Улоў цаной у жыццё. Наколькі трывалы цяпер лёд?

Цёплае веснавое сонца пакрысе «пад'ядае» лёд. Нягледзячы на гэтую акалічнасць, на вадаёмы працягваюць масава адпраўляцца рыбакі. Вось і ў мінулыя выхадныя каля затокі ракі Свіслач у Гродзенскім раёне на лёдзе знаходзіліся дзясяткі аматараў падлёднага лову. Але наколькі ён цяпер трывалы?

Па звестках Рэспубліканскага цэнтра па гідраметэаралогіі, кантролі радыеактыўнага забруджвання і маніторынгу навакольнага асяроддзя, на сёння ў краіне амаль не засталося вадаёмаў, на якіх адзначалася б трывалае ледзяное покрыва. Яно і нядзіўна: усё-ткі апошнім часам назіраецца істотны «плюс», сваю лепту ўносяць і перыядычныя дажджы. А гэта значыць, што выратавальныя сем сантыметраў лёду, якія лічацца бяспечнымі для знаходжання на ім, няўхільна змяншаюцца, імкнуцца да нуля.

— Галаўны боль для нас у перыяд разбурэння лёду — гэта рыбакі, — кажа начальнік аддзела вадалазна-выратавальнай службы Таварыства ратавання на водах Дзмітрый Бараноўскі. — Вось калі паглядзець даныя, напрыклад, па стане на 11 сакавіка, то прагулка па лёдзе стала прычынай гібелі дзесяці чалавек. З іх тры чалавекі вырашылі «зрэзаць» дарогу праз замерзлы вадаём. У Столінскім раёне 7-гадовы хлопчык загінуў на лёдзе меліяратыўнага канала 5 сакавіка. Астатнія шэсць выпадкаў прыходзяцца на падлёдную рыбалку.

Напрыклад, у возеры Боркі Вілейскага раёна ў другі дзень 2021-га патанулі адразу два рыбакі. Аднаму з іх было 59 гадоў, другому — 70. Мяркуецца, што спачатку пад лёд пайшоў старэйшы рыбак. Маладзейшы паспрабаваў яго выратаваць, але не даў рады.

...Як гэта ні парадаксальна гучыць, але менавіта лёд з палонкамі і прыцягвае да сябе рыбакоў. Сакрэт тут вельмі просты. Справа ў тым, што кісларод раствараецца непасрэдна ў вадзе, што вабіць рыбу. Але разам з тым і рызыка для жыцця тут становіцца максімальнай.

— Да таго ж на стан ледзянога покрыва вельмі ўздзейнічаюць пастаянныя праходжанні тэмпературы паветра праз нулявую адзнаку. Асабліва гэта небяспечна на рэках, дзе існуе цячэнне. Структура лёду пакрысе разбураецца, ён становіцца рыхлым, крышыцца і ў рэшце ператвараецца ў шарош. Таму нечакана праваліцца ў ваду можна вельмі лёгка. А з улікам таго, што тэмпература вады зараз не нашмат вышэйшая за нулявую адзнаку, у чалавека ёсць літаральна некалькі хвілін на тое, каб хтосьці дапамог яму выбрацца з палонкі.

У канцы гэтага тыдня зноў чакаецца невялікае пахаладанне, пойдзе снег. Пад ім заўважыць прамывіну ці рыхлы лёд будзе амаль немагчыма. Таму лепш усё ж устрымацца ад выхаду на вадаёмы. Прынамсі, да будучай зімы.

Валяр'ян ШКЛЕННІК