Чым беларускiя экспарцёры будуць здзiўляць патрабавальны Дубай i ўвесь свет?

Азiя, Еўропа i Персiдскi залiў

Выстаўка ЭКСПА — маштабны мiжнародны форум, дзе краiны ўсяго свету прадстаўляюць свае найноўшыя навукова-тэхнiчныя дасягненнi i нацыянальны каларыт. Гiсторыя гэтага мерапрыемства пачалася ў сярэдзiне ХIХ стагоддзя ў Хрустальным палацы Гайд-парку ў Лондане. Цiкавую iдэю падхапiлi французы, а пасля i краiны амаль усяго свету. Дарэчы, самы вядомы сiмвал Парыжа — Эйфелева вежа — першапачаткова задумваўся як часовае збудаванне, якое служыла ўваходнай аркай Сусветнай выстаўкi 1889 года.

Краiну i месца правядзення ЭКСПА традыцыйна выбiрае Мiжнароднае бюро выставак шляхам галасавання. Цяпер выстаўкi адбываюцца кожныя пяць гадоў у буйных гарадах планеты. Так, прымалi мiжнародны форум Барселона, Чыкага, Брусель, Сан-Францыска, Манрэаль, Осака, Шанхай. Упершыню сёлета ЭКСПА пройдзе ў рэгiёне Персiдскага залiва — у Дубаi Аб'яднаных Арабскiх Эмiратаў. За магчымасць правесцi чарговы форум 2020 года першапачаткова змагалiся пяць гарадоў, на пэўным этапе iх засталося чатыры: Дубай (Аб'яднаныя Арабскiя Эмiраты), Екацярынбург (Расiя), Iзмiр (Турцыя), Сан-Паўлу (Бразiлiя).

Пляцоўкай, дзе размесцiцца Сусветная выстаўка — 2020, абраны Dubai Trade Center плошчай у 438 гектараў, спраектаваны адмыслова для выстаўкi. Ён знаходзiцца недалёка ад аэрапорта Al Maktoum International, на роўнай адлегласцi ад Дубая i Абу-Дабi.

Першапачаткова выстаўка павiнна была праходзiць з 20 кастрычнiка 2020 года да 10 красавiка 2021-га. З-за пандэмii COVID-19 пачатак перанеслi на сёлетнюю восень.

Нягледзячы на гэта, арганiзатары захавалi назву ЭКСПА-2020 у мэтах маркетынгу i брэндынгу.

Галоўная тэма гучыць наступным чынам — «Аб'ядноўваючы розумы, ствараем будучыню». Вялiкая ўвага на ЭКСПА-2020 будзе ўдзелена i тром падтэмам: «Спрыяльная магчымасць», «Устойлiвае развiццё», «Мабiльнасць».

Па планах арганiзатараў, наступным горадам, якi прыме ЭКСПА ў 2025-м, стане японская Осака.

Беларусы на ЭКСПА

Упершыню наша краiна прыняла ўдзел у Сусветнай выстаўцы ў 1998 годзе, калi мерапрыемства праходзiла ў Лiсабоне (Партугалiя). Затым беларусы паўдзельнiчалi ў форуме ў 2000-м у нямецкiм Гановеры. Але першы ўласны нацыянальны павiльён прадставiлi толькi праз дзесяць гадоў у Шанхаi. Пасля айчынныя экспарцёры прэзентавалi свае напрацоўкi ў 2015 годзе ў Мiлане i ў 2017-м у Астане.

Аператарам айчыннага павiльёна на выстаўцы з'яўляецца Нацыянальны цэнтр маркетынгу Мiнiстэрства замежных спраў. Сярод удзельнiкаў ЭКСПА заяўлены Парк высокiх тэхналогiй, Нацыянальнае агенцтва iнвестыцый i прыватызацыi, Мiнiстэрства спорту i турызму, Мiнiстэрства прамысловасцi, Мiнiстэрства адукацыi, Мiнiстэрства iнфармацыi, Дзяржаўны камiтэт па навуцы i тэхналогiях, Нацыянальная акадэмiя навук i iншыя. Усе галiновыя мiнiстэрствы адправяць у Дубай свае матэрыялы аб перадавых экспартаарыентаваных прадпрыемствах.

Для рэкламавання Беларусi падрыхтавалi дзелавую i культурную праграму. Першая змяшчае прэзентацыю канцэрна «Белдзяржхарчпрам», Беларускi iнвестыцыйны форум, прадстаўленне экспартных магчымасцяў прадпрыемстваў нафтахiмiчнай галiны i беларускай навукi ды iншае. Акрамя таго, запланаваны днi кожнай з абласцей краiны i Дзень горада Мiнска. Культурная праграма беларускага павiльёна насычана выступленнямi народных вакальных i харэаграфiчных калектываў.

Марыя ДАДАЛКА