Прайшла сесія Віцебскага абласнога Савета дэпутатаў

Пытанне аб прызначэнні стыпендый спартсменам Віцебскай вобласці, падтрымкі ў станаўленні патэнцыйных чэмпіёнаў і рэкардсменаў было адным з галоўных на пазачарговай сесіі Віцебскага абласнога Савета дэпутатаў. Вельмі актуальная тэма напярэдадні Алімпійскіх гульняў, дэпутаты гэта разумелі.

Паводле інфармацыі ўпраўлення спорту і турызму Віцебскага аблвыканкама, сёлета вартыя атрымліваць грашовую падтрымку 89 спартсменаў, якія дабіліся найбольш значных вынікаў у 24 відах спорту, у тым ліку 21 — алімпійскіх.

Цікава, што толькі 49 з іх жывуць у абласным цэнтры. Астатнія — у правінцыі, у тым ліку і ў глыбінцы. У прыватнасці, у Оршы — 13, Наваполацку — 12, Полацку — 6, у Браславе, Сянно і Чашніках — па двое, у Шуміліне, Лепелі і Глыбокім — па адным.

На выплату стыпендый з абласнога бюджэту на гэты год спатрэбіцца прыблізна 250 тысяч рублёў.

Для параўнання: летась атрымальнікамі стыпендый былі 97 чалавек. Таму карэкціровак у бок павелічэння фінансавання не спатрэбіцца.

У згаданым упраўленні падкрэсліваюць, што фактаў, каб нехта паскардзіўся, чаму не ён стыпендыят, не было. Усё справядліва, бо ўлічваюцца дасягненні, перспектывы, напрыклад, ці з'яўляецца спартсмен кандыдатам для ўдзелу ў Алімпіядзе?

У 2020 годзе спартсменамі Прыдзвінскага краю на афіцыйных міжнародных спаборніцтвах заваявана 10 медалёў: тры — залатыя, два — сярэбраныя і пяць — бронзавых. З агульнай колькасці заваяваных медалёў сем — па алімпійскіх відах спорту.

Поўнач краіны стабільна ў прызавой тройцы па пераможных месцах сярод абласцей.

Народным выбраннікам агучылі сёлетнюю алімпійскую статыстыку. 27 прадстаўнікоў Віцебскай вобласці ў дзевяці відах спорту прэтэндуюць на права змагацца за медалі на XXXІІ летніх Алімпійскіх гульнях у сталіцы Японіі.

Між іншым, цікавы факт: у спісе алімпійцаў-пераможцаў з Віцебшчыны пад нумарам адзін — лёгкаатлет Рамуальд Клім, які ў Токіа ў 1964 годзе заваяваў залаты медаль на XVІІІ Алімпійскіх гульнях. Хочацца верыць, што ў Японіі пашанцуе нашым не толькі з Віцебшчыны і не толькі з «золатам» няхай вернуцца. Пабольш медалёў розных!

Робіцца многае, каб своечасова выявіць схільнасць хлопчыкаў і дзяўчынак да спорту, дапамагчы раскрыць спартыўны талент. Летась у спецыялізаваных па спорце класах займалася 649 спартсменаў па 23 відах.

А ўсяго спартыўную падрыхтоўку ў вобласці праходзяць больш чым 21 тысяча чалавек пад кіраўніцтвам каля тысячы трэнераў-выкладчыкаў.

Падрыхтоўку спартыўнага рэзерву і спартсменаў высокага класа забяспечваюць каля шасцідзесяці спецыялізаваных вучэбна-спартыўных устаноў і два вучылішчы алімпійскага рэзерву. У іх за кошт бюджэтных сродкаў культывуецца прыкладна пяцьдзясят відаў спорту.

Стварэнне добрых умоў для заняткаў фізкультурай і спортам, будаўніцтва новых аб'ектаў — гэтыя тэмы пад пільнай увагай дэпутатаў розных узроўняў. Дарэчы, у вобласці для арганізацыі фізкультурна-аздараўленчай, спартыўна-масавай работы і турызму функцыянуе каля чатырох тысяч фізкультурна-спартыўных збудаванняў.

Некалькі гадоў таму ў абласным цэнтры пабудавалі цудоўны цэнтр для трэніровак і спаборніцтваў батутыстаў. Між іншым, праз некалькі дзён пасля сесіі прадстаўнікі вялікага спорту Віцебшчыны Уладзіслаў Ганчароў і Алег Рабцаў выйгралі «золата» чэмпіянату Еўропы па скачках на батуце ў Сочы.

У 2020 годзе ўведзены ў эксплуатацыю паветраапорны футбольны манеж у Віцебску, адкрылі восем пляцовак са штучным пакрыццём у рамках сацыяльнага праекта «Bonfesto-дзецям» (у Дубровенскім, Талачынскім, Лепельскім, Пастаўскім, Глыбоцкім, Шумілінскім, Лёзненскім, Віцебскім раёнах).

Зрабілі капітальныя рамонты з элементамі мадэрнізацыі: стадыёна Віцебскага дзяржаўнага ўніверсітэта імя П. М. Машэрава, спартыўнага комплексу горада Барань і стадыёна гарадскога пасёлка Балбасава Аршанскага раёна.

І сёлета будуць адкрывацца новыя залы, спартыўныя комплексы, палацы...

Гарадскімі і раённымі аддзеламі і сектарамі спорту і турызму летась праведзена каля трох тысяч спартыўна-масавых і турысцкіх мерапрыемстваў. У іх узялі ўдзел больш за 130 тысяч чалавек.

Сярод мноства акцый, якія рэкламуюць заняткі фізкультурай і магчымасць паказаць вялікія дасягненні ў спорце, бадай, адна з самых вядомых — штогадовая міжнародная выстаўка-кірмаш «Віцебшчына — за здаровы лад жыцця». Тут юныя спартсмены бяруць удзел у паказальных выступленнях. З наведвальнікамі гутараць вядомыя спартсмены, ветэраны спорту. Яны, у прыватнасці, раяць бацькам, чым лепш заняцца іх дзецям, якія секцыі найлепш выбраць і гэтак далей.

У Віцебскай вобласці ўсё больш развіваюць спартыўны турызм: на трэніроўкі прыязджаюць аматары спорту і прафесіяналы з краін не толькі блізкага, але і далёкага замежжа.

Аляксандр ПУКШАНСКІ