Вы тут

Як у Бабруйску выхоўваюць сапраўдных патрыётаў


«Бабруйск з'яўляецца адной з адукацыйных пляцовак, дзе на вельмі высокім узроўні пастаўлена і дашкольная, і сярэдняя, і сярэдняя спецыяльная адукацыя», — менавіта так выказаўся пра сістэму адукацыі горада на Бярэзіне дэпутат Палаты прадстаўнікоў Ігар Марзалюк, пад кіраўніцтвам якога тут нядаўна прайшло выязное пасяджэнне Пастаяннай камісіі Палаты прадстаўнікоў па адукацыі, культуры і навуцы. Дэпутаты наведалі яслі — дзіцячы сад № 84 і школу № 34, якія адкрыліся зусім нядаўна. Па сутнасці, гэта своеасаблівыя эталоны сярод навучальных устаноў, што адпавядаюць усім патрабаванням.


Фота: bobrlife.by

Тут дзеці не сумуюць

У канцы мінулага года ў Сёмым мікрараёне Бабруйска адкрыліся сучасныя яслі — дзіцячы садок на 240 месцаў. Аб'ект звяртае на сябе ўвагу яшчэ знадворку. Вабяць пляцоўкі з яркім гульнявым і спартыўным абсталяваннем, прыгожыя альтанкі. У трохпавярховым корпусе казка працягваецца. Навучэнцы Бабруйскага мастацкага каледжа імя А. Ларына дапамаглі аформіць сцены ўстановы ў беларускіх матывах. Створаны добрыя ўмовы для выхавання гарманічнай ва ўсіх адносінах асобы. Ёсць гімнастычная, спартыўная, музычная залы, нават басейн: вялікі, светлы, прасторны, са спецыяльным пад'ёмнікам для дзяцей з праблемамі апорна-рухальнага апарату. Пра такі дзіцячы садок для свайго малога марыць кожная маці.

— У нас выхоўваюцца дзеткі з двух гадоў да шасці, — удакладняе загадчыца ясляў — дзіцячага сада № 84 Таццяна Арцюшэня. — І ўсім тут камфортна.

Дэпутатаў дзеці сустракалі караваем, дэкламавалі ім вершы на беларускай мове. Потым дарослыя паказалі ўсю тутэйшую прыгажосць: утульныя групы для дзяцей, медыцынскі блок, суперсучасны харчовы блок з поўным наборам перадавога абсталявання: параканвектаматам, слайсерам, электраплітамі апошняга пакалення, электрапатэльняй, вялікім міксерам, якім можна хутка ўзбіць пюрэ.

Пакой для бяспекі — асаблівы гонар: абсталяваць яго дапамаглі супрацоўнікі МНС. Шафа — у выглядзе пажарнай машыны, ёсць нават спецадзенне для юных ратавальнікаў. Для прагляду карыснага матэрыялу ўстаноўлены спецыяльны экран. Ратавальнікі дэманструюць дзецям фільмы і слайды на тэму бяспекі. І робяць гэта нясумна. Таццяна Іванаўна адзначае, што пасля іх садка такія пакоі сталі з'яўляцца і ў іншых дашкольных установах, бо карысць ад іх сапраўды вялікая.

— Наша ўстанова своеасаблівая: з 240 дзяцей 211 — са шматдзетных сем'яў, — удакладняе Таццяна Арцюшэня. — І сярод персаналу многа шматдзетных мам. Працаваць з імі вельмі лёгка. Яны разумеюць адказнасць і ўлічваюць інтарэсы ўстановы.

Дарэчы, з верасня на базе садка будзе працаваць група для дзяцей з цяжкімі парушэннямі маўлення.

Запрашаем у лега-клас

Школа № 34, дзе таксама пабывалі дэпутаты, — адна з інавацыйных, пабудавана ўсяго два з паловай года назад. У класах — інтэрактыўныя дошкі, мультыборды. У вучняў — электронныя дзённікі і асабістыя карткі.

— Наша ўстанова ўнікальная, — кажа дырэктар Ірына Матузава. — Тут вельмі добрая як вучэбная, так і спартыўная база. Класы абсталяваны ўсім неабходным, для першакласнікаў ёсць клас лега. Дзеці выкладваюць дэталі пэўнага колеру і такім чынам асвойваюць лік, чытанне. У маленькіх пераважае гульнявая дзейнасць, і канструктар дапамагае адаптавацца.

А яшчэ ў школе ёсць факультатыў па скрэтч-праграмаванні, які наведваюць дзеці пачынаючы з другога класа, і па робатапраграмаванні, дзе вучні з 3-4 класа вучацца праграмаваць аўтаматычныя прыстасаванні. Вельмі развіты экалагічны кірунак. Дзеці, у якіх да гэтага схільнасці, пачынаючы з чацвёртага класа наведваюць экацэнтр. У школе моцная спартыўная база, тут ёсць усё: ад скаладрома да суперсучасных залаў, аснашчаных спартыўным інвентаром і трэнажорамі. А яшчэ — 25-метровы басейн невялікай ёмістасці, дзе плаваюць малыя. Нядзіўна, што ў школе ёсць нават клас па плаванні. Так дзяцей матывуюць далучацца да алімпійскага руху. Для творчых асоб таксама ёсць умовы. Напрыклад, можна займацца харэаграфіяй або маляваннем. Магчымасцяў развіваць сябе шмат, і дзецям прасцей зрабіць правільны выбар.

Аляксандр Студнеў, старшыня Бабруйскага гарвыканкама:

— Мы ствараем усе ўмовы, каб вырасціць сапраўдных патрыётаў нашай краіны: разумных, моцных, творчых, якія любяць сваю Радзіму. Летась педагогамі і навучэнцамі ўстаноў адукацыі ў розных конкурсах, турнірах і алімпіядах заваявана больш чым 900 дыпломаў абласнога, рэспубліканскага і міжнароднага ўзроўняў. Стыпендыятамі спецыяльнага фонду Прэзідэнта Рэспублікі Беларусь па падтрымцы адораных навучэнцаў і студэнтаў сталі восем бабруйчан. Падчас цэнтралізаванага тэсціравання бабруйскія школьнікі атрымалі пяць 100-бальных сертыфікатаў па беларускай і англійскай мовах, грамадазнаўстве і гісторыі Беларусі. На заключным этапе рэспубліканскай алімпіяды навучэнцы горада заваявалі чатыры дыпломы — 45 % ад агульнай колькасці. Другі год у школах і гімназіях паспяхова рэалізоўваецца інфармацыйна-адукацыйны праект «Школа актыўнага грамадзяніна». Ва ўстановах адукацыі сфарміравана больш чым 250 дзіцячых маладзёжных аб'яднанняў з агульнай колькасцю звыш 20 тысяч падлеткаў. Актывісты маладзёжнага руху — штогадовыя пераможцы конкурсаў рознага ўзроўню, у тым ліку такіх прэстыжных у краіне, як «100 ідэй для Беларусі», «Junіor Skіlls Belarus». У горадзе існуе болей чым 20 устаноў адукацыі, дзе каля 60 % навучэнцаў вывучаюць асобныя прадметы на павышаным узроўні. На базе 12 устаноў адукацыі, у тым ліку дашкольных, рэалізоўваюцца інавацыйныя і эксперыментальныя праекты. Адкрыты 12 класаў прафесійнай накіраванасці: 4 педагагічныя і 8 па атрыманні спецыяльнасцяў па гарантаванні нацбяспекі краіны і іншых. Для 45 % школьнікаў арганізавана вывучэнне працоўнага навучання па праграме прафесійнай падрыхтоўкі рабочых.

Нэлі ЗІГУЛЯ

Выбар рэдакцыі

Культура

Чым сёлета будзе здзіўляць наведвальнікаў «Славянскі базар у Віцебску»?

Чым сёлета будзе здзіўляць наведвальнікаў «Славянскі базар у Віцебску»?

Канцэрт для дзяцей і моладзі, пластычны спектакль Ягора Дружыніна і «Рок-панарама».

Грамадства

Час клопату садаводаў: на якія сарты пладовых і ягадных культур варта звярнуць увагу?

Час клопату садаводаў: на якія сарты пладовых і ягадных культур варта звярнуць увагу?

Выбар саджанца для садавода — той момант, значнасць якога складана пераацаніць.

Культура

Вольга Здзярская: Для мяне мая прафесія — жыццё

Вольга Здзярская: Для мяне мая прафесія — жыццё

Актрыса НАДТ імя М. Горкага — пра шлях да сцэны і натхненне.

Грамадства

«Любоў — галоўнае, што бацькі павінны даць сваім дзецям»

«Любоў — галоўнае, што бацькі павінны даць сваім дзецям»

Тата і мама — два самыя важныя чалавекі ў жыцці кожнага дзіцяці.