Вы тут

Як у Мастах працуе буйны аздараўленчы цэнтр, якога чакалі сем гадоў?


Амаль два гады таму пачаў дзейнічаць капітальна адрамантаваны басейн у фізкультурна-аздараўленчым цэнтры «Прынёманскі». Аб'ект меў розных уласнікаў, але доўгі час пуставаў з-за аварыйнага стану. А сродкаў на рамонт не хапала. Але мастаўчане не здымалі гэтае пытанне з парадку дня. Пэўныя намаганні прынеслі плён: сацыяльны праект падтрымалі абласныя ўлады. Рэканструкцыя дазволіла поўнасцю аднавіць басейн. І цяпер яго можна лічыць сапраўднай візітоўкай горада.


Дырэктар Дзмітрый Боцька праводзіць экскурсію па цэнтры. Увогуле, галоўная асаблівасць аб'екта — гэта водныя працэдуры. І яны тут даволі разнастайныя. Найперш праходзім комплекс з асобным міні-басейнам, які разлічаны на шэсць-восем чалавек. Менавіта такія групы часцей за ўсё прыходзяць па водныя працэдуры. Гэта што датычыцца арганізаванага адпачынку. Многія прыязджаюць з найбліжэйшых населеных пунктаў, напрыклад, са Скідзеля. Але больш за ўсё мясцовых. Напрыклад, прадпрыемства «Мастоўдрэў» закупляе абанементы для сваіх работнікаў.

У так званым малым басейне займаецца група малодшых школьнікаў. Зараз у іх урок фізічнай падрыхтоўкі па тэме «Плаванне». Такія заняткі арганізаваны для школ з усяго раёна. На адзін клас — гадзіна. Тут вучаць дзяцей плаваць, школьнікі здаюць нарматывы, праводзяць спаборніцтвы. Раней такой магчымасці ў Мастах не было. Старэйшыя вучні могуць наведваць вялікі басейн для дарослых з чатырма дарожкамі, даўжыня якіх 25 метраў. Прапускная здольнасць басейна — 50 чалавек у гадзіну.

— У спартыўным комплексе ёсць інструктары, якія вучаць дзяцей і дарослых плаванню, правільнаму дыханню і бяспечным паводзінам на вадзе. Распрацаваны цэлы комплекс паслуг з воднай аэробікай, уведзена скідачная сістэма для людзей пенсійнага ўзросту і пачынаючых спартсменаў, — каментуе Дзмітрый.

Часу для аздараўлення дастаткова: басейн працуе да 21 гадзіны. І самае галоўнае — тут зусім не чуваць паху хлору, а чыстая блакітная вада так і цягне акунуцца. Чысцінёй вады, дарэчы, нават спецыялісты па абслугоўванні абсталявання былі здзіўлены. Дырэктар такі феномен тлумачыць новымі фільтрамі і ўсёй сістэмай водападрыхтоўкі і ачысткі, хоць басейн прыйшлося падымаць амаль што з нуля. На капітальны рамонт было выдаткавана амаль чатыры мільёны рублёў. Мадэрнізацыя атрымалася сапраўды маштабнай. У выніку 40-гадовы аб'ект атрымаў новае сучаснае аблічча. Да новага комплексу праяўляе інтарэс і бізнес. Тут у хуткім часе плануецца адкрыць дзіцячае кафэ і цырульню.

Маргарыта УШКЕВІЧ

Фота Алены ДАЎЖАНОК

Загаловак у газеце: Блакітны колер здароўя

Выбар рэдакцыі

Гараскоп

Усходні гараскоп на наступны тыдзень

Усходні гараскоп на наступны тыдзень

У пачатку тыдня да Ракаў могуць падступна падкрасціся трывогі і сумневы.

Здароўе

Як працуюць санаторныя школы-інтэрнаты для дзяцей, хворых на скаліёз?

Як працуюць санаторныя школы-інтэрнаты для дзяцей, хворых на скаліёз?

Па статыстыцы на пяць хворых дзяўчынак прыходзіцца толькі адзін хлопчык.

Рэгіёны

У якіх ўмовах працавалі медыкі ў гады вайны?

У якіх ўмовах працавалі медыкі ў гады вайны?

Подзвіг ваенурачоў адлюстроўвае выстава Брэсцкага абласнога краязнаўчага музея.

Грамадства

Што трэба ведаць тым, хто адпачывае каля вадаёмаў

Што трэба ведаць тым, хто адпачывае каля вадаёмаў

Нават пры наяўнасці на пляжы ратавальнай станцыі не варта грэбаваць элементарнымі правіламі бяспекі.