Вы тут

Убачыла свет новая кніга пісьменніка Алеся Бадака


Свет убачыла новая кніга пісьменніка Алеся Бадака, якую аўтар днямі прэзентаваў у «Акадэмкнізе». Выданне — цэлая палітра аповесцяў, апавяданняў і эсэ, якія дазваляюць чытачам правесці час у кампаніі цікавых герояў, атрымліваючы задавальненне ад сюжэтаў, дыялогаў і беларускай мовы.


Кніга выйшла ў Выдавецкім доме «Звязда», і яе можна лічыць прэзентацыяй найлепшых твораў, якія ў розныя гады выходзілі ў беларускіх і замежных перыядычных выданнях. Тут змешчаны дзве аповесці, «Нелюдзімы» і «Адзінокі васьмікласнік хоча пазнаёміцца», дзесяць апавяданняў, сярод якіх, напрыклад, «Душа твая светлая», «Інструкцыя па спакушэнні замужніх жанчын», «Тэорыя вінаватасці», «Ідэальны чытач» — дарэчы, аднайменную назву атрымала і кніга. Сам жа аўтар, калі разважае пра свайго чытача сёння, кажа:

— Мой чытач — той, які не чытае кніжкі ў метро, хоць, прызнаюся, сам іх там чытаю, больш за тое, электронныя. Я спампоўваю кнігу і чытаю пяць-шэсць старонак у дарозе, а потым ужо, калі мне цікава, знаходжу гэтую кнігу ў кнігарнях і набываю папяровую версію, каб прачытаць да канца. І мне чытач уяўляецца чалавекам, які мае магчымасць браць кнігу ў рукі дома і паглыбляцца ў яе, нікуды не спяшаючыся, задумваючыся над сказамі, словамі. Таму што, калі літаратура сапраўдная, не настолькі важны і сюжэт, і чым гісторыя заканчваецца, — адзначае Алесь Бадак.

Падчас прэзентацыі гаварылі пра сучасную класіку, аўтар разважаў пра майстроў слова, якія падабаюцца яму, пра тое, што ён думае пра сучасную крытыку і ці проста ў наш час сярод мноства кніг знайсці сваю, якая зацікавіць... Алесь Мікалаевіч дзяліўся гісторыямі пра тое, як пісаліся творы з новай кнігі, якімі водгукамі і гісторыямі ўжо паспелі «абрасці», напрыклад, за перыяд свайго жыцця ў перакладах на рускую і туркменскую мовы. Дарэчы, такога кшталту размовай з чытачом пра закуліссе пісьменніцкай паўсядзённасці з'яўляецца і раздзел кнігі «Запіскі на хаду». І гэта дае ўнікальную магчымасць адкрыць для сябе аўтара ўпадабаных твораў з новага ракурсу, нібы пагаварыць з ім пра жыццё, можа, адчуць нават, насколькі блізкія альбо не вашы думкі пра нейкія рэчы, задумацца пра важнае ў сабе і навокал. «Сутнаснае значэнне паэзіі можна лепш за ўсё зразумець не тады, калі яна ёсць, а тады, калі яе няма. Няма не вакол, а ў нас саміх. Таму што вонкава паэзія паўсюль. Не толькі ў кнігах, не толькі ў словах... І калі мы перастаём яе бачыць, адчуваць, успрымаць — гэта не значыць, што яе стала менш у свеце. Гэта значыць, што яе стала менш у нашых душах» — чытаеш і адразу хочацца спыніцца, азірнуцца, падумаць...

— Творчасць Алеся Мікалаевіча для нашага выдавецкага дома вельмі значная, таму што Алесь Бадак не вельмі часта выдаецца. І тут фактычна сабрана проза як мінімум за дваццацігоддзе. Тут і тыя творы, якія прайшлі апрабацыю перакладамі на іншыя мовы. Вельмі шмат ёсць ацэнак гэтых твораў з боку крытыкаў, прычым самага рознага кшталту. Напрыклад, апавяданне «Уцёкі на край дажджу» мела шырокі розгалас. Яно друкавалася ў часопісе «Наш сучаснік». І гэта гаворыць пра тое, што творы пісьменніка запатрабаваны. Што мне асабіста падабаецца ў гэтай кнізе як чытачу, дык гэта тое, што ў прозе Алеся Мікалаевіча заўсёды ёсць інтрыга, адчуваецца, што за напісаным стаіць высокая чытацкая культура. Бо, чытаючы нечыя творы, мы заўсёды параўноўваем іх з творамі іншых пісьменнікаў. І хочацца сказаць, што на маёй умоўнай паліцы гэтая кніга будзе стаяць побач з кнігамі Канстанціна Паўстоўскага, Янкі Брыля, Міхася Стральцова. Перакананы, што яна стане для чытача падзеяй, — сказаў падчас прэзентацыі дырэктар — галоўны рэдактар Выдавецкага дома «Звязда» Алесь Карлюкевіч.

Кніга і першая яе прэзентацыя адбыліся. А які лёс у «Ідэальнага чытача», толькі час пакажа. Таму лепш проста пайсці ў кніжную краму на ўласную сустрэчу з новай кнігай. Нішто не пераконвае лепш, чым той момант, калі ты гартаеш старонкі, чытаеш напісанае і проста разумееш: адгукаецца альбо не. Дарэчы, набыць творы любімых пісьменнікаў з дапамогай «Акадэмкнігі» можна і дыстанцыйна, скарыстаўшыся паслугай адпраўкі кніг па ўсёй Беларусі праз сістэму «Кніга — поштай». Чытайце, бо гэта робіць нас лепшымі!

Алена ДРАПКО

Загаловак у газеце: І слова адгукнецца ў чытачы

Выбар рэдакцыі

Грамадства

Час клопату садаводаў: на якія сарты пладовых і ягадных культур варта звярнуць увагу?

Час клопату садаводаў: на якія сарты пладовых і ягадных культур варта звярнуць увагу?

Выбар саджанца для садавода — той момант, значнасць якога складана пераацаніць.

Культура

Чым сёлета будзе здзіўляць наведвальнікаў «Славянскі базар у Віцебску»?

Чым сёлета будзе здзіўляць наведвальнікаў «Славянскі базар у Віцебску»?

Канцэрт для дзяцей і моладзі, пластычны спектакль Ягора Дружыніна і «Рок-панарама».