У Мінску тралейбус збіў дваіх дзяцей

На вуліцы Казінца ў Мінску тралейбус здзейсніў наезд на двух непаўналетніх дзяцей, паведамілі ў тэлеграм-канале УДАІ ГУУС Мінгарвыканкама.

Паводле папярэдняй інфармацыі, сёння каля 16:35, рухаючыся па вул. Казінца ў напрамку вул. Кіжаватава, тралейбус паблізу прыпыначнага пункта здзейсніў наезд на непаўналетніх дзяцей — хлопчыка 2007 года нараджэння і дзяўчынку 2012 года нараджэння. У момант ДТЗ дзеці знаходзіліся на рэгуляваным пешаходам пераходзе. У выніку інцыдэнту яны атрымалі цялесныя пашкоджанні і былі дастаўлены ў медыцынскую ўстанову.

Абставіны здарэння высвятляюцца. На месцы здарэння працуюць супрацоўнікі аддзела ДАІ Кастрычніцкага РУУС Мінска, следчы, спецыяліст упраўлення ДКСЭ па Мінску.