Вы тут

Максім Замшаў: Літаратура Беларусі мае сёння сузор'е яркіх імёнаў


З галоўным рэдактарам аўтарытэтнай расійскай «Литературной газеты» мы сустрэліся, каб пагаварыць пра новы праект гэтага выдання.


— Выйшаў першы «беларускі выпуск» «Литературной газеты». Чым прадыктавана такое жаданне рэдакцыі добра вядомай і ў Расіі, і на ўсёй постсавецкай прасторы, ды і ва ўсім свеце газеты звярнуцца менавіта да беларускай мастацкай тэмы?

— Па-першае, «Литературка» заўсёды была звязана з беларускай культурай і літаратурай самым цесным чынам. Многія гады выходзіў пры падтрымцы Пастаяннага камітэта Саюзнай дзяржавы дадатак «Лад». І вось цяпер з'явіўся нашчадак «Лада» — «Белые аисты». Рэспубліка Беларусь за апошнія трыццаць гадоў прайшла самабытны культурны шлях. Шлях, які абапіраўся на гістарычную аснову і пры гэтым прымаў у сябе ўсе найлепшыя дасягненні сучаснай мастацкай мовы. І назіраць за гэтым, аналізаваць гэтыя працэсы заўжды вельмі цікава. Па-другое, нам хацелася б зрабіць «Литературную газету» ў Беларусі больш роднай, блізкай, каб чытачы адчувалі пастаяннае сэрцабіццё беларускай культуры, каб змаглі атрымаць асалоду і з таго, наколькі лагічная і перспектыўная інтэграцыя беларускага кантэнту ў расійскае культуралагічнае выданне.

— Як вы лічыце, сучасная беларуская літаратура будзе цікавая сёння для чытача Расіі?

— Я проста ўпэўнены ў тым, што і цікавая будзе, і нават надзвычай запатрабаваная. Літаратура Беларусі мае сёння сузор'е яркіх імёнаў, якія лёгка можна аднесці да выдатнай сусветнай плеяды. Ёсць пісьменнікі, якія працуюць даволі даўно, ёсць і маладыя таленты. Сувязь пакаленняў у Беларусі не парушана, і старэйшыя перадаюць малодшым увесь свой вопыт, усе свае здольнасці дзеля таго, каб тыя, хто ідзе следам, высока неслі сцяг славеснасці.

— У Беларусі ўвагу чытача прыцягвае і класічная літаратура. Толькі за апошняе дзесяцігоддзе розныя мінскія выдавецтвы выпусцілі каля 50 (!) кніг геніяльнага празаіка, паэта, драматурга, публіцыста, перакладчыка Уладзіміра Караткевіча. Ці будзеце пісаць у выпуску «Белые аисты» пра беларускіх класікаў?

— Так, зразумела, будзем пісаць і пра іх, і новыя пераклады вядомых іх твораў будзем друкаваць. Гэта ж вельмі цікава. І пра Караткевіча не раз напішам, і пра Максіма Багдановіча, і пра Ніла Гілевіча, і пра Янку Купалу, і пра Якуба Коласа, і пра Рыгора Барадуліна, Янку Брыля, Аркадзя Куляшова, Максіма Танка... Яны ж добра знаёмыя ранейшым пакаленням чытачоў «Литературной газеты».

— Дарэчы, у наступным, 2022 годзе, — 140 гадоў з дня нараджэня народных песняроў Беларусі Янкі
Купалы і Якуба Коласа. Значная падзея для культурнага, асветніцкага жыцця...

— І мы, вядома ж, не абыдзем увагай гэтыя даты... Летась я пераклаў санеты Янкі Купалы на рускую мову. Для мяне гэты творчы працэс стаўся захапляльным дзействам, поўным эмацыянальнага напружання, сапраўднага гарэння. У беларускай нацыянальнай літаратуры навідавоку цудоўныя карэнні, з якіх вырастаюць магутныя прыгожыя сады.

— Зразумела, у «Белых аистах» вы будзеце друкаваць не толькі паэзію і прозу... Верагодна, частка «беларускага выпуску» будзе прысвечана пытанням развіцця культуры, розных кірункаў у мастацтве Беларусі?..

— Мы імкнёмся асвятляць тэатральныя прэм'еры, кінанавінкі, канцэрты, а таксама мерапрыемствы ў сучасных фарматах. Культура — гэта тое, што ўсім нам дапаможа пераадолець сусветную энтрапію, замяшаную на цынізме і хлусні.

— А ці будуць у «Литературки» ў Мінску і іншых культурных цэнтрах фарматы невіртуальных зносін з газетай і яе галоўным рэдактарам — паэтам, празаікам, перакладчыкам Максімам Замшавым? Чытач, пагадзіцеся, засумаваў па жывых сустрэчах...

— Мару сустрэцца з беларускімі чытачамі як мага хутчэй, а таксама хацеў бы паўдзельнічаць і ў іншых сустрэчах, прамадэрыраваць сустрэчы з іншымі аўтарамі «ЛГ» у беларускіх аўдыторыях. Найперш хацелася б прыйсці ва ўніверсітэты і інстытуты, сустрэцца з моладдзю, пагаварыць пра іх зацікаўленні, пагаварыць пра мастацкую літаратуру і ўвогуле пра жыццё.

Гутарыў Кастусь Лешніца

Выбар рэдакцыі

Грамадства

Даведаліся аб цэнах на галоўныя восеньскія ягады, спосабах іх захоўвання і «прафесійных рызыках» пры зборы журавін

Даведаліся аб цэнах на галоўныя восеньскія ягады, спосабах іх захоўвання і «прафесійных рызыках» пры зборы журавін

У разгары сезон журавін. Менавіта цяпер самы час назапасіць гэтых ягад на доўгі перыяд халадоў і прастуд.

Грамадства

Што пісалі беларускія класікі пра самага дарагога чалавека?

Што пісалі беларускія класікі пра самага дарагога чалавека?

Янка Купала дакладна чуў беларускія калыханкі ад сваёй маці, Бянігны Іванаўны, лежачы ў калысцы ў Вязынцы.

Грамадства

Калі злодзей маўчыць, за яго «гавораць» сляды. Выкрыць злачынцу дапаможа трасалогія

Калі злодзей маўчыць, за яго «гавораць» сляды. Выкрыць злачынцу дапаможа трасалогія

Банда рабаўнікоў «трапілася» дзякуючы адбіткам спецыяльнай прылады.

Грамадства

Жыхарка вёскі Мікалаеўка Бялыніцкага раёна Ларыса Клімянок расказала пра трагедыю, якая адбылася з яе сястрой і братамі

Жыхарка вёскі Мікалаеўка Бялыніцкага раёна Ларыса Клімянок расказала пра трагедыю, якая адбылася з яе сястрой і братамі

Экспедыцыю ў Малінаўку арганізаваў навуковы супрацоўнік музея гісторыі Магілёва ветэран пошукавага руху Пётр Хаванскі.