Пра гэта паведаміў Андрэй ЛАБОВІЧ, першы намеснік міністра працы і сацыяльнай абароны. Па яго словах, 2020 год быў асаблівы для рынку працы. Але нават ва ўмовах пандэміі сітуацыю ўдалося трымаць у стабільнасці — не адбылося масавых звальненняў. Гэта стала магчымым у тым ліку дзякуючы прынятым рашэнням па падтрымцы прадпрыемстваў і асобных катэгорый грамадзян.
«Пік вымушанай няпоўнай занятасці прыйшоўся на красавік-май. Ужо ў снежні гэтыя аб'ёмы былі ў два разы меншыя, чым у маі. Узровень беспрацоўя, разлічаны па метадалогіі Міжнароднай арганізацыі працы, па лістападаўскім даследаванні склаў 4,1 працэнта. Гэта эканамічна абгрунтаваны, нармальны паказчык. У той жа час у нашых суседзяў Літвы, Украіны такі паказчык на ўзроўні 10 працэнтаў, у краінах Еўрапейскага саюза 6-7 працэнтаў», — сказаў першы намеснік міністра.
Андрэй Лабовіч падзяліўся перспектывамі пяцігодкі ў садзейнічанні занятасці. Асноўным інструментам палітыкі ў галіне будзе рэалізацыя дзяржаўнай праграмы «Рынак працы і садзейнічанне занятасці», у якой ключавым момантам міністэрства ставіць занятасць праз рэалізацыю актыўных мер. У першую чаргу, гэта працаўладкаванне, перанавучанне на запатрабаваныя прафесіі.
«Тыя, хто хоча працаваць, у стане знайсці работу. Сёння ёсць каля 78 тысяч вакансій у адпаведным агульнарэспубліканскім банку. Пры гэтым колькасць афіцыйна зарэгістраваных беспрацоўных, тых, хто звярнуўся па дапамогу, менш чым 10 тысяч. Хто хоча, можа, калі не сам, то з дапамогай дзяржавы, вырашыць пытанне працаўладкавання», — падкрэсліў Андрэй Лабовіч.
Па яго словах, міністэрства ставіць задачу на пяцігодку — падтрыманне ўзроўню беспрацоўя ў 4,2 працэнта.
Асабліва адзначыў эксперт у выступленні Прэзідэнта на Усебеларускім народным сходзе палажэнні па аплаце працы бюджэтнікаў.
«Тут мы дакладна для сябе разумеем стратэгію на пяцігодку: да канца 2025 года павінны выйсці па заробках педагагічных работнікаў на ўзровень сярэдняй заработнай платы па краіне, па ўрачах — на 150 працэнтаў, — дадаў чыноўнік. — Узровень заработнай платы да 2025 года (для бюджэтнікаў усіх катэгорый. — «Зв.») павінен складаць не менш як 80 працэнтаў сярэдняга заробку па краіне, каб не было расслаення нават у катэгорыі бюджэтнага сектара».
Ён звярнуў увагу, што не забудуць і пра бюджэтнікаў галіны сацыяльнага абслугоўвання, работнікаў культуры, у якіх заробак не дацягвае да сярэдняга па бюджэтнай сферы ў памеры 1006 рублёў (вынік мінулага года).
Марыя ДАДАЛКА
Велізарнае пачуццё адказнасці за будучае краіны.
Міністр працы і сацыяльнай абароны аб тым, як будуць расці выплаты.
Зрабіўшы якасць неад’емнай часткай іміджу Беларусі як краіны, займацца ёй неабходна пастаянна і ва ўсіх напрамках.
