Вы тут

Чым жывуць беларусы Расіі і якія гуманітарныя праекты ў цэнтры ўвагі нашых землякоў


Аксана Солапава — першы намеснік старшыні Федэральнай нацыянальна-культурнай аўтаноміі беларусаў Расіі, намеснік дэкана гістарычнага факультэта Маскоўскага дзяржаўнага ўніверсітэта імя М.  В.  Ламаносава — неаднойчы прымала ўдзел у міжнародных мерапрыемствах, якія ладзіліся Міністэрствам інфармацыі Рэспублікі Беларусь і Выдавецкім домам «Звязда». А гэтымі днямі ўдзельнічае ў VI Усебеларускім народным сходзе. Напярэдадні Мінскай міжнароднай кніжнай выстаўкі-кірмашу і Міжнароднага сімпозіума літаратараў «Пісьменнік і час» мы скарысталіся магчымасцю, каб даведацца пра тое, чым жывуць беларусы Расіі і якія гуманітарныя праекты ў цэнтры ўвагі нашых землякоў.


— Аснова культуры любога народа  — каштоўнасці, якія фарміруюць этнічную самасвядомасць. І ўсе мы, хто мае дачыненне да Федэральнай нацыянальна-культурнай аўтаноміі беларусаў Расіі, працуем дзеля таго, каб вывучаць, захоўваць і папулярызаваць беларускую культуру. Адказ на пытанне «Дзеля чаго нешта робіцца?» і ёсць той гуманітарны складнік, які вызначае любыя сацыяльныя працэсы і дыскусіі ў грамадстве. Таму, на мой погляд, у першую чаргу варта звяртаць увагу на адукацыю, бо яна, па сутнасці, вызначае, якія людзі потым будуць працаваць у розных сферах. Якімі яны сфарміруюцца, такой і будзе краіна і яе развіццё. Таму гуманітарныя праекты павінны быць у цэнтры ўвагі.

Гуманітарная дзейнасць Федэральнай нацыянальна-культурнай аўтаноміі беларусаў Расіі працягвае функцыянаваць незалежна ад пандэміі. Шмат з запланаваных праектаў мы рэалізавалі як анлайн-, так і ў афлайн-фарматах, у тым ліку пры падтрымцы Федэральнага агенцтва па справах нацыянальнасцей Расіі. Некаторыя праекты напоўнілі новым гучаннем і зместам, працягваем іх ажыццяўленне. Дзеля прыкладу распавяду пра некалькі.

Перш за ўсё хачу адзначыць, што мы вядзём актыўную публікацыйную дзейнасць. У нас ёсць шэраг выданняў, якія вядомы ўжо сярод беларусаў свету. Гэта і выданні, прысвечаныя памяці Пятра Машэрава, і навуковы зборнік «Рэспубліка-партызанка», які распавядае пра гісторыю беларускага партызанскага руху падчас Вялікай Айчыннай вайны. Зараз у нас рыхтуецца новае выданне, якое распавядае пра беларускія вёскі ў Сібіры на прыкладзе адной з вёсак Томскай вобласці. Праект падтрымалі Федэральная нацыянальна-культурная аўтаномія беларусаў Расіі і гістарычны факультэт Маскоўскага дзяржаўнага ўніверсітэта імя М.  В.  Ламаносава. Спадзяёмся, што ў выніку атрымаем цікавае фундаментальнае даследаванне.

Таксама мы працуем над захаваннем сярод моладзі памяці пра Вялікую Айчынную вайну. У першую чаргу гэта наш расійска-беларускі конкурс студэнцкіх навуковых прац «Агульны шлях да Вялікай Перамогі», які рэалізоўваюць гістарычныя факультэты МДУ імя М. В. Ламаносава і БДУ сумесна з ФНКА беларусаў Расіі.

Беларусы Расіі прымаюць удзел у рэалізацыі сумеснай міжнароднай расійска-беларускай магістарскай праграмы, якая мае назву «Гісторыя беларускай дыяспары». Пагадненне аб адкрыцці падпісалі рэктары БДУ і МДУ імя М. В. Ламаносава на Форуме рэгіёнаў Беларусі і Расіі ў 2019 годзе. Ёсць некалькі фактараў, якія робяць гэтую праграму эксклюзіўнай. Напрыклад, гэта першая расійска-беларуская магістарская праграма з двайным дыпломам. Апроч таго, у рамках праграмы ёсць асобны лекторый, дзе пра свае вопыт і  дзейнасць распавядаюць лідары грамадскіх арганізацый Расіі, Беларусі і свету.

Але ёсць у такім супрацоўніцтве ў нас і  пэўныя пытанні, якія чакаюць вырашэння. Напрыклад, нам патрэбна больш бюджэтных месцаў на магістарскія праграмы, бо да іх ёсць цікавасць, конкурс. Таму, на мой погляд, ёсць сэнс у павелічэнні кантрольных лічбаў прыёму адрасна дзеля сумесных магістарскіх праграм. Таксама існуе шэраг складанасцей, якія высвятляюцца падчас стварэння гэтых праграм. Лічу, што іх вырашэнне знаходзіцца ў плоскасці міждзяржаўных пагадненняў, бо яны па-за межамі кампетэнцыі грамадскіх аб’яднанняў.

Яшчэ адзін праект беларусаў Расіі «Вера і вернасць» датычыцца ўшанавання памяці аб Вялікай Айчыннай вайне. Яго мы з 2016 года рэалізоўваем у вёсцы Пагост Жыткавіцкага раёна Гомельскай вобласці Беларусі. У рамках гэтага праекта сумесна з іншымі грамадскімі арганізацыямі і мясцовай адміністрацыяй на дадзены момант мы ўстанавілі мемарыял памяці загінуўшых у першыя месяцы вайны мясцовых жыхароў, аднавілі храм, штогод праводзілі навуковыя канферэнцыі, удзел у якіх прымалі вядучыя гісторыкі Беларусі і Расіі, кіраўнікі беларускіх грамадскіх аб’яднанняў з РФ. Безумоўна, вялікую ролю ў існаванні гэтага праекта адыгрываюць жыхары вёскі Пагост, адносіны з якімі мы вельмі шануем. Адміністрацыя Жыткавіцкага раёна заўсёды падтрымлівае нашы ініцыятывы і дапамагае іх рэалізоўваць.

Зараз, і мне прыемна пра гэта казаць, намеціліся новыя напрамкі ўзаемадзеяння, якія актыўна падтрымліваюць беларускія грамадскія арганізацыі. Адзін з іх — выбудоўванне кантактаў з Паўночна-Каўказскім рэгіёнам. Справа ў тым, што ў шматнацыянальным Дагестане жывуць і беларусы таксама. Там ёсць цікавыя архівы з  дакументальнымі сведчаннямі іх гісторыі. І гістарычны факультэт Дагестанскага дзяржаўнага ўніверсітэта выступіў з ініцыятывай наладзіць супрацоўніцтва з гістарычным факультэтам Беларускага дзяржаўнага ўніверсітэта, у тым ліку і  ў межах гэтай навуковай праблематыкі. Літаральна на мінулым тыдні з удзелам ФНКА беларусаў Расіі мы правялі навуковую канферэнцыю, якая была прысвечана ўніверсітэцкаму ўзаемадзеянню БДУ, МДУ імя М.  В.  Ламаносава і ДДУ. Таксама ў  рамках гэтага супрацоўніцтва пры ўдзеле маладзёжнага крыла беларусаў Расіі зараз ідзе работа над зборнікам навуковых артыкулаў маладых даследчыкаў Расіі і Беларусі аб пытаннях нацыянальнай палітыкі і міжнацыянальных зносін, што, безумоўна, значна як для гістарычнай навукі, так і для развіцця ўнутранай палітыкі любой шматнацыянальнай краіны.

Алена ДРАПКО

Загаловак у газеце: Супрацоўніцтва з двухбаковымі перспектывамі

Выбар рэдакцыі

Грамадства

Гродзенскі заапарк без страт выходзіць з зімоўкі і рыхтуецца да новага сезона

Гродзенскі заапарк без страт выходзіць з зімоўкі і рыхтуецца да новага сезона

Літаральна нядаўна з'явіўся і першы ў гэтым годзе прыплод.

Грамадства

Анёл па імені Алена. Як прадпрымальніца стала сацработнікам

Анёл па імені Алена. Як прадпрымальніца стала сацработнікам

Сацыяльны работнік тэрытарыяльнага цэнтра сацыяльнай абароны насельніцтва Маскоўскага раёна Мінска Алена Сцепаненка працуе на сваім месцы каля двух гадоў.

Эканоміка

Магілёўскі прадпрымальнік — пра вытворчасць на перыферыі і адказнасць перад сабой і людзьмі

Магілёўскі прадпрымальнік — пра вытворчасць на перыферыі і адказнасць перад сабой і людзьмі

Сідаравічы — невялікі аграгарадок паміж Магілёвам і Быхавам. Менавіта тут знаходзіцца вядомая ў Магілёўскім раёне фермерская гаспадарка Сяргея Куцанава.