Беларусы, якія жывуць у краінах ЕАЭС і Малдове, змогуць атрымліваць пенсіі ў мясцовай валюце

Беларусы, якія жывуць у дзяржавах ЕАЭС і Малдове, змогуць атрымліваць пенсіі ў валюце краіны пражывання, паведамілі на сайце ААТ «ААБ Беларусбанк».

Гэта стала магчыма дзякуючы адкрыццю «Беларусбанкам» мультывалютных рахункаў у Міждзяржаўным банку (Масква, Расія) для абслугоўвання пагаднення аб пенсійным забеспячэнні працоўных дзяржаў — членаў Еўразійскага эканамічнага саюза і дагавора паміж Беларуссю і Малдовай аб сацыяльным забеспячэнні.

У банку растлумачылі: такім чынам будзе рэалізавана магчымасць пералічваць грошы для выплаты беларускіх пенсій тым, хто жыве ў краінах ЕАЭС (Арменія, Казахстан, Кыргызстан, Расія) і Малдове, у нацыянальнай валюце краіны пражывання атрымальніка, а таксама ажыццяўляць міжнародныя плацяжы кліентаў банка ў валютах краін ЕАЭС і малдаўскіх леях.

Міждзяржаўны банк заснаваны ў 1993 годзе 10 дзяржавамі СНД і з’яўляецца міжнародным банкаўскім разліковым і крэдытным інстытутам, мэта якога — садзейнічанне эканамічнай інтэграцыі і развіццю нацыянальных эканомік краін СНД. Цяпер краінамі — удзельніцамі банка з’яўляюцца Расія, Беларусь, Казахстан, Малдова, Арменія, Таджыкістан, Туркменістан і Кыргызстан.

Прэв’ю: pixabay.com