Вы тут

Хатняя энцыклапедыя


Салата з рыбнымі кансервамі і апельсінам

Спатрэбіцца: сырок плаўлены — 2 шт., яйка курынае — 4 шт., кансервы рыбныя (сардзіны ў алеі ці ва ўласным соку) — 1 бляшанка, цыбуля рэпчатая — 0,5 шт., апельсін — 0,5 шт., арэхі грэцкія (здробленыя) — 3 ст. л., сыр цвёрды — 100 г, маянэз.

Выкладваем салату пластамі: 1 — плаўленыя сыркі, надзёртыя на буйной тарцы; 2 — маянэз; 3 — размятыя рыбныя кансервы; 4 — цыбуля (парэзаць маленькімі кубікамі і абдаць кіпенем, астудзіць); 5 — маянэз; 6 — яйкі, надзёртыя на буйную тарку; 7 — маянэз; 8 — апельсін ачысціць ад скуркі, падзяліць на долькі і парэзаць кубікамі; 9 — арэхі; 10 — маянэз; 11 — цвёрды сыр, надзёрты на дробнай тарцы; 12 — маянэз.

Зверху можна прысыпаць зяленівам.


Пячэнне «Сапраўднае мужчынскае»

Спатрэбіцца: для тварожнага пласта: тварог — 400 г, масла — 200 г, яйка — 1шт., мука — 2 шклянкі, соль — 0,25 ч. л., сода, гашаная воцатам ці лімонным сокам, — 1 ч. л., ванілін. Фруктовы слой: надзёртая морква — 2 шклянкі, дробна пасечаныя курага і чарнасліў — 2 шклянкі, цукар — 0,5 шклянкі (можна больш), вяршкі — 0,5 шклянкі, мёд — 4-5 ст. л., пасечаны лімон — 1 шт. Аўсяны пласт: аўсяныя шматкі — 2 шклянкі, масла — 100 г, пасечаныя грэцкія ці любыя іншыя арэхі — 1,5-2 шклянкі, цукар, змешаны з молатымі спецыямі (карыца, мускатны арэх, кардамон).

Для тварожнага цеста: змяшаць усе інгрэдыенты, кавалак памерам з кулак аддзяліць і прыбраць у маразілку, астатняе сфармаваць у «ком» і пакласці ў халадзільнік.

Для фруктовага слоя: высыпаць цукар на патэльню, дадаць моркву, памешваючы, абсмажваць, раствараючы цукар. Дадаць сухафрукты, выліць вяршкі і гатаваць на слабым агні 15—20 хвілін. Дадаць лімон, мёд, можна сюды ж усыпаць арэхі.

Для аўсянага пласта: растапіць масла, дадаць цукар, аўсяныя шматкі, абсмажыць іх, памешваючы.

Збіраем пячэнне: раскачваем тварожнае цеста, кладзём на бляху (пергамент), пасыпаем арэхамі. Зверху выкладваем фруктовы пласт, на яго — аўсяны. Дастаём з маразілкі тварожны «запас» — надзіраем яго на буйной тарцы зверху і пасыпаем цукрам са спецыямі. Выпякаем да 30 хвілін пры 180 °С і 10—15 хвілін пад грылем. Пячэнне атрымліваецца далікатнае, з начынкай-«цягучкай» і хрумсткай скарыначкай!


Замярзае шкло ў машыне — што рабіць?

Замярзаць шкло можа і на цалкам спраўным аўтамабілі, то-бок, гэта не паломка, а проста фізіка, і ад яе нікуды не дзецца. Але можна паспрабаваць вырашыць праблему.

Прычына з'яўлення банальная — кандэнсат. Чым халадней на вуліцы, тым цяплей у машыне. Пакуль машына працуе, на шкло дзьме печка. Пасля таго як печка адключаецца, цяпло ў салоне трымаецца яшчэ нейкі час, але абдзімання ўжо няма. У выніку ўтвараецца кандэнсат (ён можа быць як звонку, так і ўнутры) і замярзае — вось вам і наледзь.

Каб кандэнсат не ўтвараўся ад цёплага паветра, трэба зрабіць паветра ў салоне такім жа халодным, як і на вуліцы. Глушым рухавік — выключаем печку — апускаем шкло ці адкрываем дзверы. Галоўнае пастаяць такім чынам пару хвілін, каб цёплае паветра выйшла.

Ёсць яшчэ адзін метад: звычайная соль выдатна ўбірае вільгаць. Калі насыпаць яе ў нейкую ёмістасць, альбо ў мяшочак з тканіны (а то і ў шкарпэтку) і пакласці ў аўто, то залішнія вадзяныя пары паглынуцца ёю, замярзанне шкла знутры паменшыцца.

А можна выкарыстоўваць для гэтага сілікагель — празрыстае і цвёрдае рэчыва, якое ўбірае вільгаць з паветра нашмат лепш і хутчэй. Дастаткова насыпаць яго ў анучку і пакласці альбо на панэль, альбо ў дверы. Дзе ўзяць сілікагель? Ён ёсць у скрынках з абуткам (ідзе ў маленькіх мяшочках). Таксама каціны сіліконавы напаўняльнік, гэта якраз і ёсць гэта рэчыва.

А яшчэ важна рэгулярна пазбаўляцца ад вільгаці на дыванках для ног у салоне.

Выбар рэдакцыі

Грамадства

Чаму 14 лістапада варта лічыць днём яднання?

Чаму 14 лістапада варта лічыць днём яднання?

З прапанаваных для абмеркавання дат, адна з якіх можа стаць Днём народнага адзінства — 14 лістапада.

Грамадства

Анёл па імені Алена. Як прадпрымальніца стала сацработнікам

Анёл па імені Алена. Як прадпрымальніца стала сацработнікам

Сацыяльны работнік тэрытарыяльнага цэнтра сацыяльнай абароны насельніцтва Маскоўскага раёна Мінска Алена Сцепаненка працуе на сваім месцы каля двух гадоў.

Эканоміка

Магілёўскі прадпрымальнік — пра вытворчасць на перыферыі і адказнасць перад сабой і людзьмі

Магілёўскі прадпрымальнік — пра вытворчасць на перыферыі і адказнасць перад сабой і людзьмі

Сідаравічы — невялікі аграгарадок паміж Магілёвам і Быхавам. Менавіта тут знаходзіцца вядомая ў Магілёўскім раёне фермерская гаспадарка Сяргея Куцанава.