«Ахова птушак Бацькаўшчыны» абвясціла конкурс малюнкаў «Які мой дом?» Акцыя праводзіцца ў рамках міжнароднай кампаніі «Жывая вясна». Да ўдзелу ў ёй запрашаюцца дзеці і падлеткі да 16 гадоў.
Кожны год птушкі вяртаюцца з зімоўкі, каб загнездавацца і вывесці птушанят. Хтосьці будуе новае гняздо, хтосьці вяртаецца ў старое і робіць «рамонт», а хтосьці займае гняздоўі, зробленыя чалавекам. Праз некаторы час у птушыным доме робіцца больш цесна, бо з'яўляюцца новыя члены сям'і — маленькія птушаняты.
Дзецям прапаноўваюць намаляваць гняздо любой беларускай птушкі з яго насельнікамі: гаспадыняй або цэлай птушынай сям'ёй.
— Звярніце ўвагу на дрэвы побач са сваім домам: магчыма, там поўным ходам птушка будуе ці ўжо пабудавала сваё гняздо, — раіць спецыяліст грамадскага аб'яднання «Ахова птушак Бацькаўшчыны» Анастасія Пярко. — Не прапусціце шанц паназіраць за сваімі суседзямі...
Фота або скан малюнка трэба даслаць на паштовую скрыню sprіngalіve@ptushkі.org з пазнакай «Які мой дом?» да 15 мая ўключна. Вынікі будуць падведзены 20 мая і з'явяцца на сайце АПБ. Тры аўтары найлепшых малюнкаў атрымаюць прызы.
Кампанія «Жывая вясна» стартавала ў 2006 годзе як еўрапейскі праект BіrdLіfe Іnternatіonal. З 2009 года да яго далучыліся краіны Цэнтральнай Азіі, а з 2010 года «Жывая вясна» прыйшла ў Афрыку. Летась на сайт «Жывой вясны» паступіла 11669 назіранняў ад удзельнікаў з Еўропы, Цэнтральнай Азіі і Афрыкі. Дзякуючы актыўнаму ўдзелу беларусаў наша краіна апынулася на другім месцы сярод 59 краін-удзельніц.
Надзея НІКАЛАЕВА
Прэв’ю: pixabay.com
Фіналістка праекта «Акадэмія талентаў» на АНТ — пра творчасць і жыццё.
Амаль тысяча дзвесце чалавек сабраліся, каб вырашаць найважнейшыя пытанні развіцця краіны.
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.