Вы тут

Конкурс «Жанчына года — 2020» аб’явіў пераможцаў


Паспяховыя, актыўныя, неабыякавыя — усё гэта пра беларусак, якія прыйшлі 20 сакавіка на цырымонію ўзнагароджання пераможцаў XIII рэспубліканскага конкурсу «Жанчына года — 2020».


Конкурс штогод праводзіцца грамадскім аб’яднаннем «Беларускі саюз жанчын». Яго мэта — заахвочванне беларусак, якія дабіліся выдатных поспехаў у розных сферах дзейнасці на працягу 2020 года. Асноўная задача конкурсу — дэманстрацыя ролі жанчын у сучасным грамадстве, іх ролі ў сацыяльна-эканамічным і гуманітарна-культурным развіцці краіны, фарміраванне грамадзянскасці і патрыятызму, здаровай нацыі, выхаванне дзяцей.

Старшыня БСЖ, першы намеснік міністра аховы здароўя Беларусі Алена Богдан, прывітала гасцей:

— Фінал XIII рэспубліканскага конкурсу «Жанчына года — 2020» — гэта не толькі добрая традыцыя, але і штогадовая магчымасць ушаноўваць — без перабольшання — лепшых жанчын Беларусі. Мы павінны захаваць гэтую пераемнасць пакаленняў. Унутры кожнай з нас б’ецца неабыякавае сэрца беларускай жанчыны, і гэта важна паказаць усяму свету.

Акрамя таго яна адзначыла, што мінулы год стаў годам выпрабаванняў:

— Таму, калі мы распрацоўвалі намінацыі, увялі новыя: «Жанчына-легенда», «Актыўная грамадзянская пазіцыя» і «Сэрца аддаю людзям». У апошняй пяць з сямі намінантак — прадстаўніцы медыцынскай сферы. Яны прынялі на сябе сур’ёзны выклік і выстаялі. У асобе гэтых намінантак хочацца падзякаваць ўсім жанчынам-медыкам, якія з гонарам выконваюць свой абавязак.

На цырымоніі традыцыйна узнагароджваюць пераможцаў у розных намінацыях. Першай стала «Паспяховы кіраўнік». У ёй адзначылі кіраўніц, якія ўнеслі значны ўклад у развіццё вытворчасці прадукцыі і паслуг, асобаснага і прафесійнага патэнцыялу жанчын, якія стварылі спрыяльныя ўмовы працы і ўнеслі ўклад у развіццё жаночага руху ў рэгіёне. З прывітальным словам да намінанткаў звярнуўся намеснік Прэм’ер-міністра Рэспублікі Беларусь Ігар Петрышэнка:

— Гэтае мерапрыемства прымушае задумацца ўсіх мужчын, як нам пашанцавала жыць і працаваць з вамі ў адной краіне. Няпростыя выпрабаванні выпадаюць сёння на жаночыя плечы. Але вы з годнасцю і гонарам гэта пераадольваеце. Мы ганарымся вамі і дзякуем за гэта.

У намінацыі «Актыўная грамадзянская пазіцыя» ўзнагародзілі кіраўніц арганізацыйных структур ГА «БСЖ», якія прымаюць удзел у фарміраванні грамадзянскасці і патрыятызму, якія адстойваюць ідэалы і прынцыпы дзяржаўнай палітыкі, развіваюць жаночы рух. Актыўных жанчын павіншаваў намеснік кіраўніка Адміністрацыі Прэзідэнта Андрэй Кунцэвіч:

— Для мяне вялікі гонар ўзнагароджваць пераможцаў у самай патрыятычнай намінацыі. Бурныя падзеі 2020 году сапраўды падштурхнулі многіх жанчын да спраў і ўчынкаў, якія далі магчымасць Беларусі застацца мірнай, чыстай і любімай. Вы даказалі, што любая пандэмія і грамадскія катаклізмы саступаюць перад вашай ўпартасцю, чалавекалюбствам, глыбінным матчыным жаданнем засцерагчы, зберагчы, захаваць. У аснове патрыятызму — шчырая любоў да роднай зямлі. А калі беларуская жанчына любіць — гэта, як вядома, назаўжды.

«Сэрца аддаю людзям» — намінацыя, у якой выступілі жанчыны-педагогі, якія дасягнулі высокіх вынікаў у патрыятычным выхаванні дзяцей і моладзі, жанчыны, якія працуюць у праваахоўных органах Беларусі і праявілі свае асабістыя і прафесійныя якасці ў абароне інтарэсаў дзяржавы і грамадства, а таксама жанчыны-работнікі сістэмы аховы здароўя, якія заслужылі прызнанне і павагу калег і пацыентаў. З уручэннем узнагарод і прывітаннем гасцей выступіў Міністр аховы здароўя Рэспублікі Беларусь Дзмітрый Піневіч. Ён выказаў захапленне канкурсанткамі і адзначыў, што ў розных сацыяльных сферах з’яўляецца ўсё больш жанчын, што не можа не радаваць. А таксама дадаў:

— У сістэме аховы здароўя мы рэдка бачым вашы твары, таму што яны схаваныя за медыцынскімі маскамі. Але мы бачым вочы, якія свецяцца і адлюстроўваюць, як шмат вы робіце ад сэрца.

«Матчына слава» — намінацыя, у якой узнагародзілі шматдзетных маці (у тым ліку тых, што выхоўваюць прыёмных дзяцей), маці, якія выхавалі дзяцей, што дабіліся значных дасягненняў на міжнародным узроўні. З прывітальным словам выступіў Міністр адукацыі Ігар Карпенка. Ён адзначыў, што любоў маці здольная тварыць цуды.

Пераможцы ў намінацыі «Гаспадыня сяла» — гэта жанчыны, якія ўнеслі значны ўклад у развіццё малой Радзімы, сельскагаспадарчай вытворчасці і перапрацоўкі прадукцыі, аграэкатурызму, сацыяльнай інфраструктуры і мясцовага самакіравання. Іх павіншаваў генеральны дырэктар УП «Агракамбінат Ждановічы» Рыгор Чуйко. Даўні сябар Беларускага саюза жанчын нагадаў пра важнасць працы ў аграсферы: «Калі не будзе хлеба на стале, то і ўсяго астатняга не будзе».

«Духоўнасць і культура» — намінацыя, у якой ўзнагародзілі жанчын, што ўнеслі значны ўклад у развіццё духоўна-маральнага патэнцыялу грамадства і ажыццяўляюць дабрачынную, у тым ліку валанцёрскую дзейнасць. Узнагароды ўручыў Міністр інфармацыі Ігар Луцкі. Ён падзякаваў жанчынам за іх дзейнасць у сферы культуры.

Узнагароды ў намінацыі «Жанчына-легенда» атрымала ігумення Гаўрыіла са Свята-Раства-Багародзічнага стаўрапігіяльнага жаночага манастыра ў Гродне. Яна падзякавала за высокую ацэнку сваёй дзейнасці і нагадала, што Вялікі пост пачаўся з Прабачальнай нядзелі. Ігумення заклікала не трымаць крыўдаў, умець дараваць, а таксама адкрыць сваё сэрца для ўнутраных пераменаў.

У конкурсу ёсць свая гісторыя, традыцыі і развіццё. Нязменным застаецца адно — павышэнне сацыяльнага статусу жанчын і прыцягненне ўвагі да значнасці іх ролі ў жыцці грамадства і краіны. Усяго ў конкурсе прынялі ўдзел больш за 365 жанчын, 47 з якіх сталі пераможцамі. Фіналы абласных тураў праходзілі ў рэгіёнах з удзелам кіраўніцтва рэгіёнаў і жаночага актыву.

 

Віталіна БАНДАРОВІЧ

Фота БелТА

Выбар рэдакцыі

Грамадства

«Сацыяльная зніжка» — каму і на што? Як купіць прадукты танней на 10 %

«Сацыяльная зніжка» — каму і на што? Як купіць прадукты танней на 10 %

На зніжку могуць разлічваць пенсіянеры, шматдзетныя сем'і і.

Палітыка

Андрэй Савіных: Якасць абраных стратэгій не правяраецца ў ідэальных сітуацыях

Андрэй Савіных: Якасць абраных стратэгій не правяраецца ў ідэальных сітуацыях

Беларускі парадак дня нікому не дае расслабіцца, час не дазваляе.

Грамадства

Экстраная дапамога. Як працуе Цэнтр аператыўнага кіравання МНС

Экстраная дапамога. Як працуе Цэнтр аператыўнага кіравання МНС

Дзяжурныя службы — вушы і вочы Міністэрства па надзвычайных сітуацыях. 

Палітыка

Пасол Беларусі ў КНР: З 1992-га тавараабарот з Кітаем вырас больш як у 130 разоў

Пасол Беларусі ў КНР: З 1992-га тавараабарот з Кітаем вырас больш як у 130 разоў

Наперадзе юбілей беларуска-кітайскіх адносін — 30 гадоў.