Вы тут

Флэш-семінар па абрадаваму турызму прайшоў у Жытомлі


Унутранаму турызму ў нашай краіне надаецца асаблівае значэнне. Менавіта гэтаму пытанню быў прысвечаны флэш-семінар «Event-туры, ці Абрадавы турызм як драйвер развіцця сельскага турызму» для работнікаў устаноў культуры, бібліятэкараў, кіраўнікоў фальклорных калектываў, спецыялістаў аддзела этнаграфіі, фальклору і рамёстваў Гродзенскага раёна.


Падчас гукання вясны ў вёсцы Жытомля. Фота БелТА.

Мерапрыемства ладзілася на базе музея «Код памяці» ў Зарачанскім доме народнай творчасці і ў межах правядзення традыцыйнага абраду «Гуканне вясны» ў вёсцы Жытомля.

Абрадавы турызм — выдатны спосаб пазнання этнічных, рэлігійных і культурных асаблівасцей народа. У адной дзеі адразу раскрываецца мноства аспектаў: традыцыйная архітэктура, касцюмы, прадметы побыту, кухня, музыка. Усе падзеі розныя і ўнікальныя. Кожнае свята можа адзначацца толькі раз у год і абавязкова з захаваннем непарыўных канстант: спалучэнне месца, часу і дзеянняў, што гарантуе выключныя ўражанні для ўдзельнікаў.

На флэш-семінары ў музеі «Код памяці» работнікам культуры прапанавалі незвычайную забаву — этнаквіз «Who is Maslenitsa?»: можна было праверыць сябе на веды аб гісторыі і традыцыях Масленіцы. Спецыялісты загадзя падрыхтавалі флэш-прэзентацыі эфектыўных і самабытных практык па традыцыйнай культуры ў рабоце з абрадавым турызмам. У сучасных умовах існуе шмат магчымасцей для ўдасканалення дзейнасці ўстаноў культуры на рынку турыстычнага прадукту і такім чынам рэальнага заробку грошай.

Доўгатэрміновых планаў тут не будуюць. Калі сітуацыя палепшыцца, гатовы прымаць турыстаў, а пакуль распрацоўваюць канцэпцыю музея ў Квасоўскім цэнтры культуры, галоўнай задачай якога стане не проста выставачная дзейнасць, а правядзенне этнавечарын, майстар-класаў, дэгустацый, накіраваных на работу як з індывідуальнымі турыстамі, так і з экскурсійнымі групамі.

Пасля тэарэтычнай часткі ўдзельнікі семінара выправіліся ў этнавандроўку ў Жытомлю. Спрадвеку моладзь збіралася за ваколіцай паселішча і пачынала гукаць вясну. Спявалі абрадавыя веснавыя песні, вадзілі карагоды. «Дзе карагод ходзіць, там жыта родзіць», — сцвярджалі нашы продкi. А яшчэ на свяце падкідвалі ўверх печыва ў выглядзе птушак, каб імітаваць іх рух і паскорыць прыход цёплай пары.

Зразумела, пандэмія змяніла вельмі многае, найперш свабоду перамяшчэння, культурных мерапрыемстваў і сустрэч. Работнікі культуры Гродзенскага раёна вырашылі выкарыстоўваць у сваёй дзейнасці ўсе фарматы. Галоўнае — захаваць традыцыі, далучыць да іх найбольш беларусаў і гасцей рэгіёна.

Наталля РАМАНОВІЧ

Загаловак у газеце: Абрады як аб’ект турызму

Выбар рэдакцыі

Эканоміка

Змены ў падатковы кодэкс. Хто заплаціць падатак на кватэру, а хто не?

Змены ў падатковы кодэкс. Хто заплаціць падатак на кватэру, а хто не?

З пачатку года ўступілі ў сілу змены ў Падатковы кодэкс.

Культура

Біблія на беларускай мове: «Галоўнае — абапірацца не на прыдуманыя ўяўленні, а на тысячагадовы вопыт набожных папярэднікаў»

Біблія на беларускай мове: «Галоўнае — абапірацца не на прыдуманыя ўяўленні, а на тысячагадовы вопыт набожных папярэднікаў»

 У 2019 годзе прэміяй «За духоўнае адраджэнне» былі адзначаны перакладчыкі Бібліі на беларускую мову.

Палітыка

Алег Іваноў: Наша супрацоўніцтва — вуліца з двухбаковым рухам

Алег Іваноў: Наша супрацоўніцтва — вуліца з двухбаковым рухам

У бягучым годзе стартуе рэалізацыя 28 інтэграцыйных праграм Саюзнай дзяржавы.

Грамадства

Чым прыцягвае гісторыя ваеннай авіяцыі бераставіцкіх аматараў тэхнічнай творчасці

Чым прыцягвае гісторыя ваеннай авіяцыі бераставіцкіх аматараў тэхнічнай творчасці

Ідэя стварыць гурток авіямадэлістаў у нейкім сэнсе звязана і з размяшчэннем побач з райцэнтрам былога ваеннага аэрадрома.