Выстава «Школа нацыянальнай журналістыкі — школа Рыгора Булацкага» складаецца з трох тэматычных стэндаў з унікальнымі фотаздымкамі, якія раней нідзе не публікаваліся.
Яны распавядаюць пра франтавое жыццё Рыгора Булацкага. Дарэчы, ён быў штурманам бамбавіка, здзейсніў больш за 80 баявых вылетаў на самалёце. Здымкі пасляваеннага перыяду прысвечаны грамадскай, навуковай дзейнасці прафесара і актыўнай адміністрацыйнай рабоце па стварэнні факультэта журналістыкі БДУ. Варта адзначыць, што да 1967 года будучыя журналісты навучаліся на аддзяленні журналістыкі філалагічнага факультэта.
Рыгор Васільевіч Булацкі (1921-1999) — беларускі, савецкі журналіст, гісторык, прафесар. Пасля заканчэння сярэдняй школы ў 1939 годзе паступіў на гістарычны факультэт БДУ, але ў тым жа годзе быў прызваны ў Рабоча-сялянскую Чырвоную армію, служыў у 450 асобным батальёне сувязі. У жніўні 1941 года скончыў Мелітопальскае авіяцыйнае вучылішча. Удзельнік Вялікай Айчыннай вайны.
БДУ скончыў у 1951 годзе. Працаваў у шматтыражнай газеце «Беларускі універсітэт», з 1954 года — на філалагічным факультэце старшым выкладчыкам, намеснікам дэкана і загадчыкам аддзялення журналістыкі, у 1963 стаў дэканам філалагічнага факультэта, а з 1967 па 1981 год — дэкан факультэта журналістыкі. Падрыхтаваў каля 40 кандыдатаў навук і некалькі дактароў навук.
Узнагароджаны баявымі ордэнамі Чырвонай Зоркі, ордэнам Айчыннай вайны I ступені, медалямі. За працоўныя заслугі адзначаны ордэнам «Знак Пашаны». Лауреат прэміі Саюза журналістаў СССР (1980 год) за падручнік «Гісторыя беларускай журналістыкі».
Надзея НІКАЛАЕВА
Выбар саджанца для садавода — той момант, значнасць якога складана пераацаніць.
Канцэрт для дзяцей і моладзі, пластычны спектакль Ягора Дружыніна і «Рок-панарама».