Супрацоўнікі аднаго з вядучых будаўнічых прадпрыемстваў Гомельшчыны ААТ «Будаўнічы трэст № 14» арганізавалі правядзенне маладзёжнага суботніка на сацыяльна значным аб’екце ў Добрушскім раёне.
Так, гомельскія студэнты — валанцёры БРСМ аказалі дапамогу ў добраўпарадкаванні тэрыторыі будаўнічай пляцоўкі на пагранічнай заставе «Усохская Буда». На аб’екце вядуцца работы па рэканструкцыі. Студэнты Беларускага дзяржаўнага ўніверсітэта транспарту і Гомельскага дзяржаўнага тэхнічнага ўніверсітэта імя П.В. Сухога наводзілі парадак, складалі будаўнічыя матэрыялы, выконвалі дапаможныя работы.
Дарэчы, пагранічная застава «Усохская Буда» ў Добрушскім раёне дзейнічае з 2014 года. Пад яе аховай знаходзіцца ўчастак беларуска-ўкраінскай мяжы працягласцю больш за 20 кіламетраў. Валанцёры, якія добраўпарадкавалі будпляцоўку на тэрыторыі ваеннага аб’екта, выказаліся, што таксама збіраюцца служыць у арміі.
— Сумесныя працоўныя акцыі даюць магчымасць падтрымаць нашых маладых людзей, далучыць моладзь да працоўных дэсантаў на карысць грамадства, паказаць, што няма цяжкіх задач, калі працуем разам, і гэта сапраўды каштоўна, — падзяліўся намеснік генеральнага дырэктара ААТ «Будаўнічы трэст № 14» Дзмітрый Мурашка. Ён адзначыў, што гомельскія будаўнікі гатовыя падтрымаць усе ініцыятывы байцоў студэнцкіх атрадаў па аказанні дапамогі на ўзвядзенні сацыяльна значных аб’ектаў Гомельшчыны.
Наталля КАПРЫЛЕНКА
У парадку дня — зацвярджэнне Канцэпцыі нацбяспекі і Ваеннай дактрыны.
Фіналістка праекта «Акадэмія талентаў» на АНТ — пра творчасць і жыццё.
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.
