Вы тут

Як зарэгістравацца на ЦТ анлайн і афлайн


2 мая ў краіне распачнецца рэгістрацыя абітурыентаў на цэнтралізаванае тэсціраванне. Зрабіць гэта трэба не пазней за 1 чэрвеня.


Фота з архіва. Аўтар: Ганна Занкавіч.

Пункты рэгістрацыі будуць працаваць з 9.00 да 18.00 — у нядзелю 2 мая, з 9.00 да 19.00 у буднія дні і з 9.00 да 18.00 — па суботах 15 і 29 мая. Выхадныя дні — 8, 9, 10, 11, 16, 22, 23 і 30 мая.

У абітурыентаў ёсць выбар: рэгістравацца на ЦТ анлайн або прыйсці ў пункт рэгістрацыі асабіста.

Рэгістрацыя анлайн

Запісацца на ЦТ 2021 можна праз спецыяльную форму на сайце Рэспубліканскага інстытута кантролю ведаў. Папярэдняя рэгістрацыя будзе даступная з 9 гадзін 2 мая да 12 гадзін 1 чэрвеня. У апошні дзень пасля 12 гадзін і да закрыцця пунктаў рэгістрацыі ў 19 гадзін падаць заяву на ўдзел у ЦТ можна будзе толькі асабіста.

Спачатку трэба будзе ўвесці свае даныя (серыя і нумар дакумента, які сведчыць асобу, мабільны нумар тэлефона). Затым абітурыенту прыйдзе SMS з паролем да асабістага кабінета. Ён фарміруецца ў момант першага ўваходу. У наступныя разы трэба будзе толькі ўвесці лагін і пароль.

Абітурыент выбірае вучэбныя прадметы і пункты тэсціравання. Далей ён павінен аплаціць удзел у ЦТ праз сістэму АРІП (не пазней за 1 чэрвеня), выкарыстоўваючы нумар свайго асабовага рахунку, названага ў асабістым кабінеце сістэмы рэгістрацыі. Гэта сума складае 2,9 рубля за адзін вучэбны прадмет (у кошт закладваюцца выдаткі на работу пунктаў рэгістрацыі, афармленне дакументаў і правядзенне экзамену). І, каб завяршыць працэдуру, трэба прыйсці ў адзін з абраных пунктаў ЦТ і забраць пропускі. Без іх на тэсціраванне не пусцяць.

Абітурыенты, з якіх не спаганяецца плата за прыём і афармленне дакументаў для ўдзелу ў ЦТ, павінны ў прапанаваных ім пунктах рэгістрацыі дату і час асабіста (або праз законнага прадстаўніка) падаць заяву і забраць у пункце рэгістрацыі пропускі, маючы пры сабе дакумент, які сведчыць асобу, а таксама дакументы, якія пацвярджаюць права на льготу, і іх ксеракопіі.

Прыйсці па пропуск трэба не пазней за 1 чэрвеня. У графе «Абраныя прадметы і пункты тэсціравання» будуць указаны адрасы пунктаў рэгістрацыі, у адзін з якіх неабходна будзе звярнуцца пасля здзяйснення аплаты. Пры сабе трэба мець пашпарт або від на жыхарства, пасведчанне бежанца. Забраць пропускі замест абітурыента могуць таксама яго законныя прадстаўнікі.

Рэгістрацыя асабіста

Калі абітурыент жадае запісацца на ЦТ афлайн, ён (або яго законны прадстаўнік) можа звярнуцца ў адзін з 41 пунктаў рэгістрацыі. Аднак у любы час гэта зрабіць немагчыма. З-за пандэміі, каб не дапусціць высокай канцэнтрацыі людзей у замкнёнай прасторы, пункт рэгістрацыі кожнаму абітурыенту прызначае пэўныя дату і час для візіту. Пры сабе абавязкова трэба мець пашпарт і грошы для аплаты ЦТ. Інфармацыю аб тым, якім чынам арганізуецца чарга, размесцяць на сайце пункта рэгістрацыі.

У кожным з пунктаў тэсціравання абітурыент можна запісацца ў любую ВНУ, дзе яму будзе больш зручна здаваць экзамен. Усё таму, што сістэма рэгістрацыі аўтаматызаваная. Напрыклад, прыйшоўшы ў Магілёўскі дзяржаўны ўніверсітэт, можна падаць заяўку на здачу ЦТ у Мінску, Гродне, Гомелі, Брэсце і г. д. І зусім неабавязкова пісаць тэсціраванне ў ВНУ, куды абітурыент збіраецца паступаць. Лепш выбраць месца бліжэй да дома, каб пазбегнуць непрадбачаных сітуацый (спазненне транспарту, забытыя дакументы і г. д.).

Абітурыентам дазваляецца зарэгістравацца не больш як на чатыры дысцыпліны. Такім чынам, у іх ёсць магчымасць ракіроўкі пры паступленні на роднасныя спецыяльнасці.

Пры жаданні можна памяняць прадметы для здачы на ЦТ. Да атрымання пропускаў у асабістым кабінеце можна змяніць даныя ў заяве: набор прадметаў, мову тэсту і г. д. Калі з'явіцца неабходнасць гэта зрабіць ужо пасля атрымання пропуску, трэба будзе звяртацца ў пункт ЦТ асабіста. Адпаведна, калі абітурыент рэгістраваўся афлайн, то і змены ўносяцца ў тым пункце, дзе ён пісаў заяву. Аднак усе маніпуляцыі можна будзе зрабіць толькі да 1 чэрвеня (уключна).

Выбар мовы, на якой абітурыент жадае здаваць тэсты, ажыццяўляецца яшчэ на этапе падачы заявы і рэгістрацыі на ЦТ. Заява запаўняецца ўдзельнікам ЦТ на адной з дзвюх дзяржаўных моў: беларускай ці рускай на выбар. Трэба мець на ўвазе, што пазней зона рэгістрацыі бланка адказаў будзе запаўняцца абітурыентам на той жа мове, на якой была пададзена заява пры рэгістрацыі. І сертыфікат удзельніка ЦТ будзе запаўняцца таксама на той мове, на якой падавалася заява.

Абітурыентам варта нагадаць, што працэс рэгістрацыі для ўдзелу ў ЦТ лічыцца завершаным толькі пасля атрымання абітурыентам пропускаў. Менавіта ў пропуску ўказваецца інфармацыя, калі і куды трэба прыходзіць у дзень правядзення тэсціравання.

Пропуск для ўдзелу ў цэнтралізаваным тэсціраванні лічыцца зарэгістраваным, калі на ім маецца пячатка ўстановы, вызначанай пунктам правядзення ЦТ, подпіс упаўнаважанага прадстаўніка пункта рэгістрацыі і рэгістрацыйны нумар. У выпадку страты пропуску выдаецца дублікат.

Замежнікі могуць зарэгістравацца на ЦТ любым з вышэйпералічаных спосабаў. Калі няма магчымасці аплаціць удзел у ЦТ і атрымаць пропускі да 1 чэрвеня, то можна прайсці рэгістрацыю па прыбыцці ў Беларусь. Трэба будзе звярнуцца ў пункт рэгістрацыі не пазней чым за адзін дзень да пачатку тэсціравання, атрымаць асабовы рахунак, унесці плату за прыём і афармленне дакументаў праз сістэму «Разлік» (АРІП), выкарыстоўваючы нумар асабовага рахунку, атрыманага ў пункце рэгістрацыі. Пры сабе, вядома, трэба мець пашпарт.

Надзея НІКАЛАЕВА

Выбар рэдакцыі

Фінансы

Як засцерагчы сябе ад крадзяжу грошай з карткі?

Як засцерагчы сябе ад крадзяжу грошай з карткі?

У I квартале 2021 года было зарэгістравана звыш 800 крадзяжоў грошай праз інтэрнэт, гэта ў 4,5 раза больш, чым за такі ж перыяд год таму.

Грамадства

Спытайце пра радзіннае. Як раней адзначалі Радаўніцу?

Спытайце пра радзіннае. Як раней адзначалі Радаўніцу?

На пытанне чытача адказваюць Янка Крук і Аксана Катовіч.

Палітыка

Прэзідэнт: сцяг і герб Беларусі адлюстроўваюць нацыянальную ідэю народа — імкненне да незалежнага і мірнага жыцця

Прэзідэнт: сцяг і герб Беларусі адлюстроўваюць нацыянальную ідэю народа — імкненне да незалежнага і мірнага жыцця

Урачысты рытуал ушанавання дзяржаўных сцяга і герба праходзіць у Мінску з удзелам Аляксандра Лукашэнкі.