Вы тут

У Мінску працуе літаратурна-дакументальная экспазіцыя «Беларуская сатыра»


Калі казаць пра сатыру ў айчыннай літаратуры, то першая асацыяцыя, якая ўзнікае, звязана з Кандратам Крапівой. Але імя яго немагчыма ўспамінаць без згадкі пра часопіс «Вожык».


Фрагмент экспазіцыі. Фота Кастуся Дробава.

Аб’яднаць дзве ідэі — 125-годдзе з дня нараджэння айчыннага сатырыка і 80-годдзе сатырыкагумарыстычнага выдання — паспрабавалі стваральнікі літаратурна-дакументальнай экспазіцыі «Беларуская сатыра», што днямі адкрылася ў Дзяржаўным музеі гісторыі беларускай літаратуры.

Праз дакументы, датычныя дзейнасці часопіса «Вожык», аўтографы класікаў, творы якіх друкаваліся пад яго вокладкай, малюнкі, што ілюстравалі «калючыя» старонкі, а таксама фотаздымкі і шматлікія сувеніры-падарункі, што ў розныя гады рэдакцыя атрымала ад чытачоў, можна прасачыць этап за этапам гісторыю станаўлення аднаго з найстарэйшых айчынных літаратурных выданняў. Так, пад адной з вітрын — «Выпіска пратакола пасяджэння Бюро ЦК КП(б)Б ад 22 мая 1945 года» аб пераўтварэнні газетыплаката «Раздавім фашысцкую гадзіну» ў сатырыка-гумарыстычны часопіс «Вожык». «Устанавіць наклад выдання 20000 асобнікаў, перыядычнасць 2 разы на месяц, аб’ём 8 старонак, кошт аднаго нумара 1 рубль», — менавіта з гэтага дакумента пачалося існаванне «Вожыка», які з таго часу і па сёння нястомна працінае калючкамі вострых кпінаў і трапных жартаў заганы асобна ўзятых тыповых характараў і грамадства ў цэлым. Карыкатуры, якія аздабляюць выстаўку, належаць пэндзлю розных мастакоў: хтосьці з іх — Сяргей Волкаў, Анатоль Волкаў — тварылі ў ранейшыя дзесяцігоддзі, іншыя, напрыклад, Аляксандр Каршакевіч, працуюць у складзе рэдакцыі цяпер.

Акрамя таго, у экспазіцыі прадстаўлены партрэты, фатаграфіі і асабістыя рэчы Кандрата Крапівы, эпісталярыі, кнігі з аўтографамі, рукапісы, розныя нумары часопіса «Вожык».

Кандрат Крапіва, дарэчы, ад самага пачатку выдання быў галоўным рэдактарам агітплаката «Раздавім фашысцкую гадзіну», а з моманту ператварэння выдання ў «Вожык» узначаліў і гэты часопіс.

У адкрыцці выстаўкі бралі ўдзел супрацоўнікі рэдакцыі часопіса «Вожык» на чале з галоўным рэдактарам Юліяй Зарэцкай, а таксама ўнучка Кандрата Крапівы Алена Атраховіч, па словах якой у паўсядзённым жыцці, як яна адзначала, Кандрат Кандратавіч усміхаўся не так і часта — амаль заўсёды заставаўся сур’ёзным. Здымкаў, на якіх Крапіва ўсміхаецца, вельмі мала, але адзін з іх наведвальнікі могуць убачыць у літаратурна-дакументальнай экспазіцыі музея. З выстаўкай можна азнаёміцца да пачатку мая.

Яна БУДОВІЧ

Загаловак у газеце: Іголкамі кпінаў і трапнасцю жартаў

Выбар рэдакцыі

Грамадства

«Сацыяльная зніжка» — каму і на што? Як купіць прадукты танней на 10 %

«Сацыяльная зніжка» — каму і на што? Як купіць прадукты танней на 10 %

На зніжку могуць разлічваць пенсіянеры, шматдзетныя сем’і.

Палітыка

Андрэй Савіных: Якасць абраных стратэгій не правяраецца ў ідэальных сітуацыях

Андрэй Савіных: Якасць абраных стратэгій не правяраецца ў ідэальных сітуацыях

Беларускі парадак дня нікому не дае расслабіцца, час не дазваляе.

Грамадства

Экстраная дапамога. Як працуе Цэнтр аператыўнага кіравання МНС

Экстраная дапамога. Як працуе Цэнтр аператыўнага кіравання МНС

Дзяжурныя службы — вушы і вочы Міністэрства па надзвычайных сітуацыях. 

Палітыка

Пасол Беларусі ў КНР: З 1992-га тавараабарот з Кітаем вырас больш як у 130 разоў

Пасол Беларусі ў КНР: З 1992-га тавараабарот з Кітаем вырас больш як у 130 разоў

Наперадзе юбілей беларуска-кітайскіх адносін — 30 гадоў.