Вы тут

Старшыня Гомельскага аблвыканкама Генадзь Салавей правёў асабісты прыём грамадзян


Старшыня Гомельскага аблвыканкама Генадзь Салавей правёў асабісты прыём грамадзян. На сустрэчу з кіраўніком рэгіёна запісаліся дзесяць жыхароў вобласці, тры пытанні, якія хвалявалі людзей, былі вырашаны яшчэ да прыёму.


З просьбай выдзеліць дадатковы ўчастак для вядзення фермерскай гаспадаркі звярнуўся жыхар Буда-Кашалёўскага раёна Дзмітрый Ананьеў. Фермер ужо мае зямельны ўчастак у 15 гектараў, але просіць павялічыць плошчы. Кажа, што плануе займацца жывёлагадоўляй і вырошчваць гародніну. Старшыня аблвыканкама адзначыў, што рашэнне па гэтым пытанні будзе вызначана на месцы і пасля ацэнкі сітуацыі. Губернатар на наступным тыдні плануе асабіста выехаць у раён і азнаёміцца з работай фермерскай гаспадаркі і бізнес-планам прадпрымальніка. Але папярэдзіў, што зямля будзе выдавацца пад канкрэтныя і рэальныя ў ажыццяўленні праекты.

— Некаторыя фермеры бяруць зямлю ў арэнду і перадаюць пасля ў субарэнду, цану пытання я ведаю, і такога быць не павінна, — падкрэсліў Генадзь Салавей.

Жыхарка Чачэрскага раёна звярнулася да старшыні аблвыканкама адразу з некалькімі пытаннямі: нязручны графік школьнага аўтобуса (праблему вырашылі падчас прыёму), выдзяленне зямлі для прысядзібнай гаспадаркі і атрыманне паслуг аховы здароўя. Паводле слоў жанчыны, часам складана запісацца і трапіць на прыём да доктара ў райбальніцы. Генадзь Салавей даручыў вывучыць сітуацыю з даступнасцю паслуг установы аховы здароўя. Таксама на месцы разгледзяць пытанне аб выдзяленні пустога ўчастка зямлі яе сям'і.

Са сваей праблемай звярнулася жыхарка Гомельскага раёна, якая пражывае разам з сынам — інвалідам першай групы. Ён валодае 1/4 долі кватэры ў пасёлку Янтарны, у якой цяпер ніхто не жыве, распавяла заяўніца. Ёсць намер прадаць маёмасць, але існуюць абмежаванні. На прыёме жанчыне растлумачылі, што паколькі ў кватэры прапісаны чалавек з інваліднасцю, і пасля ён застанецца без уласнай жылплошчы, здзелка забаронена.

З цікавай прапановай на прыём да губернатара прыйшоў старшыня маладзёжнага жыллёвага комплексу «Сонечны» Уладзімір Макараў. Яго ідэя — сфарміраваць па такім жа прынцыпе новыя комплексы ў абласным цэнтры. Гамяльчанін звярнуў увагу, што «Сонечны» больш за трыццаць гадоў таму ўспрымалі як сацыяльны эксперымент. Яго ўдзельнікі стварылі калектыў да засялення, разам вырашалі, якое будзе іх жыллё. Як вынік — у некаторых кватэрах у дамах комплексу з'явіліся індывідуальныя планіроўкі, падземная паркоўка, сацыяльна значныя аб'екты на першых паверхах.

— Па многіх параметрах мы былі аднымі з першых у краіне. Галоўная асаблівасць комплексу ў тым, што людзі самі могуць уплываць на стварэнне камфортнага асяроддзя для сябе і сваіх блізкіх, — адзначыў старшыня ЖК «Сонечны». Не так даўно мясцовыя жыхары наладзілі ў сваім парку сістэму святлозабеспячэння, якая зараджаецца ад сонца. У комплексе добрая нараджальнасць, а ў дзяцей — узорная паспяховасць, распавёў аб ЖК Уладзімір Макараў і папрасіў падтрымкі ўладаў у арганізацыі міжнароднага семінара з удзелам прадстаўнікоў Расіі і Украіны ў гонар 50-годдзя руху маладзёжных жыллёвых комплексаў.

Старшыня аблвыканкама лічыць, што карысны вопыт ЖК варта вывучыць і затым па магчымасці ўкараняць пры ўзвядзенні новабудоўляў. У тым ліку падобная практыка магла б вырашыць праблему комплекснага добраўпарадкавання дваровых тэрыторый.

Наталля КАПРЫЛЕНКА

Фота аўтара

Загаловак у газеце: Карысныя прапановы

Выбар рэдакцыі

Палітыка

Лукашэнка: Беларусь і Расія сур'ёзна рушылі наперад у пытанні ўзгаднення саюзных праграм

Лукашэнка: Беларусь і Расія сур'ёзна рушылі наперад у пытанні ўзгаднення саюзных праграм

У Маскве адбылася сустрэча і перагаворы кіраўніка нашай краіны з яго калегам Уладзімірам Пуціным.

Эканоміка

За якія парушэнні могуць прыпыніць работу магазінаў?

За якія парушэнні могуць прыпыніць работу магазінаў?

МАРГ час ад часу прыпыняе работу магазінаў.

Грамадства

Еш ананасы, яблыкі жуй! Як падтрымаць імунітэт без аптэчкі?

Еш ананасы, яблыкі жуй! Як падтрымаць імунітэт без аптэчкі?

З авітамінозам у нас прынята змагацца па-старому...

Грамадства

Брагінскія кавуны з прыстаўкай «эка-»

Брагінскія кавуны з прыстаўкай «эка-»

На Гомельшчыне актыўна рэалізоўваюцца праекты па развіцці тэрыторый, пацярпелых у выніку катастрофы на ЧАЭС.