Вы тут

Сланечнікавы алей: як выбраць і захоўваць


Чым адрозніваецца нерафінаваны сланечнікавы алей ад рафінаванага? А таксама як правільна выбраць і захоўваць гэты прадукт?


Па словах экспертаў, калі смажыць на нерафінаваным алеі, то ўсё, што надае яму пах, колер і смак, — прыродныя араматызатары, вітаміны, мінералы, кіслоты — пры нагрэве хутка разбураюцца, а такі алей «прыпраўляе» ежу канцэрагенамі і транстлушчамі. Таму раз і назаўсёды трэба запомніць, што сланечнікавы рафінаваны алей — для высокіх тэмператур, а любы нерафінаваны — хоць сланечнікавы, хоць аліўкавы — для салатаў, соусаў і заправак.

Амаль усе ведаюць, што сярод нерафінаванага аліўкавага алею найбольш карысны той, на этыкетцы якога напісана Extra vіrgіn. Так можна маркіраваць толькі алей першага халоднага адціскання, гэта значыць самага камфортнага для нашага арганізма.

Але і сланечнікавы нерафінаваны алей таксама бывае больш і менш карысны. Сланечнікавы, як і любы іншы алей, здабываюць двума спосабамі. Самы распаўсюджаны — экстракцыя. Семачкі чысцяць, здрабняюць і заліваюць растваральнікамі. Атрыманую сумесь сепарыруюць, дыстылююць, апрацоўваюць парай. Атрымліваць алей так, нягледзячы на шматлікія маніпуляцыі, вельмі выгадна, таму што з семкі адціскаецца амаль усё, а ўсе сляды нафтапрадуктаў выдаляюцца. Вось толькі з-за высокіх тэмператур і агрэсіўнай «хіміі» знікае амаль уся біялагічная карысць. На ўпакоўках з такім нерафінаваным алеем ніколі не напішуць, па якой методыцы ён атрыманы.

А калі алей здабыты халодным прэсаваннем, то гэта трапіць на этыкетку абавязкова. Бо такі прадукт — проста скарбніца вітамінаў. Семачкі або аліўкі толькі чысцяць, здрабняюць і прэсуюць. Ніякага нагрэву — толькі механічная чыстка ад асадку. Каштуе яно, вядома, даражэй, бо з семак такім асцярожным экалагічным спосабам можна здабыць толькі 20 % алею, а заплаціць давядзецца за ўсе сто.

Свежасць — гэта адзін з галоўных крытэрыяў усіх раслінных алеяў. Але складанасць у тым, што калі хлеб чарсцвее, малако пракісае і піць яго немагчыма, то псаванне прадукту не такое відавочнае — і цвіллю рэдка пакрываюцца, і змену смаку не кожны заўважыць. Таму вельмі важна выкарыстоўваць алей у рамках тэрмінаў яго прыдатнасці.

Пасля адкаркоўвання нерафінаваны сланечнікавы алей прагаркае ўсяго за месяц. І нават калі на выгляд і смак ён здаецца нармальным, то лепш яго не ўжываць, бо ўнутры ўтварыліся таксіны: эпаксіды, альдэгіды, кетоны. Іх значна больш у алеі, які няправільна захоўваюць.

Калі прыносіце алей дадому, лепш пераліць яго ў цёмную шкляную бутэльку. Некаторыя ставяць такую тару побач з акном, дзе прамыя сонечныя прамяні, або побач з плітой ці ракавінай. Ультрафіялет і павышаная тэмпература актывуюць акісляльныя працэсы. Лепш захоўваць бутэльку з такім прадуктам у цёмным халодным месцы, але не ў халадзільніку.

Дарэчы, у фрыцюры або на патэльні неабавязкова выкарыстоўваць сланечнікавы рафінаваны алей, калі ў продажы ёсць той, што ад іншых культур. Таннейшы, напрыклад, кукурузны. Калі ён якасна ачышчаны, то розніцы не будзе, таму што ўсе рафінаваныя алеі пазбаўляюцца смаку і паху. А вось замяняць рафінаваны алей пры смажанні якім-небудзь экзатычным нерафінаваным небяспечна. Для высокіх тэмператур ніякі нерафінаваны алей не падыходзіць.

Алена КРАВЕЦ

Выбар рэдакцыі

Грамадства

На Гомельшчыне актыўна развіваюць валанцёрскі рух

На Гомельшчыне актыўна развіваюць валанцёрскі рух

Форма сацыяльнай актыўнасці падлеткаў.

Культура

Чым сёлета будзе здзіўляць наведвальнікаў «Славянскі базар у Віцебску»?

Чым сёлета будзе здзіўляць наведвальнікаў «Славянскі базар у Віцебску»?

Канцэрт для дзяцей і моладзі, пластычны спектакль Ягора Дружыніна і «Рок-панарама».