Вы тут

Сацыяльныя праекты па барацьбе з булінгам прадставілі беларускія падлеткі


Пераможцаў трэнінгу «Пошук рашэнняў для супрацьдзеяння булінгу ў школьным асяроддзі», у якім удзельнічалі дзесяць камандаў са школ Беларусі, абвясцілі у пачатку сакавіка. Мерапрыемства праходзіла з 22 лютага да 2 сакавіка ў межах праекта «Сяброўскае і падтрымліваючае асяроддзе ва ўстановах агульнай сярэдняй адукацыі». Два праекты-пераможцы Дзіцячы фонд ААН ЮНІСЕФ дапаможа рэалізаваць.


Распрацоўкай сацыяльных праектаў, скіраваных на супрацьдзеянне булінгу ў школе, вучні займаліся амаль два тыдні. Дзесяць камандаў падзялілі на дзве групы, у кожнай з якіх быў свой трэнер. За гэты час нарадзіліся досыць крэатыўныя ідэі, аднак у кожнай групе журы прыйшлося абраць толькі аднаго пераможцу з пяці камандаў.

— Незалежна ад таго, хто перамог і атрымае сацыяльны грант, паспрабуйце рэалізоўваць свае праекты і не кідайце пачатае, — параіў усім камандам валанцёр-ментар ЮНІСЕФ і трэнер адной з груп Андрэй МАКСІМЕНКА.

— Тыдзень быў вельмі насычаны, дзеці па-даросламу пастараліся прадставіць свае ідэі і нават ужо крыху пралічылі, што можна рэалізаваць сваімі сіламі, таму трэба працягваць гэтую справу, — пагадзіўся і трэнер другой групы Аляксандр АЛЯКСЕЕЎ.

На жаль, булінг часта ўспрымаецца як звычайная штодзённая руціна ці з'ява, якую трэба проста перачакаць, аднак за гэтым крыюцца крыўда, боль і перажыванні, заўважыў Дзмітрый ШЫЛІН, старшы каардынатар па пытаннях аховы дзяцінства прадстаўніцтва Дзіцячага фонду ААН у Беларусі:

— Вельмі важна, калі дзеці самі прапануюць, выпрацоўваюць і рэалізуюць рашэнні. І я спадзяюся, што трэнінг стаў аб'яднальным элементам для ўсіх школ, якія ўдзельнічалі ў праекце.

Перш чым аб'явіць пераможцаў анлайн, Таццяна КОЛАС, педагог-псіхолаг Рэспубліканскага цэнтра псіхалагічнай дапамогі БДПУ, правяла з вучнямі — аўтарамі праектаў невялікую гульню-віктарыну. Падчас яе ўдзельнікі вызначалі, якая з сітуацый з'яўляецца булінгам, а якая — не. Практычна аднагалосна ўсе правільна выяўлялі, дзе жарт, дзе насмешка, а дзе цкаванне.

— Булінг — гэта сітуацыя, калі крыўдзіцель зацікаўлены, каб яго ахвяра пакутавала фізічна і маральна. Булінг — з'ява, якая пастаянна паўтараецца, гэта не тое ж, што выпадкова пакрыўдзіць. Трэба памятаць, што пацярпелы ні ў якім разе не вінаваты ў тым, што з ім робяць, — падкрэсліла яна. — У апошні час школьнікі часта звяртаюцца да псіхолагаў менавіта з праблемамі булінгу, і наша з вамі задача — зрабіць так, каб гэтых пытанняў стала як мага менш. Важна звяртаць увагу на сітуацыі, калі побач кагосьці крыўдзяць. Ігнараванне іх — гэта адабрэнне булінгу. Важна паказваць сваё негатыўнае стаўленне да булінгу і дапамагаць тым, хто ад яго пакутуе.

На жаль, праблема агрэсіі і булінгу застаецца актуальнай, і мы сустракаемся з інфармацыяй пра яе фактычна штодзённа, адзначыў Уладзімір ВАЛЧАНКОЎ, дырэктар Інстытута псіхалогіі БДПУ, называючы двух пераможцаў трэнінгу.

Пераможцам у першай групе стаў праект ток-шоу «Гаварыць аб праблемах не сорамна» Бараўлянскай сярэдняй школы № 2. У яго межах плануюцца сустрэчы з медыйнымі асобамі, інтэрв'ю, гісторыі — адным словам, класічнае ток-шоу, дзе абмяркоўваць праблемы булінгу.

Лідарам другой групы стала каманда Азяршчынскай сярэдняй школы № 1 Рэчыцкага раёна з праектам «Графіці супраць булінгу, або Праспект Сяброўства». Гэтая ідэя пакарыла журы тым, што праект плануе абазначыць праблему булінгу праз выявы, уклаўшы ў іх адпаведны сэнс. А яшчэ графіці — таксама актуальная патрэба падлеткаў у самавыяўленні.

Ірына СІДАРОК

Загаловак у газеце: Праспект Сяброўства і ток-шоу

Выбар рэдакцыі

Культура

Чым сёлета будзе здзіўляць наведвальнікаў «Славянскі базар у Віцебску»?

Чым сёлета будзе здзіўляць наведвальнікаў «Славянскі базар у Віцебску»?

Канцэрт для дзяцей і моладзі, пластычны спектакль Ягора Дружыніна і «Рок-панарама».

Грамадства

Час клопату садаводаў: на якія сарты пладовых і ягадных культур варта звярнуць увагу?

Час клопату садаводаў: на якія сарты пладовых і ягадных культур варта звярнуць увагу?

Выбар саджанца для садавода — той момант, значнасць якога складана пераацаніць.

Культура

Вольга Здзярская: Для мяне мая прафесія — жыццё

Вольга Здзярская: Для мяне мая прафесія — жыццё

Актрыса НАДТ імя М. Горкага — пра шлях да сцэны і натхненне.

Грамадства

«Любоў — галоўнае, што бацькі павінны даць сваім дзецям»

«Любоў — галоўнае, што бацькі павінны даць сваім дзецям»

Тата і мама — два самыя важныя чалавекі ў жыцці кожнага дзіцяці.