У Дзяржаўным літаратурным музеі Янкі Купалы рэалізуецца дынастыйны выставачны праект мастачкі Аксаны Аракчэевай «Як у садзе кветка».
Сёлета спаўняецца 95 гадоў з дня нараджэння выдатнага беларускага мастака Барыса Аракчэева. Аксана Барысаўна — яго малодшая дачка. Штогод яна ладзіць у Купалавым музеі выставу ў памяць аб бацьку — сваім першым настаўніку ў жывапісе. Гэтым разам вернісаж прысвечаны таксама музе мастака — яго жонцы Галіне Ягораўне.
Карціны Барыса і Аксаны Аракчэевых нібы вядуць са сцен зала бязгучную, але выразную пераклічку аб пераемнасці радавых традыцый. Большасць твораў паказана гледачам упершыню.
Сям’я Аракчэевых любіла кветкі. Яны заўсёды былі і ў мінскай кватэры, і на лецішчы. Сімвал кахання Барыса і Галіны — бэз. Калісьці мастак падарыў сваёй нявесце яго квітнеючыя галінкі ў кітайскай вазе, якая стала хатнім сімвалам вечнага кахання і аб’ектам многіх нацюрмортаў. «Калі я не пісаў увесну бэз, дык быццам не было і года», — прамаўляў Барыс Аракчэеў. А на залатое вяселле ён зрабіў сваёй Галі рамантычны падарунак — напісаў букет лілей.
Любоў да прыроды, захапленне дзівосным светам раслін перадаліся яго дачцэ Аксане. «Кветкі натхняюць мяне на творчасць. Малюю іх і алеем на палатне, і акварэллю на паперы. А болей за ўсё мне падабаецца ствараць ілюстрацыі да дзіцячых кніжак. І там расліны — ужо жывыя істоты: вясёлыя і гарэзлівыя альбо задуменныя і сумныя», — шчыра дзеліцца мастачка. Яна таксама плённа супрацоўнічае з часопісам «Родная прырода», ілюструе яго дадатак «Юны натураліст». На выставе можна ўбачыць сакавітыя кветкавыя нацюрморты Аксаны Барысаўны.
Апошнім часам Аракчэева часта малюе партрэты: «Пільна ўглядаюся ў чалавечыя вочы — і мяне ажно працінае ад таго ўнутранага сэнсу, які яны выпраменьваюць»…
Сутнасць экспазіцыі — аповед аб шчаслівай сям’і, дзе панавалі любоў і ўзаемаразуменне, а вышэй за ўсё шанавалася творчасць у розных яе праявах. Барыс і Галіна Аракчэевы вырасцілі трох дачок: Алену, Марыну і Аксану, і ўсе сталі мастачкамі. Аксана Барысаўна захавала малюнкі і дэкаратыўныя вырабы свае і сясцёр яшчэ са школьнай пары, рэчы і дакументы матулі і таты, сямейныя рэліквіі, з якімі знітаваны шчаслівыя ўспаміны. І кранальна падзялілася самым дарагім з гасцямі выставы. (Фота 6 і 7)
Выстава прадоўжыцца да 8 мая. Па завяршэнні праекта мастачка перадасць у дар Дзяржаўнаму літаратурнаму музею Янкі Купалы эскіз і карціну Барыса Аракчэева «Ноч на Івана Купалу».
Святлана ІШЧАНКА
Мерапрыемства праводзіцца на добраахвотнай аснове.
Не выявіць ні секунды абыякавасці.