Вы тут

Як праходзіць паслязімовая прыборка сталіцы


Месячнік па навядзенні парадку і добраўпарадкаванні населеных пунктаў распачаўся 15 сакавіка. Падчас прэс-канферэнцыі ў БелТА спецыялісты паабяцалі, што ямкі са сталічных дарог знікнуць да 1 мая, а ў кожным раёне Мінска ад пяці да дзесяці вуліц займеюць новае пакрыццё. У сталічных дварах цягам сакавіка-красавіка, як плануецца, высадзяць звыш 4000 дрэў і больш за 13 тысяч кустоў.


Праграма добраўпарадкавання Мінска складзена адміністрацыямі раёнаў з улікам восеньскага агляду, а таксама скаргаў і зваротаў грамадзян з пажаданнямі. У яе ўваходзіць абрэзка дрэў, рамонты лесвіц, пешаходных сцежак, зялёных зон, рамонты асфальтавага пакрыцця, паведаміў Аляксандр РАКАЎШЧЫК, начальнік упраўлення гарадской гаспадаркі і энергетыкі Мінгарвыканкама:

— Да гэтай работы па замацаваных тэрыторыях падключаць таксама арганізацыі і прадпрыемствы школы, ВНУ. Мяркуецца, як і штогод, праводзіць суботнікі (першы ўжо прайшоў 13 сакавіка. — Аўт.). Сёлета пачнуцца капітальныя рамонты з комплексным добраўпарадкаваннем двароў паквартальна. Упор у 2021-м зроблены менавіта на тое, каб навесці парадак у людзей пад вокнамі. Пры гэтым будуць задзейнічаны ўсе рэсурсы: ад дворнікаў да фінансавых укладанняў.

У дварах актывізавана работа па навядзенні парадку пасля таяння снегу: прыборка выпадковага смецця, лістоты, якая засталася з восені. Ва ўсіх ЖКГ раёнаў распрацаваны паадрасныя мерапрыемствы і віды работ (з удзелам насельніцтва) у месцах агульнага карыстання жыллёвага фонду, расказала Настасся ВАРАБ'ЁВА, намеснік генеральнага дырэктара па добраўпарадкаванні і санітарным утрыманні жыллёвага фонду Мінскай гарадской жыллёвай гаспадаркі:

— Запланавана капітальна адрамантаваць 15 дваровых тэрыторый: тры ў Цэнтральным раёне сталіцы, і па адной-дзве — у астатніх. У 723 дварах мае адбыцца бягучы рамонт. Тут будуць адрамантаваны пешаходныя сувязі і іншыя аб'екты знешняга добраўпарадкавання: сцежкі, газоны, абсталяванне на дзіцячых пляцоўках, зялёныя насаджэнні.

Добраўпарадкаванне дваровых тэрыторый робіцца не толькі за кошт бюджэту, але і за грошы грамадзян.  У Мінскай вобласці гэта адбываецца досыць эфектыўна, дадаў Арцём ЛАБКО, першы намеснік генеральнага дырэктара Жыллёва-камунальнай гаспадаркі Мінскай вобласці:

— Летась мы планавалі прывесці да ладу за кошт бюджэту 118 двароў, а з дапамогай жыхароў добраўпарадкавалі ажно 490. Сёлета ў планах зрабіць яшчэ 86 двароў, але і гэтая лічба, пэўна, будзе большая.

Наводзіцца парадак і ў кантэйнернай гаспадарцы Мінска. Запланавана замена, афарбоўка, рамонт і прывядзенне ў належны тэхнічны стан не толькі кантэйнераў, але і ўсіх аб'ектаў знешняга добраўпарадкавання. Распачата азеляненне тэрыторыі, якое адбываецца ў тым ліку ў межах акцыі «Зялёны двор разам» (высаджана ўжо 57 дрэў па заяўках жыхароў), падкрэсліла Настасся Вараб'ёва:

— Не спыняецца работа (сумесна з РУУС і Дзяржаўтаінспекцыяй) па кантролі за выкананнем правілаў паркоўкі аўтамабілістамі і правілаў выгулу хатніх жывёл. За парушэнні праводзіцца прафілактычная работа, прыцягненне да адміністрацыйнай адказнасці.

Выбоін быць не павінна

Кіраўніцтва Мінгарвыканкама аператыўна адрэагавала на наступствы зімы, у прыватнасці на крытычную ямачнасць на дарогах, на ліквідацыю якой выдзелілі адпаведныя сродкі і штотыднёва аналізуюць, як ідзе работа, адзначыў Аляксандр Ракаўшчык.

Спецыялісты «Рамаўтадара», асфальтабетонны завод і ўсе структурныя падраздзяленні прадпрыемства працуюць кругласутачна без выхадных з лютага. Ужо адрамантавана звыш 41 тысячы кв. м. А памер усёй плошчы, якую эксплуатуе, прыбірае і рамантуе «Рамаўтадар» і структурныя падраздзяленні, — 22 млн кв. м, запэўніў Дзяніс ГЛІНСКІ, генеральны дырэктар аб'яднання «Гаррамаўтадар Мінгарвыканкама»:

— Сёння мы выкарыстоўваем літыя асфальтабетонныя сумесі, якія дазваляюць працаваць пры нізкіх тэмпературах. Як толькі сярэднясутачная тэмпература перавысіць 5 °С, пачнём карыстацца звычайнымі гарачымі асфальтабетоннымі сумесямі, згодна з тэхналогіяй правядзення работ. Для гэтага ўсё гатова: тэхніка, людзі, сродкі. Кругласутачна працуе таксама і Дзяржатамнагляд. Калі выяўляецца брак, арганізацыя ліквідуе яго за свой кошт.

Суровая зіма ўнесла значныя карэкціроўкі ў работу ў 2021 годзе, пагадзіўся Арцём Лабко:

— У сталічнай вобласці першапачаткова планавалася ахапіць бягучым рамонтам каля 49—50 тысяч кв. м, а цяпер план ужо каля 53 тысяч кв. м, і лічба будзе павялічвацца, бо агляды працягваюцца.

На балансе «Мінскаблдарбуда» — арганізацыі, якая ўтрымлівае і рамантуе мясцовыя дарогі сталічнай вобласці, — каля 16 тысяч кіламетраў дарог, палова з якіх (8300 км) асфальтаваныя. Найбольшая частка работ у арганізацыі зараз — таксама ямачны рамонт.

— У сакавіку ў нас асноўная работа зімовае ўтрыманне і рамонт. Амаль штодня на дарогах працуе па 45—50 брыгад. Для работы выкарыстоўваецца складзіруемая арганамінеральная сумесь. Ужо ліквідавана больш як 5,6 тысячы кв. м ямачнасці, аднак яшчэ каля 4 тысяч кв. м праблемных застаецца, — падзяліўся Валянцін ВОЎЧАНКА, начальнік аддзела ўтрымання дарожнай сеткі і бяспекі дарожнага руху «Мінскаблдарбуда».

Зрэшты, пакрысе пачынаюць мінскаблдарбудаўцы займацца і ўборкай смецця. А з павышэннем тэмпературы возьмуцца ўкладваць асфальтабетонную сумесь, якую вырабляюць 27 установак прадпрыемства.

Сёлета таксама збіраюцца замяніць вялікую колькасць асфальтабетоннага пакрыцця на дарогах Мінска. У кожным раёне плануюць «пераапрануць» у сярэднім 5-10 вуліц, а на пуцеправодах падчас бягучага рамонту мяркуюць замяніць пакрыццё, поручні, дэфармацыйныя швы. Гэта, пэўна, створыць некаторыя цяжкасці для аўтамабілістаў, аднак работа будзе весціся кругласутачна, абяцаюць дарожнікі. Дарэчы, спіс вуліц для рамонту з'явіцца ў канцы сакавіка.

Ірына СІДАРОК

Фота аўтара

Загаловак у газеце: Паслязімовая прыборка сталіцы

Выбар рэдакцыі

Грамадства

Як абараніцца ад махляроў у сферы сучасных тэхналогій

Як абараніцца ад махляроў у сферы сучасных тэхналогій

Фішынг, вішынг — два кіты кіберзлачыннасці

Грамадства

Арктычнае ўварванне на змену цёпламу паветру. Калі чакаць першы снег? Прагноз ад Дзмітрыя Рабава

Арктычнае ўварванне на змену цёпламу паветру. Калі чакаць першы снег? Прагноз ад Дзмітрыя Рабава

З чым звязана такая восеньская зменлівасць надвор’я і калі чакаць першы снег.