Беларусь атрымала ўласную вакцыну ад COVID-19

Беларусь атрымала ўласную вакцыну ад COVID-19. Аб гэтым заявіў Аляксандр Лукашэнка, адказваючы на пытанні журналістаў, перадае БЕЛТА.

Лукашэнка нагадаў: калі ён заяўляў аб намеры Беларусі вырабіць сваю вакцыну, то былі чуваць галасы крытыкаў, што гэта вельмі складана або нават немагчыма. «У прабірцы мы ўчора атрымалі сваю вакцыну — беларускую. Іншую, якая адрозніваецца ад таго, што мы сёння купляем. Як урачы называюць, жывую вакцыну», — расказаў ён.

«Мы не спяшаемся. Мы паглядзім, што будзе паслязаўтра, калі зменіцца хвароба. Таму што штам будзе зусім іншы», — адзначыў Аляксандр Лукашэнка.

Ён звярнуў увагу на адсутнасць гарантыі, што цяперашнія вакцыны будуць у далейшым дапамагаць ад новых мутацый віруса. «У нас сёння ёсць вакцыны, якія працуюць. Па расійскіх тэхналогіях, кітайскія купілі. А заўтра мы сваю вакцыну, якая ў прабірцы ўжо, прыстасуем да таго штама, які мы будзем мець. Хто яго ведае, як жыццё складзецца», — сказаў кіраўнік дзяржавы.