і яны рэдка мяняюцца (а па апісанні праграмы, павінны мяняцца штодня). Як сцвярджаюць распрацоўшчыкі, сярод пераваг «ІLady» — магчымасць занесці ўпадабаны артыкул у «Выбранае» і пачытаць яго ў любы час (нават без інтэрнэту).

Яшчэ адна тыповая праблема жанчын (ці, прынамсі, уладальніц доўгіх валасоў), акрамя таго, што сёння надзець, — якую прычоску зрабіць. На дапамогу прыйдзе праграма «Прычоскі пакрокава». Рубрыкатар тут наступны — «Базавыя», «Косы», «Крэатыўныя», «Хвасты», «Шышкі», «Для дзяцей». Усяго ў той версіі, што я ўстанавіла, налічыла апісанне амаль ста прычосак! Толькі адных хвастоў — 14 варыянтаў.

Тыя, каму надакучылі пастаянна раскіданыя валасы ці стандартныя «коскі» і «гулькі», — паспрабуйце. Рэкамендую!

Нататнікі

Для тых, хто любіць аналізаваць свой дзень, дзяліцца навінамі і ўражаннямі, але залішне сарамлівы ці скрытны, каб рабіць тое ў сацыяльных сетках, існуе праграма «Мой дзённік». Гэта лічбавізаваны варыянт упадабаных многімі дзяўчынкамі асабістых дзённікаў. Толькі тут з дапамогай пін-кода магчыма забяспечыць прыватнасць запісаў.

Націскаеш на «плюсік» у цэнтры галоўнай старонкі праграмы, і адкрываецца нататнік. А ў ім усё, як у звычайным месенджары, — смайлікі, карцінкі, магчымасць выбраць колер і шрыфт тэксту. Для тых, хто лянуецца набіраць, прадугледжана магчымасць запісаць свае разважанні ў аўдыяфармаце. Выдатная, на мой погляд, магчымасць для карыстальнікаў — экспарт нататкаў у ТХТ- і PDF-фарматы. Хто ведае, можа, з часам вырашыце апублікаваць свае мемуары!

Увогуле, існуе шмат разнастайных варыяцый тых праграм, якія я вам апісала. Спампоўвайце фарматы, што падабаюцца вам найбольш. І, нагадаю, у Play Маркет ёсць кароткае апісанне і каментарыі карыстальнікаў амаль для кожнай праграмы.

Марыя ДАДАЛКА

Фота Яна ХВЕДЧЫНА

Загаловак у газеце: «Косы», «Шышкі» і «Хвасты»

Выбар рэдакцыі

Грамадства

Ці варта засцерагацца ад вяртання анамальнай спякоты? Дзмітрый Рабаў расказаў пра надвор’е на астатнюю частку лета

Ці варта засцерагацца ад вяртання анамальнай спякоты? Дзмітрый Рабаў расказаў пра надвор’е на астатнюю частку лета

«Верхавіна лета» прайшла, і ўжо мала хто памятае, што першая дэкада чэрвеня была халаднаватай і з замаразкамі.

Грамадства

Усё што трэба ведаць пра пляжны сезон

Усё што трэба ведаць пра пляжны сезон

У апошнія тыдні на краіну абрынулася небывалая спякота... 

Калейдаскоп

Чым апырскаць памідоры ад фітафторы, калі на іх ужо завязі і кветкі

Чым апырскаць памідоры ад фітафторы, калі на іх ужо завязі і кветкі

Як і любую іншую хваробу, фітафтароз лягчэй папярэдзіць, чым лячыць.

Культура

Беразіно: цэнтр на шляху «з вараг у грэкі»

Беразіно: цэнтр на шляху «з вараг у грэкі»

Радзімазнаўства. Адрасы пісьменства. Сумесны праект Мінаблвыканкама і «Звязды».