Вы тут

Вольга Новік: Хацелася б, каб моладзь вярталася на малую радзіму і стварала тут сем’і


Прэстыж роднай мовы ды будучыня вёсак

Гэтыя пытанні найбольш хвалююць Вольгу НОВІК — дэлегата VI Усебеларускага народнага сходу, настаўніцу беларускай мовы і літаратуры Рудскай СШ (Іванаўскі раён, Брэсцкая вобласць).


З Прэзідэнтам Беларусі Вольга Новік ужо сустракалася раней. Пяць гадоў таму Аляксандр Лукашэнка асабіста ўзнагароджваў жанчыну, адзіную тады прадстаўніцу з Іванаўскага раёна, ордэнам Маці. «Для мяне гэта быў хвалюючы момант», — дзеліцца Вольга Іванаўна. Кацярына, Дар’я, Іван, Міхаіл і Ульяна — яе любімыя дзеці. Старэйшая дачка Каця таксама філолаг па адукацыі, жыве ў Брэсце і гадуе маленькага Глеба. Даша працуе галоўным бухгалтарам у ТАА «СТІСГА Пінскае» ў вёсцы Бобрык Пінскага раёна, Ваня — курсант Ваеннай акадэміі, Міша і Ульяна — вучні Рудскай сярэдняй школы.

Сям’я Новік жыве ў вёсцы Сухое, адкуль родам настаўнік-дэлегат і дзе да 2016 года дзейнічала базавая школа. У 1986 годзе Вольга Іванаўна закончыла Сушанскую васьмігодку, навучанне ў старэйшых класах працягнула ва ўстанове, дзе цяпер настаўнічае. Пасля школы жанчына паступіла ў Рагачоўскае педвучылішча. Скончыўшы яго, уладкавалася выхавальнікам у дзіцячы сад на Іванаўшчыне, выйшла замуж. Неўзабаве ў маладой сям’і нарадзіўся першынец Кацярынка. Затым жыццё Вольгі Новік склалася як у той прыказцы: дзе нарадзілася, там і згадзілася. Была ў роднай школе настаўніцай пачатковых класаў, педагогам-арганізатарам, завочна навучалася ў Брэсцкім дзяржаўным універсітеце імя А. С. Пушкіна, з 2013 па 2016 год — дырэктар Сушанскай БШ.

Навіну пра тое, што яна прадставіць на народным сходзе Іванаўшчыну, успрыняла станоўча. Як беларускі філолаг у тэму згадала драму класіка «Раскіданае гняздо». Героі купалаўскага твора Сымон і Зоська ў фінале ўцякаюць ад пажару «на вялікі сход! Па Бацькаўшчыну!» Калі б у яе была магчымасць выступіць на форуме, у сваім слове абавязкова закранула б пытанне прэстыжу роднай мовы. Безумоўна, як шматдзетную маці, педагога і класнага кіраўніка яе турбуюць пытанні выхавання сучаснай моладзі. «Дзеці цяпер вельмі мала чытаюць. Мае ж аднагодкі пазнавалі жыццё дзякуючы мастацкай, і не толькі, літаратуры. Інтэрнэт, на жаль, замяніў кнігі. З беларускіх асабліва люблю творы Караткевіча, Шамякіна, Мележа. Алесь Загорскі з рамана “Каласы пад сярпом тваім” — мой любімы герой. Самастойны, хоць вельмі малады, дзейсны, моцны духам патрыёт — такі і ёсць мой ідэал грамадзяніна», — удакладняе дэлегат.

Акрамя педагагічнай работы, Вольга Новік яшчэ дэпутат Рудскага сельскага савета. «Як дэпутата мяне непакоіць будучыня невялікіх раённых цэнтраў і вёсак. Я працую ў сельскай школе, колькасць навучэнцаў у якой з году ў год змяншаецца. Хацелася б, каб моладзь, атрымаўшы адукацыю, вярталася на малую радзіму і стварала тут сем’і. Добра разумею, што маладым кадрам для гэтага неабходны праца і добры заробак. Адкрыццё невялікіх вытворчасцей, стварэнне фермерскіх гаспадарак, развіццё цяплічнага бізнесу ў Рудску і іншых населеных пунктах, на мой погляд, — добрае вырашэнне гэтай праблемы», — лічыць Вольга Новік.

Наталля КРЫВЕЦКАЯ, фота аўтара

Выбар рэдакцыі

Эканоміка

Электрадамы становяцца ўсё больш папулярныя. А тэндэнцыя індывідуальнага будаўніцтва — сучасныя хутары

Электрадамы становяцца ўсё больш папулярныя. А тэндэнцыя індывідуальнага будаўніцтва — сучасныя хутары

Сёлета плануецца ўвесці ў эксплуатацыю 4 млн квадратных метраў агульнай плошчы жылля.

Грамадства

Не параўноўвайце сябе з іншымі. Як таксічныя людзі атручваюць наша жыццё?

Не параўноўвайце сябе з іншымі. Як таксічныя людзі атручваюць наша жыццё?

У нашым акружэнні практычна заўсёды знойдзецца песіміст, нечым пакрыўджаны, запальчывы чалавек, вакол якога заўсёды скандалы і звадкі. 

Грамадства

Па ўсёй краіне наступіў час школьных базараў

Па ўсёй краіне наступіў час школьных базараў

Скідкі, растэрміноўкі і шырокі асартымент