Вы тут

Медыкі расказалі, як прышчапляліся ад COVІD-19


У Беларусі завяршаецца планавая вакцынацыя медработнікаў расійскай вакцынай супраць каранавіруса «Спадарожнік V». Нагадаем, што іх пачалі прышчапляць першымі, бо медыкі знаходзяцца ў групе рызыкі. Міністэрства аховы здароўя размеркавала вакцыну па рэгіёнах — у залежнасці ад заявак медустаноў. Папярэдне былі адпрацаваныя ўсе пытанні захавання халадзільнага ланцуга.


Падчас прышчэпкі старшая медыцынская сястра  Таццяна Крыўнюк.

З ліку медработнікаў, якія былі заяўлены на першы этап вакцынацыі, ужо на пачатак гэтага тыдня ў Віцебскай, Гомельскай, Гродзенскай абласцях і ў Мінску было прышчэплена 100 % ахвотных, у астатніх рэгіёнах да гэтай лічбы наблізіліся да канца тыдня. Да пачатку наступнага тыдня вакцынацыя медработнікаў мусіць быць завершана, паралельна прышчэпкі пачнуць рабіць работнікам устаноў адукацыі, інтэрнатаў, дамоў састарэлых і сацыяльных службаў — прадстаўнікам усіх тых прафесій, якія шмат кантактуюць з людзьмі.

А пакуль мы паразмаўлялі з медыкамі, якія атрымалі вакцыну ад каранавіруса. 11-я сталічная паліклініка была адной з першых у Мінску і краіне ў цэлым, дзе пачалі рабіць гэтыя прышчэпкі.

Таццяна Крыўнюк, старшая ўчастковая медыцынская сястра 1-га аддзялення агульнай практыкі, была сярод тых, хто зрабіў прышчэпку.

— За ўвесь перыяд маёй работы ў медыцыне мінулы год быў самы цяжкі. Было шмат і знаёмых, і пацыентаў, якіх, на вялікі жаль, не ўдалося выратаваць. Калі ўсё гэта бачыш, працуючы ва ўчастковай службе — а яна адной з першых адчула на сабе маштаб распаўсюджвання гэтай інфекцыі, — хочацца неяк застрахавацца ад хваробы.

Ніякіх пабочных эфектаў пасля прышчэпкі ў медыка не было, акрамя болю ў месцы ўколу, які за пару дзён прайшоў.

— Пры надаўліванні адчуваўся боль у месцы ін'екцыі. Але гэта не выклікала вялікага дыскамфорту, — кажа Таццяна Яўгенаўна.

Страху заразіцца паміж першай і другой прышчэпкамі таксама не было, нягледзячы на тое што працуе медыцынская сястра якраз на прыёме пацыентаў разам з урачом агульнай практыкі.

— У нас ёсць алгарытм работы ў сродках індывідуальнай аховы. Наведвальнікі і пацыенты строга прытрымліваюцца масачнага рэжыму. Таму вялікіх апасенняў няма.

Дадаткова ніякіх мер медык не прымала, акрамя вітамінатэрапіі — пастаралася насыціць свой рацыён вялікай колькасцю садавіны і гародніны.

Намеснік галоўнага ўрача па медыцынскай экспертызе і рэабілітацыі 11-й гарадской паліклінікі Ірына Ісаева кажа, што адразу прыняла рашэнне прышчапляцца.

— Медыкі — тая катэгорыя, якая найчасцей сустракаецца з хворымі і больш за ўсё падвяргаецца рызыцы заражэння. Паколькі з'явілася магчымасць вакцынавацца, вырашыла абараніць сябе ад хваробы. Так атрымалася, што мы сталі аднымі з першых.

Ніякіх пабочных эфектаў Ірына Уладзіміраўна таксама не адчула.

— Хіба што балючасць падчас увядзення вакцыны, але яна такая ж, як і падчас увядзення іншага прэпарата. Пасля ніякіх адчуванняў не было — ні слабасці, ні тэмпературы.

Дадатковым спосабам захаваць здароўе падчас трох тыдняў да наступнай прышчэпкі ўрач называе фрукты, гародніну і мёд.

Святлана Масюк, старшая медыцынская сястра аддзялення фізіятэрапіі 11-й гарадской паліклінікі, таксама сярод тых, хто вырашыў вакцынавацца. У чэрвені мінулага года яна атрымала станоўчы тэст на каранавірусную інфекцыю. Праўда, перахварэла ў лёгкай форме — без пнеўманіі.

— Зберагчы ад захворвання сябе, сваіх блізкіх і іншых людзей, якія мяне акружаюць, — такі быў мой матыў прышчапіцца, — кажа Святлана Мікалаеўна.

Пасля прышчэпкі ў яе з'явіліся лёгкія катаральныя сімптомы — слабасць, закладзенасць носа, нязначна паднялася тэмпература. Праз два дні ўсё прайшло. У найбліжэйшы час медык атрымае другую дозу вакцыны.

На мінулым тыдні ў аўтарытэтным брытанскім медыцынскім часопісе The Lancet быў апублікаваны артыкул, які даказвае эфектыўнасць расійскай вакцыны «Спадарожнік V». Вакцына, дарэчы, названа ў гонар першага спадарожніка, які запусціў Савецкі Саюз, абагнаўшы ў касмічнай гонцы ЗША. Яна мае эфектыўнасць 91,6 % праз 21 дзень пасля першага ўколу, што ўсяго на некалькі працэнтаў ніжэй за Pfіzer-BіoNTech і Moderna.

На мінулым тыдні ў Беларусь паступіла чарговая партыя расійскай вакцыны — 40 тысяч. У пачатку сакавіка мяркуецца атрымаць яшчэ 100 тысяч вакцын. Паводле слоў міністра аховы здароўя Дзмітрыя Піневіча, у канцы сакавіка пачнецца масавая вакцынацыя ўсіх ахвотных:

— У канцы сакавіка мы плануем масавы выхад вакцыны айчыннай вытворчасці разам з нашымі расійскімі калегамі. Тады пачнём прышчапляць усе катэгорыі насельніцтва: тых, хто выявіць жаданне і ў каго не будзе супрацьпаказанняў, — сказаў міністр.

Раней кіраўнік Міністэрства аховы здароўя паведамляў, што за студзень, люты, сакавік і красавік плануецца вакцынаваць 1,2 мільёна насельніцтва, а затым выйсці на паказчык у 5—5,5 мільёна прышчэпленых ад каранавіруснай інфекцыі. У некаторых паліклініках ужо збіраюць даныя пра жадаючых прышчапіцца.

Што датычыцца вытворчасці расійскай вакцыны ў Беларусі, то для гэтых мэт будуць задзейнічаны дзве пляцоўкі «Белмедпрэпаратаў» у Мінску і магутнасці віцебскага прадпрыемства «БелВітуніфарм».

У памятцы міністэрства аховы здароўя Расіі апісаны непажаданыя рэакцыі пасля ўвядзення «Спадарожніка V». Гэта павышэнне тэмпературы цела і дрыжыкі, болі ў суставах, болі ў мышцах, павышаная стамляльнасць, агульнае недамаганне, галаўны боль, балючасць месца ін'екцыі, ацёчнасць, павелічэнне крованапаўнення сасудаў тканкі. Рэакцыі могуць з'явіцца ў першыя і другія суткі пасля прышчэпкі і праходзяць на працягу трох наступных дзён. Дзеля справядлівасці трэба адзначыць, што амаль такія ж пабочныя рэакцыі могуць выклікаць і вакцыны іншых вытворцаў, у прыватнасці Pfіzer-BіoNTech і Moderna, якія цяпер выкарыстоўваюцца ў Еўропе і ЗША. Некаторыя медыкі выказваюць меркаванне, што менавіта ў людзей, якія перанеслі каранавірус, часцей з'яўляюцца пабочныя рэакцыі на прышчэпку.

Алена КРАВЕЦ

Фота БЕЛТА

Выбар рэдакцыі

Палітыка

Аляксандр Лукашэнка: Мы родную зямлю, незалежнасць і суверэнітэт нікому не аддадзім. Мы ў любым выпадку выстаім!

Аляксандр Лукашэнка: Мы родную зямлю, незалежнасць і суверэнітэт нікому не аддадзім. Мы ў любым выпадку выстаім!

 У Брэсцкай крэпасці прайшла цырымонія, прысвечаная 80-годдзю з дня пачатку Вялікай Айчыннай вайны.

Грамадства

Сёння — 80 гадоў з дня пачатку Вялікай Айчыннай вайны

Сёння — 80 гадоў з дня пачатку Вялікай Айчыннай вайны

У Беларусі Дзень усенароднай памяці ахвяр Вялікай Айчыннай вайны — памятная дата.