Анонс. Самае цікавае ў майскім нумары часопіса «Алеся»

Мары пра мора...

Для большасці з нас летні адпачынак — гэта найперш паездка да мора. На цёплым беразе пад ласкавым сонцам забываюцца ўсе нягоды, галава адключаецца ад «важных» праектаў і «самых надзённых» спраў. Акрамя змены псіхалагічнай абстаноўкі, з'яўлення новых уражанняў, мора дапамагае ўмацаваць імунітэт, а гэта, улічваючы наступствы вірусаў і інфекцый, вельмі важна цяпер для здароўя.

У мінулым годзе пандэмія COVІD-19 стала для турыстычнай галіны сур'ёзным выклікам. Ці змогуць гэтым летам ажыццявіцца нашы мары пра мора? Дзе чакаюць беларускіх турыстаў і на якіх умовах? Больш падрабязна пра гэта чытачам «Алесі» расказала менеджар турыстычнай кампаніі «Галар-экспа» Вольга Ладуцька. Паводле яе слоў, турыстычны сезон пачаўся даволі актыўна, ужо з вясны было заключана шмат дагавораў на ранняе браніраванне гатэляў, а тыя, хто не паехаў летась і аформіў дэпазіты, выбралі новыя праграмы. На жаль, усё яшчэ закрыты для турыстаў папулярныя курорты ў Іспаніі, Італіі, Францыі, Партугаліі.

Так, мы засумавалі па моры і ласкавай хвалі. І сёння дзеля адпачынку людзі гатовыя цярпець многія нязручнасці, якія ўзніклі з-за COVІD-19.

Напрыклад, ці ведаеце вы, што... Па прыбыцці ў турыстычны гатэль абавязкова адбываецца дэзынфекцыя багажу і ручной паклажы. Санітайзеры ўстаноўлены па ўсёй тэрыторыі комплексу. Вам нават могуць зрабіць заўвагу адміністратар рэстарана або дзяжурны адміністратар, калі вы забыліся пра гігіену рук.

У некаторых гатэлях бескантактава вымяраецца тэмпература, і калі ў вас раптам акажацца вышэй за 37,5°, могуць абмежаваць свабоду перамяшчэнняў.

Пра сацыяльную дыстанцыю паўсюль нагадвае разметка на падлозе. Сталы ў рэстаранах і барах размешчаны такім чынам, каб была адлегласць не менш за метр паміж імі. На пляжы і каля басейна сацыяльная дыстанцыя паміж лежакамі — два метры. Анімацыя таксама праходзіць з захаваннем сацыяльнай дыстанцыі.

Дарэчы, сюрпрызам года для беларусаў сталі Мальдывы. Традыцыйна гэта фешэнебельны і, адпаведна, дарагі адпачынак, але сёлета нечакана ў беларускія турфірмы паступілі даступныя па цане прапановы ад гатэляў. Чаму б не скарыстацца такім падарункам? Белыя пясочныя выспы, чароўнай прыгажосці прырода, багаты падводны свет — усё можна пабачыць на свае вочы... Падрабязнасці — у свежым нумары «Алесі».

Мода на сям'ю зусім прайшла?

На працягу стагоддзяў сям'я ў нашай культуры лічылася і крэпасцю, якая абароніць ад бед і няшчасцяў, і крыніцай, дзе чэрпаюць сілы і натхненне. Нягледзячы на ўсе ўзрушэнні і трансфармацыі, сям'я выстаяла ў XX стагоддзі. Ці захаваецца яна надалей? Чым тлумачыцца сёння вялікая колькасць разводаў і тых, хто наогул не жадае ўступаць у шлюб? Пра гэта ў часопісе разважае прафесар кафедры сацыяльнай камунікацыі факультэта філасофіі і сацыяльных навук БДУ, доктар гістарычных навук, дацэнт Ірына Калачова.

Беларуская карэянка

Лідзія прывыкла, што пры знаёмстве з ёй першая рэакцыя — здзіўленне: «Тваё прозвішча О?». Многія думаюць, што яны няправільна пачулі, перапытваюць і зноў здзіўляюцца. Дзяўчына толькі ўсміхаецца ў адказ. Лідзія О — беларуская карэянка. Яе бацькі больш за дваццаць гадоў таму пераехалі ў Беларусь, Лідзія нарадзілася ўжо ў Мінску, вучылася ў мінскай школе, паспяхова скончыла Беларускі дзяржаўны медыцынскі ўніверсітэт. Цяпер яна працуе ўрачом-стаматолагам у паліклініцы горада Заслаўя і выкладае ў БДМУ. Пра свой цікавы лёс, любоў да далёкай радзімы і спасціжэнне традыцый беларускай культуры Лідзія О расказвае чытачам «Алесі».

Прызнаць шлюб несапраўдным

Гісторыя ў Вольгі Ш. няпростая. У юнацтве з-за свайго авантурнага характару яна заключыла шлюб з замежным грамадзянінам. Хлопец з паўднёвай краіны хацеў «замуціць» бізнес у Беларусі і папрасіў з ім распісацца. Дзяўчына згадзілася, не асабліва ўнікаючы ў нейкія падрабязнасці. Для яе найперш гэта былі прыгоды.

Доўгі час Вольгу не цікавіла, дзе яе «муж», пакуль яна не пакахала іншага. Каханне было ўзаемным, размова зайшла пра вяселле. І тут Вольга ўспомніла, што яна афіцыйна замужам. А каб атрымаць развод, патрэбна сумесная заява ў загс, аднак «муж», як высветлілася, з'ехаў на радзіму, і адрасу яго няма... Адвакат Мінскай абласной калегіі Таццяна Сямешка тлумачыць, як магчыма спыніць шлюбныя адносіны пры немагчымасці сумеснай падачы заявы аб разводзе. Яна рэкамендуе выбраць іншы шлях: не скасоўваць шлюб, а прызнаць яго несапраўдным, і дае падрабязныя парады.

Каб не скралі грошы з карткі

У І квартале 2021 года было зарэгістравана звыш 800 крадзяжоў грошай праз інтэрнэт, гэта ў пяць разоў больш, чым за мінулы год. Ад ашуканства пацярпелі людзі рознага ўзросту, сацыяльнага статусу і ўзроўню адукацыі, але асабліва шмат пенсіянераў.

Сярод галоўных прычын — празмерная даверлівасць і ігнараванне правілаў бяспекі пры выкананні інтэрнэт-аперацый з грашыма. Пераканаўчасць у размовах, паказная ветлівасць тэлефонных махляроў дазваляюць злачынцам атрымліваць у суразмоўцаў асабістыя даныя іх банкаўскай карткі, а затым выкарыстоўваць іх у ашуканскіх схемах.

Каб не трапіць у непрыемную сітуацыю, спецыялісты раяць для анлайн-плацяжоў мець асобную картку (не зарплатную). Яшчэ адна рэкамендацыя — устанавіць сутачны ліміт па картцы, больш за які банк не дазволіць спісаць за 24 гадзіны. А пенсіянерам, хто наогул не плаціць карткай праз інтэрнэт, прапануецца сцерці трохзначны нумар CVV/CVC кода з адваротнага боку: гэта дапаможа захаваць грошы, калі раптам згубіцца картка або кашалёк.