Мара любой мамы — па дарозе на працу не везці дзіця ў садок праз палову горада альбо нават на суседнюю вуліцу, а проста спусціцца з малым на першы паверх свайго ж дома, і пакінуць яго групе. У жыхароў дома па вуліцы Калесніка абласнога цэнтра такая магчымасць паявілася. Садок разлічаны на 75 месцаў. Прыярытэт атрымалі жыхары дома, у якім садок з’явіўся. Гэта першая дзіцячая дашкольная ўстанова такога тыпу ў абласным цэнтры.
Аб’ект здалі ў эксплуатацыю ў лютым гэтага года. А цяпер вось ён расчыніў дзверы для выхаванцаў. Новы садок юрыдычна з’яўляецца філіялам дзіцячай дашкольнай установы «Яслі-садок № 73 г. Брэста». Ён убудаваны ў 72-кватэрны жылы дом. Садок складаецца з чатырох груп, у якіх выхоўваюцца 60 дашкольнікаў і 15 дзяцей ясельнага ўзросту. Памяшканні для кожнай групы складаюць самастойны блок. У кожным блоку маюцца раздзявалка, гульнявы пакой, рэсурсны цэнтр, умывальны пакой, туалет, а таксама буфетная, кладавая інвентару для ўборкі і калідор. У склад дзіцячага садка таксама ўваходзяць музычная і спартыўная залы, метадычны кабінет, кабінет загадчыка, медыцынскае памяшканне, невялікі харчовы блок. Дастаўка ежы праводзіцца ў спецыяльных ёмістасцях з харчовага блока садка № 73, гэта ў 400 метрах ад новага. Персанал садка складаюць 20 чалавек.
Павіншаваць гаспадароў садка: юных і дарослых прыехалі старшыня Брэсцкага аблвыканкама Юрый ШУЛЕЙКА і старшыня Брэсцкага гарвыканкама Аляксандр РАГАЧУК. Садку ў гэты дзень падарылі аўтамабіль.
Пасля традыцыйнага пераразання стужкі кіраўнік вобласці адзначыў, што калі для Брэста гэты праект пілотны, то ў вобласці ўжо маецца падобны вопыт: у 2020 годзе ў жылым доме ў Драгічыне ўведзены ў эксплуатацыю ўбудаваны садок на 60 месцаў. Запланавана будаўніцтва такіх жа аб’ектаў у Іванаве, у Пінску, У Маларыце.
— Дзіцячая ўстанова ў жылым доме зручная ва ўсіх накірунках, сказаў Юрый Шулейка — калі попыт вялікі, ёсць магчымасць ушчыльняць групы, а калі праз гады патрэба ў садку адпадзе, яго нескладана перапрафіляваць пад іншы аб’ект.
Святлана ЯСКЕВІЧ
Фота Аляксандра ШУЛЬГАЧА
Інтэрв'ю з алімпійскім чэмпіёнам па фехтаванні.
Прафесійна, аператыўна, па-добраму.