Вы тут

У Мінску адкрылася выстаўка ў фармаце publіc space


Прайшло амаль чатыры гады з моманту, як частка Камсамольскай вуліцы стала пешаходнай. За гэты час вуліца развівалася: абрастала новымі кавярнямі ды рэстаранамі. Але кафэ ды лавачак недастаткова, каб вуліца паўнавартасна належала гараджанам. Калі на Камсамольскай з'явілася мастацтва, тады і адбылася поўная трансфармацыя вуліцы ў пешаходную, ва ўлюбёнае месца баўлення часу мінчукоў.


Гісторыя праекта «Мастак і горад» пачалася ў 2012 годзе, калі Беларусь адзначала 125-годдзе з дня нараджэння Марка Шагала. Работы віцебскага мастака былі прадстаўлены ў фармаце open space. Летась праект наведаў Віцебск, бо яго тэма была прысвечана 100-годдзю УНОВІСа — авангарднага мастацкага аб'яднання, якое займалася радыкальным пераўтварэннем мастацтва таго часу.

Сёлета праект «Мастак і горад» адзначае дзесяцігадовы юбілей. Так, 27 мая на вуліцы Камсамольскай адкрылася выстаўка, прысвечаная творчасці беларускага мастака Леаніда Шчамялёва — выстаўка-памяць, выстаўка-падзяка мастаку, які сышоў у гэтым годзе. Але засталася яго творчасць, з якой кожны можа пазнаёміцца. Нават тыя, хто добра ведае работы Леаніда Шчамялёва, на выстаўцы «Мастак і горад» убачаць іх пад іншым ракурсам. Адна рэч — глядзець на карціну ў музеі, і зусім іншая — знаёміцца з ёй на вуліцы. Мастацтва ўступае ў дыялог з асяроддзем, адмыслова дапаўняючы яго.

Вобразна-пластычны стыль, напружана-рамантычная свядомасць і любоў да роднай Беларусі... Так характарызуюць творчасць Шчамялёва мастацтвазнаўцы. А глядач застаецца проста ўражаны магутнай сімволікай колераў і формаў, на якую мастака натхнялі маляўнічыя мясціны Беларусі, абліччы землякоў і часам проста звыклыя рэчы, у якіх Майстар можа ўбачыць Сусвет. Наведвальнікі змогуць самастойна вывучыць творы мастака, скарыстаўшыся QR-кодамі, якія адсылаюць да аўдыягіда па экспазіцыі. Да кожнай рэпрадукцыі ёсць тэкставае апісанне — прычым на трох мовах: беларускай, рускай і англійскай.

Па словах арганізатараў, у гэтым годзе запланавана правядзенне творчых акцый. Ахвотныя змогуць паўдзельнічаць у «Адкрытай майстэрні» і пад кіраўніцтвам мастака намаляваць уласную карціну.

Экспазіцыя «Фарбы душы. Леанід Шчамялёў» будзе даступная для наведвальнікаў да 20 верасня.

Арына КАРПОВІЧ

Загаловак у газеце: «Фарбы душы» пад адкрытым небам

Выбар рэдакцыі